މާލޭގެ މަގުތަކުގައި ފެންބޮޑުވެ، 30،000 ޓަނުގެ ފެން ހިންދައިފި

އިއްޔެ ރާއްޖެއަށް ކުރި ވިއްސާރައިގައި މާލޭގެ މަގުތަކުގައި ވަރަށް ބޮޑަށް ފެންބޮޑުވުމާއި ގުޅިގެން ފެން ހިންދުމަށް ކުރި މަސައްކަތުން 30،000 ޓަނުގެ ފެން ހިންދާފައިވާކަމަށް އެމްއެންޑީއެފުން ބުނެފިއެވެ.

އެމްއެންޑީއެފުން ބުނީ، އެމްއެންޑީއެފުން މާލޭގެ މަގުތަކުން ފެން ހިންދުމަށް އިއްޔެ 11:37 ހާއިރުން ފެށިގެން ކުރަމުން ދިޔަ މަސައްކަތުން މިއަދު 08:30 ހާއިރު މަގުތައް އާއްމު ހާލަތަށް ގެނެވިފައިވާކަމަށެވެ.

މި އޮޕަރޭޝަންގައި 30569 ޓަނުގެ ފެން ވަނީ ހިންދާފައިވާކަން ފާހަގަކުރަމުން އެމްއެންޑީއެފުން ބުނީ، މާލޭގެ އިތުރުން، ފެން ހިންދުމުގެ މަސައްކަތް ކ.ގުރައިދޫ، ކ.ހުރާ، އަދި ށ.ނަރުދޫގައި ކުރިއަށްގެންގޮސްފައިވާކަމަށެވެ.

މީގެ ތެރެއިން ގިނަ ރަށްތައް މިހާރު އާއްމު ހާލަތަށް ގެނެވިފައިވާކަން އެމްއެންޑީއެފުން ފާހަގަކުރެއެވެ. ވޭތުވެދިޔަ 24 ގަޑިއިރުގެ ތެރޭގައި މާލެއަށް ވަނީ ރެކޯޑް އަދަދަކަށް ފެންބޮޑުވެފައެވެ. މެޓް އޮފީހުގެ ތަފާސްހިސާބުތަކުން ދައްކާގޮތުގައި އިއްޔެ ދެވަނައަށް އެންމެ ގިނައިން ވާރޭވެހިފައިވަނީ މާލެއަށެވެ. މިގޮތުން މާލެއަށް ވަނީ 142.6 މިލިމީޓަރުގެ ވާރޭ ވެހިފައެވެ.