ޔާމީން ސަޕޯޓަރުންނަށް: އެމްޑީޕީއާ ގުޅުނީ އެޕާޓީގެ ފަލްސަފާ ކަމުދާތީއެއްނޫން؛ ޤައުމަށްޓަކައި

އެމްޑީޕީއާއެކު މަސައްކަތްތަކެއް ކުރުމަށް ނިންމެވީ، އެޕާޓީގެ ފަލްސަފާތައް ކަމުދާތީ ނޫން ކަމަށާ، އެހެނެއް ކަމަކު އެ ނިންމުން ނިންމެވީ ޤައުމީ މަސައްކަތްތަކެއް ކުރެއްވުމަށް ކަމަށް ކުރީގެ ރައީސް ޔާމީން ޢަބްދުލްޤައްޔޫމް ވިދާޅުވެއްޖެއެވެ.

ނޫސްވެރިން ހައްޔަރުކޮށް، މިޑިއާތަކަށް ހުރަސް އަޅަމުންދާތީ އެކަން ނިމުމަކަށް ގެނައުމަށް ކުރީގެ ރައީސް ޔާމީން އަބްދުލް ޤައްޔޫމް އާއި، މުޙައްމަދު ނަޝީދުގެ އިތުރުން ރައީސް އިބްރާހީމް މުހައްމަދު ޞާލިޙް ވަނީ ގުޅިގެން މަސައްކަތް ކުރެއްވުމަށް ނިންމަވާފައެވެ. އެކަމާގުޅިގެން ޕީއެންސީއާއި، ޔާމީންގެ ބައެއް ސަޕޯޓަރުންވެސް އެމަނިކުފާނަށް އަންނަނީ ފާޑުކިޔަމުންނެވެ.

ރޭގެ ޕީއެންއެފް ޖަލްސާގައި ވާހަކަދައްކަވަމުން މިވަގުތު އިދިކޮޅުގައި އެދެވޭ މަސައްކަތެއް ކުރާ އޮތީ ޕީއެންއެފް އާއި އެމްޑީޕީ ކަމަށެވެ. އަދި އެމަނިކުފާނަކީ މީގެ ކުރިން އެމްޑީޕީއާ ދެކޮޅަށް އެތަކެއް ވާހަކަތަކެއް ދެއްކެވި ބޭފުޅެއް ނަމަވެސް، މިވަގުތު ސަރުކާރާ ގުޅެވެން ނެތް ކަމަށް ވިދާޅުވިއެވެ.

އަޅުގަނޑު އެމްޑީޕީއަށް އެވަރަށް ފާޑުކިޔާފައި އެމީހުންނާ ގުޅުނީމަ (ޕީއެންސީ) ނުރުހިގެން މިއުޅެނީ. އެކަމަކު މިކަންވެސް އޮތް ގޮތަކީ، އަޅުގަނޑަށް ތާއީދުކުރާ ބޭފުޅުންނަށް ދަންނަވާނަން. އަޅުގަނޑަކަށް ނެތޭ މި ބޭފުޅުންނަށް، (ޕީއެންސީއަށް) ތާއީދު ކުރެވޭކަށް. މިބޭފުޅުންގެ ޣައްދާރުކަމާ ޚިޔާނާތްތެރިކަން މާބޮޑޭ. މި ބޭފުޅުން ވެރިކަމުގައި މި ތިބީ އެއްކަލަ ހުސްގޮނޑީގެ ޖާދުލުގައޭ. އެއަށްވުރެ ބޮޑު ޣައްދާރުވުމެއް ކޮބައިތޯ

ރައީސް ޔާމީން

ރައީސް ޔާމީން ވިދާޅުވީ ޕީއެންއެފް ނުކުމެ އޮތީ، މި ސަރުކާރުން ރައްޔިތުންނަށް ކުރިމަތިކުރުވަމުންދާ ދަތިތަކުން ސަލާމަތް ކުރުމަށް ކަމަށެވެ. އަދި އެމްޑީޕީއާ ގުޅުނީ އެ މަސައްކަތަށް ކަމަށްވެސް ވިދާޅުވިއެވެ.

”ކޮންމެ މުޒާހަރާއެއް ބައްލަވަބައްލަވާ. އަޅުގަނޑު އެމްޑީޕީގެ ފަލްސަފާ ރަނގަޅެކޭ ނުބުނަން. އެމީހުންގެ އައިޑިއޮލޮޖީ ރަނގަޅެކޭ ބުނަނީކީ ނޫނޭ. އެކަމު ރައްޔިތުންނަށް ހައްގުތަކެއް ހޯދައިދޭން މަގުމަތީގައި އުޅެނީ އެމްޑީޕީއޭ. އެހެން ބަޔަކު ނޫޅެޔޭ. އެހެންވީމާ މިހާރު މިއުޅެނީ، އެންމެ ބޮޑު ހައްގު ގެއްލިގެން. އެހެންވީމާ ކީއްވެގެންތޯއޭ އަޅުގަނޑު އެމްޑީޕީއާއެކީ މި މަސައްކަތް ނުކުރަންވީ. މިއީ އަޅުގަނޑުގެ އަމިއްލަ މަސައްކަތަކެއް ނޫން. މިއީ ދިވެހި ގައުމަށް ކޮށްދޭ ކަމެއް.“ ރައީސް ޔާމީން ވިދާޅުވިއެވެ.