ކަސްޓަމަރުންގެ ކްރެޑިޓް މައުލޫމާތު މަރުކަޒީ ބޭންކާ ހިއްސާކުރަން ފަށައިފިން: އެޗްޑީސީ

ފްލެޓްތަކަށް ކަސްޓަމަރުން ކުލި ދައްކަމުންދާ ގޮތުގެ މައުލޫމާތު މޯލްޑިވްސް މަނިޓަރީ އޮތޯރިޓީ، އެމްއެމްއޭ ގައި ގާއިމުކޮށްފައިވާ ކްރެޑިޓް އިންފޮމޭޝަން ޔުނިޓާ ހިއްސާކުރަމުންދާކަމަށް ހައުސިންގ ޑިވެލޮޕްމެންޓް ކޯޕަރޭޝަން އެޗްޑީސީން ހާމަކޮށްފިއެވެ.

މިކަމާއި ގުޅިގެން އެޗްޑީސީން ނެރެފައިވާ ނެރެފައިވާ އިއުލާނެއްގައި ބުނެފައިވަނީ ކަސްޓަމަރުންގެ ކްރެޑިޓާ ބެހޭ މަޢުލޫމާތު އެމްއެމްއޭ ގައި ގާއިމުކޮށްފައިވާ ކްރެޑިޓް އިންފޮމޭޝަން ސިސްޓަމާ ހިއްސާކޮށްފައިވަނީ އެކުންފުނީގެ ހިންގުން ހަރުދަނާ ކުރުމުގެ ގޮތުން ކަމަށެވެ. އެޗްޑީސީން ބުނެފައިވާ ގޮތުގައި މި ބަދަލުގެ ސަބަބުން އެ ކުންފުނީގެ ހިންގުން ހަރުދަނާކުރެވި، ކުންފުނީގެ މާލީ ގާބިލުކަން އިތުރުކުރެވުމުގެ އިތުރުން އެކުންފުނިން އާންމުންނަށް ދެމުންއަންނަ ޚިދުމަތްތަކުގެ ފެންވަރު ރަނގަޅުކުރެވިގެން ދާނެކަމަށެވެ.

އަދި ހަމައެހެންމެ، މިބަދަލާއި އެކު، އެޗްޑީސީއަށް ފައިސާ ދައްކަން ޖެހޭ އެއްވެސް ކަސްޓަމަރެއް، އެހެން މާލީ އިދާރާއަކުން ކްރެޑިޓެއް ދޫކުރުމުގެ ކުރިން ސިސްޓަމްގައިވާ މައުލޫމާތަށް ބިނާކޮށް މާލީ އިދާރާތަކުން އެފަރާތްތަކުގެ ކްރެޑިޓް އިވަލުއޭޓް ކުރަމުންދާނެ ކަމަށް އެކުންފުނިން ވަނީ ބުނެފަ އެވެ.

މިކަމާއި ގުޅިގެން އެޗްޑީސީން ވަނީ ހުރިހާ ކަސްޓަމަރުން ވެސް ގަވާއިދުން ފައިސާ ދެއްކުމަށް ހަނދާންކޮށްދީފަ އެވެ.

އަދިހަމައެހެންމެ، އެޗްޑީސީން ވަނީ އެ ކުންފުނީގެ ހިންގުން ހަރުދަނާ ކުރުމަށާއި، ހާމަކަން ބޮޑު އަދި ދެފުށް ފެންނަ ގޮތަށް ކުންފުނީގެ ކަންކަން ބައްޓަން ކުރުމަށް ކަސްޓަމަރުނާއި އާންމު ރައްޔިތުންގެ އިތުރުން ވިޔަފާރިތަކުން ދެމުންއަންނަ އެއްބާރުލުން ފާހަގަކޮށްފައެވެ.

ސޯޝަލް ހައުސިންގެ ގޮތުގައި ދޫކޮށްފައިވާ ފްލެޓްތަކަށާއި ރަށްރަށުގައި ދޫކޮށްފައިވާ ރޯހައުސްތަކަށް ކުލި ނުދެއްކުން އާއްމުވެފައިވާއިރު، ހަމައެކަނި ހިޔާގެ އެޕާޓްމަންޓްތަކަށް މަހުކުލީގެ ގޮތުގައި ނުލިބިވާ އަދަދު 700 މިލިއަން ރުފިޔާއަށްވުރެ މަތިކަމަށް އެޗްޑީސީގެ ހިސާބުތަކުން ދައްކައެވެ.

އެމްއެމްއޭގެ ކްރެޑިޓް ލިސްޓްގައި ކުލިނުދައްކާމީހުންގެ ނަންތައް ހިމެނުމުން ކުރިއަށް އޮތްތަނުގައި އެފަދަ ފަރާތްތަކަށް ބޭންކްތަކުން ލޯނު ހޯދުމާއި އެނޫންވެސް މާލީގޮތުން ކުރަންޖެހޭ މުއާމަލާތްތައް ކުރުމުގައި ހުަރަސްތަކެއް ކުރިމަތިވެގެންދާނެއެވެ. ކްރެޑިޓް ހިސްޓްރީ ރަނގަޅު ނޫންނަމަ، ބޭންކްތަކުގެ އިތުރުން ލީސިން ކުންފުނިތަކުން މިހާރުވެސް އެމީހަކަށް ލޯނާއި ކްރެޑިޓް އުސޫލުން ހިދުމަތެއް ނުދެއެވެ.

ކުލި ނުދައްކާ މައްސަލާގައި އެޗްޑީސީން ނޯޓިސް ފޮނުވަމުންދިޔަ ނަމަވެސް އަދި މިހާތަނަށް ފިޔަވަޅުތަކެއް އަޅާފައެއް ނުވެއެވެ. ނަމަވެސް ދައްކަންޖެހޭ ފައިސާ ބަހާލައިގެން ދެއްކުމުގެ ފުރުސަތު އެޗްޑީސީން ފަހިކޮށްދެމުން އަންނަކަން ފާހަގަކޮށްލެވެއެވެ.