ތުރުކީން ހަދިޔާކުރި މަނަވަރު ދައްކާލައިފި، ހިދުމަތަށް ނެރެން ތައްޔާރުވަނީ

ތުރުކިވިލާތުން ރާއްޖެއަށް ހަދިޔާކުރި ތުރުކީ ނޭވީ މަނަވަރު ރާއްޖެއަށް ގެނެސް ދައްކާލައިފި އެވެ.

މޯލްޑިވްސް ނެޝަނަލް ޑިފެންސް ފޯސް އިން ވަނީ މަނަވަރުގެ ފޮޓޯއަކާއެކު މިއަދު ޕޯސްޓެއް ކޮށްފަ އެވެ. އެ ޕޯސްޓްގައި ބުނީ މި މަނަވަރު އެމްއެންޑީއެފާ ރަސްމީކޮށް ހަވާލުކުރުމާއި، ހިދުމަތަށް ނެރެ، ގައުމީ ދިފާއީ ބާރަށް ކަމިޝަން ކުރުމަށް ބާއްވާ ރަސްމިއްޔާތު ބޭއްވުމަށް ވާންޖެހޭ ތައްޔާރީތައް ދެ ގައުމުގެ މެދުގައި ދަނީ ކުރަމުން ކަމަށެވެ.

ތުރުކީގެ އަސްކަރީއްޔާއިން ކުރިން ބޭނުކުރި މި މަނަވަރު ރާއްޖެއަށް ހަދިޔާކުރަން އުޅޭ ވާހަކަ އެންމެ ފުރަތަމަ އާއްމުވެގެންދިޔައީ އެ ގައުމުގެ ނޫސްތަކުންނެވެ. ނަމަވެސް ފަހުން އެމްއެންޑީއެފުން އާއްމުކުރި ބަޔާނެއްގައި ވަނީ އެ ވާހަކަ ޔަގީންކޮށްދީފަ އެވެ.

އެމްއެންޑީއެފުން ބުނީ، ތުރުކީން ރާއްޖެއަށް މަނަވަރެއް ހަދިޔާކުރުމަށް ނިންމީ ދެޤައުމުގެ ދެމެދު އަސްކަރީ ގާބިލުކަން އިތުރުކުރުމުގެ އެއްބަސްވުމުގެ ދަށުންކަމަށެވެ.

ތުރުކީގެ މީޑިއާތަކުން އޭރު ބުނެފައިވަނީ އެއީ އެ ޤައުމުގެ އަސްކަރިއްޔާގައި މީގެ 40 އަހަރުކުރިންވެސް ބޭނުންކުރަމުން ގެންދިޔަ މަނަވަރެއް ކަމަށެވެ. މި މަނަވަރު ކޮމިޝަން ކުރިތާ 45 އަހަރުވެފައިވާ ކަމަށް ތުރުކީގެ ނޭވަލްއިން ލިބޭ މައުލޫމާތުތަކުން އެނގެ އެވެ.

ތުރުކީން ރާއްޖެއަށް ހަދިޔާކުރި މަނަވަރަކީ 58 މީޓަރު ދިގު އަދި 7.62 މީތަރު ފުޅާ މަނަވަރެކެވެ. މިއީ ގަޑިއަކު 70 ކިލޯ މީޓަރުގެ ރާސްތާއެއް ކަޑައްތުކުރުމުގެ ގާބިލުކަން ލިބިގެންވާ އުޅަނދެކެވެ. ތުރުކީން މި މަނަވަރު ފަރުމާކޮށްފައިވަނީ، މަނަވަރުގައި މިސެއިލް، ޑިފެންސް ސިސްޓަމް ހިމެނޭ ގޮތަށެވެ.

ރައީސް ޑރ. މުހައްމަދު މުއިއްޒު ވެރިކަމުގެ ހުވާކުރެއްވުމަށްފަހު އެންމެ ފުރަތަމަ ރަސްމީ ދަތުރުފުޅެއް ކުރެއްވީ ތުރުކީއަށެވެ. އެ ދަތުރުފުޅަށްފަހު ދެ ޤައުމުގެ ދެމެދުގައި ވިޔަފާރިއާއި، ޑިފެންސްގެ ދާއިރާއިން ގުޅުން ބަދަހިކުރުމަށް ވަނީ އެއްބަސްވުންތައް އެކުލަވާލާފައެވެ. މި އެއްބަސްވުމުެގ ދަށުން ތުރުކީވިލާތުން އަސްކަރީ ޑްރޯންތަކެއްވެސް ވަނީ ގެނެސްފައެވެ.