ރަސްމީ ފާލަން މަރާމާތުކުރުމުގެ މަސައްކަތް ފަށައިފި

ޢިއްޒުއްދީން ފާލަން ތަރައްޤީ ކުރުމުގެ ޢަމަލީ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، )އެމް.ޓީ.ސީ.ސީ( އިން ފަށައިފިއެވެ.

ޢިއްޒުއްދީން ފާލަން މަރާމާތުކުރުމުގެ މަސައްކަތް ފަށާފައިވަނީ، އެ ފާލަން މަރާމާތު ނުކޮށް ގިނަ ދުވަސްތަކެއްވެ، ފާލަން ވަރަށް ބޮޑަށް ވީރާނާވެފައިވާތީއެވެ. އެހެންކަމުން، މިހާރު ހުރި ފާލަން ރޫޅާލުމަށްފަހު އަލުން އެތަން ތަރައްޤީކުރުމަށް ފާލަން ވަނީ މިހާރު ބަންދުކޮށްފައެވެ.

ޢިއްޒުއްދީން ފާލަން ނުވަތަ ރަސްމީ ފާލަމަކީ ރަސްމީ ދަތުރުފުޅުތަކުގައި ރާއްޖެއަށް ޒިޔާރަތްކުރައްވާ ބޭރު ޤައުމުތަކުގެ އިސްވެރިންނާއި ޢިއިއްޒަތްތެރިން މާލެއަށް ފައިބައިވަޑައިގަތުމަށް ބޭނުންކުރައްވާ ފާލަމެވެ.

މި މަޝްރޫޢުގެ ދަށުން ކުރީގެ ފާލަން ރޫޅާލުމަށް ފަހު، އައު ފާލަމުގެ ކޮންކްރީޓް މަސައްކަތާއި، ސްޓީލް ސްޓަރަކްޗަރ ފަރުމާކުރުމާކުރުމުގެ އިތުރުން ލަކުޑި އަދި މަތިވަޑާމުގެ މަސައްކަތް ކުރަން ނިންމާފައިވައިރު، މި ބޮޑު މަޝްރޫޢަށް ގާތްގަނޑަކަށް 11.7 މިލިއަން ރުފިޔާއަށް ޚަރަދުވާނެކަމަށް އެމްޓީސީސީއިން ބުނެއެވެ.

ޢިއްޒުއްދީން ފާލަން މަރާމާތުކޮށް ނިންމަން އެމްޓީސީސީއަށް ދީފައިވަނީ 270 ދުވަހެވެ.

ފާލަން އަލަށް ތަރައްޤީކުރުމުން، އެ ފާލަން ދިވެހި ސަޤާފަތް ރަމްޒުކޮށްދޭ އަދި، ފެންވަރު ރަނގަޅު ގިނަ ދުވަހު ބޭނުންކުރެވޭނެ ފާލަމަކަށްވާނެކަމަށް އެމްޓިސީސީއިން ވިދާޅުވެއެވެ.

މީގެ ކުރިން ދިވެހިރާއްޖޭގެ މިނިވަންކަމަށް 50 އަހަރު ފުރުނު ދުވަހުގެ މުނާސަބަތުގައި، ރިޔާ ނެގި ބައްތެއްޔެއްގެ ސިފައަށް ފަރުމާކޮށްފައިވަނީވެސް އެމްޓީސީސީއިންނެވެ. ޢިއްޒުއްދީން ފާލަމަކީ، ދިވެހިރާއްޖޭ ހޮޅިންގެ ކިބައިން ސަލާމަތްކޮށްދެއްވި ދޮންބަންޑާރައިން، ނުވަތަ އައްސުލްޠާން ޙަސަން ޢިއްޒުއްދީނަށް ނިސްބަތް ކުރައްވާ، ހަދާފައިވާ، ދިވެހިންގެ ޤައުމިއްޔަތު ރަމްޒުކޮށްދޭ މުހިންމު ބިނާއެކެވެ.