ޖެހިޖެހިގެން ހޯދި ފަސްވަނަ މޮޅާއެކު ޔުނައިޓެޑް އެފްއޭ ކަޕްގެ ހަތަރުވަނަ ބުރަށް

ހުރިހާ މުބާރާތަކުން މެންޗެސްޓާ ޔުނައިޓެޑް ހޯދި ފަސްވަނަ މޮޅާއެކު އެޓީމް އެފްއޭ ކަޕްގެ ހަތަރުވަނަ ބުރަށް ގޮސްފިއެވެ.

ރެޑިންގް އަތުން 2-0 ޔުނައިޓެޑް މޮޅުވި މެޗުގައި ލަނޑުތައް ޖަހައިދީފައިވަނީ މަޓާ އަދި ލުކާކޫއެވެ. މަޓާގެ ލަނޑަކީ ލިބުނު ޕެނަލްޓީއަކުން ކާމިޔާބުކުރި ލަނޑެކެވެ. އަދި ލުކާކޫގެ ލަނޑާއެކު އޭނާ އެފްއޭ ކަޕްގައި އެންމެ ފަހުން ކުޅުނު 14 މެޗުގައި ޖެހި ލަނޑުގެ އަދަދުވަނީ 13 އަށް އަރާފައެވެ.

މެޗުގައި ފެނުނު ލަނޑުތައް ހަމައެކަނި ޔުނައިޓެޑުގެ ފަރާތުން ފެނުނު ނަމަވެސް ރެޑިންގްވަނީ ލަނޑުޖަހާނެ ރަނގަޅު ފުރުސަތުތަކެއް ފަހިކޮށްފައެވެ. ގިނަ ހަމަލާތަކުގެ ހުރަހަކަށް ޔުނައިޓުގެ ކީޕަރު ރޮމޭރޯވީއިރު ދެން ފޮނުވާލި ހަމަލާތައް ރެޑިންގްއަށް ގޯލާ އަމާޒުކޮށް ނުލެވުނީކަން ފާހަގަކޮށްލެވެއެވެ.

މޮޅުވުމުގެ އިތުރުން ގިނަ ލަނޑުތަކެއް ޖަހަމުން އަންނަ ޔުނައިޓެޑް މި މެޗުގައި ފެނުނީ ވަރަށް އާދައިގެކޮށެވެ.

ޗެންޕިއަންޝިޕްގެ ފުލުން ދެވަނައިގަ އޮތް ރެޑިންގްގެ ކޯޗް ގޯމޭސް މެޗަށްފަހު ބުނީ ބަލިވުމަކުން އޭނާގެ ޓީމުގެ ކޮންފިޑެންސް ނުގެއްލޭނެކަމަށެވެ. ރެޑިންގް އަކީ ދެވަނަ ޑިވިޝަނުގެ ޓީމެއް ކަމަށައި ނަމަވެސް ކުޅެން ޖެހުނީ ޔުނައިޓެޑައި ކަމަށެވެ. މެޗުގައި އޭނާގެ ޓީމް ދެއްކި ކުޅުމުން މުސްތަގްބަލައިމެދު އުންމީދޫ އައުވެއްޖެ ކަމުގައިވެސް ދާދި ފަހުން އެޓީމައި ހަވާލުވި ގޯމޭސް ބުނެފައިވެއެވެ.

ޔުނައިޓެޑުގެ ކެއާ ޓޭކާ މެނޭޖަރ ޝޯލްޝާ ބުނީ މެޗުގައި އޭނާގެ ޓީމުގެ ފަރާތުން މާ އެދެވޭ ކުޅުމެއް ނުފެނުނީ ފުރަތަމަ އެގާރައަށް ގިނަ ބަދަލުތަކެއް ގެނެސްފައިވުމުން ކަމަށެވެ. ގިނަ ދުވަހު އެއްކޮށް ނުކުޅޭ ކުޅުންތެރިންތަކެއް ދަނޑަށް އަރުވައިގެންވެސް ދެ ކާމިޔާބުކޮށް ޖެހިގެން އޮތްބުރަށް ޔުނައިޓެޑް ދަތުރު ކުރުމުން ހިތްހަމަޖެހޭ ކަމުގައިވެސް ޝޯލްޝާ ބުންޏެވެ.

ލީގުގައި އެންމެ ފަހުން ކުޅުނު މެޗުގަ އެރުވި ފުރަތަމަ އެގާރައަށް ޖުމްލަ ނުވަ ބަދަލު ގެނެސްގެން ކުޅުނު ޔުނައިޓެޑުގެވަނީ މި މެޗަށްފަހު ހޫނު މާހައުލެއްގައި ތަމްރީނުތައް ހެދުމަށް ދުބާއީއަށް ދަތުރުކޮށްފައެވެ.

އިނގިރޭސި އެފްއޭ ކަޕްގެ ތިންވަނަ ބުރުގެ އެހެން މެޗުތަކުގެ ނަތީޖާތަކަށް ބަލާލާއިރު 3-1 ކުން ބޯންމައުތްގެ މައްޗަށް ބްރައިޓަން ކުރި ހޯދިއިރު ވެސްޓް ހަމްވަނީ 2-0 ބަރމިންގްހަމް ސިޓީ ބަލިކޮށްފައެވެ. ރަނގަޅު ފޯމަކަށް އެޅިފައިވާ ޓޮޓެންހަމް ހަތަރުވަނަ ބުރު ކަށަވަރުކުރީ ޓްރަންމިއާ ކޮޅަށް ލަނޑު ގޯންޏެއް އޮއްސާލުމަށްފަހުއެވެ. އެ މެޗް ޓޮޓެންހަމް ކާމިޔާބުކުރީ 7-0 ކުންނެވެ.