އެމްބީއެސް ތަފާސް ހިސާބު ގޯސް: 9000 ކުދިން ސުކޫލަށް ނުދާ ވާހަކައަކީ ދޮގެއް، ސުކޫލަށް ނުދަނީ 229 ކުދިން

ރާއްޖޭގެ ކުޑަކުދިންގެ އާބާދީގެ 9،000 އަށް ވުރެ ގިނަ ކުދިން ސްކޫލަށް ނުދާ ކަމަށް ތަފާސް ހިސާބުތަކުން ދައްކައިފި ކަމަށް ބުނެ ކޮށްފައިވާ ރިޕޯޓަކީ ހަގީގަތެއް ނޫން ކަމަށް އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވެއްޖެ އެވެ.

މިނިސްޓަރު އެހެން ވިދާޅުވީ ނޭޝަނަލް ބިއުރޯ އޮފް ސްޓެޓިސްކްސްގެ ތަފާސް ހިސާބުތަކާއި ހަވާލާދީ އާންމުކޮށްފައިވާ ހަބަރެއް ދޮގުކޮށް ކުރެއްވި ޕޯސްޓެއްގަ އެވެ.

މިނިސްޓަރު ވިދާޅުވި ގޮތުގައި ނޭޝަނަލް ބިއުރޯ އޮފް ސްޓެޓިސްކްސްގެ ތަފާސް ހިސާބުތައް އެކުލަވާލާފައިވާ ގޮތް ވެސް ގޯހެވެ. އަދި ވިދާޅުވީ 2022 ވަނަ އަހަރު 9,000 ދަރިވަރުން ސްކޫލަށް ހާޒިރުނުވާ ކަމަށް ދޭހަވާގޮތަކަށް ތަފާސް ހިސާބު އެކުލަވާލިއިރު މި އަދަދުގެ ތެރޭގައި އުމުރުން 2 އަހަރާއި 3 އަހަރުގެ ކުދިން ހިމަނާފައިވާ ކަމަށެވެ.

".. މިއީ ތައުލީމުގެ ގާނޫނުން ރަސްމީ ތައުލީމު ހާސިލްކުރުމަށް ސްކޫލަށް ދާންޖެހޭ އުމުރުފުރާގެ ކުދިންނެއް ނޫން. ވީމާ، ރަސްމީ ތައުލީމު އުނގެނުން މަޖުބޫރު ނޫން އެތައް ހާސް ތުއްތު ކުދިން ހިމަނައިގެން، ނުވަވަރަކަށް ހާސް ދަރިވަރުން ސްކޫލަށް ނުދާކަމަށް ދޭހަވާ ގޮތަކަށް ތަފާސްހިސާބު ނެރުމަކީ ގޯހެއް. އަދި މިހަގީގަތް ނޭގި މި ތަފާސް ހިސާބުތައް ރިޕޯޓު ކުރުމަކީ ވެސް ޒިންމާދާރު ގޮތެއް ނޫން,"

މިނިސްޓަރު އިތުރަށް ވިދާޅުވީ އެކި އެކި ގޮންޖެހުންތަކުގެ ސަބަބުން ސްކޫލަށް ނުދާ ދަރިވަރުން ފާހަގަކޮށް، ކަމާއިބެހޭ މުއައްސަސާތަކާ ގުޅިގެން އެޑިއުކޭޝަން މިނިސްޓްރީގެ ފަރާތުން އަބަދުވެސް ފިޔަވަޅު އަޅާ ކަމަށެވެ.

އަދި ނޭޝަނަލް ބިއުރޯ އޮފް ސެޓެޓިސްޓިކްސް ކުރީން ނެރެފައިވާ ރިޕޯޓެއްގައި 2022 ވަނަ އަހަރު ގަވާއިދުން ސްކޫލަށް ނުދާކަމަށް ފާހަގަ ކުރެވިފައި ވަނީ 229 ކުދިން ކަމަށާ އެއީ މާލެއިން 85 އަދި އަތޮޅުތެރޭގެ އެކި ރައްތަކުން 144 ކުދީންކަން މިނިސްޓަރު ވަނީ ފާހަގަ ކުރައްވާފަ އެވެ.