އޭރު އެއާޕޯޓުތައް އެޅުން ގޯސް، މިހާރު ދައްކަނީ އިތުރު އެއާޕޯޓު އަޅާ ވާހަކަ!
ކުރީގެ ރައީސް އަބްދުﷲ ޔާމީންގެ ވެރިކަމުގައި ރާއްޖޭގެ އެކި ސަރަހައްދުތަކުގައި އެއާޕޯޓުތައް އަޅަން ފެށުމުން އިދިކޮޅު ފަރާތްތަކުން އެކަމާއި ދެކޮޅަށް ވަރަށް ގިނަ ވާހަކަތައް ދެއްކިއެވެ. ރައީސް ޔާމީންގެ ވެރިކަމުގައި އެމަނިކުފާނުގެ ވިސްނުންފުޅަކަށް ވެފައި އޮތީ ރާއްޖޭގެ އެކި ސަރަހައްދުތަކުގައި އެއާޕޯޓު އަޅައިގެން ޓޫރިޒަމް ފުޅާކުރުމަށެވެ.
އެހެން ނަމަވެސް އޭރު އިދިކޮޅު ފަރާތްތަކުގެ ގޮތުގައި ތިއްބެވި، މިހާރުގެ ސަރުކާރުގެ ވަޒީރުންނާއި ޚުދު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިޙު ވެސް އެއާޕޯޓުތައް އިތުރު ކުރުމާއި ދެކޮޅު ހެއްދެވިއެވެ.
ރައީސް ޔާމީނުގެ ސަރުކާރުގައި އެއާޕޯޓުތައް އިތުރު ކުރެއްވުމަށް ގެންގުޅުއްވި ސިޔާސަތަށް ފާޑު ވިދާޅުވަމުން އެމްޑީޕީގެ ރައީސް މުހައްމަދު ނަޝީދު ވެސް ވަނީ ކޮންމެ ރަށެއްގައި އެއަރޕޯޓެއް އެޅުމުގެ ވިސްނުން ދޫކޮށްލައި، ހަރުދަނާ، އަގުހެޔޮ ފެރީގެ ނިޒާމަކުން ރައްޔިތުންނަށް ފައިދާ ބޮޑު ވާނެ ކަމަށް ވިދާޅުވެފައެވެ.
މީގެ އަހަރެއްހާ ދުވަސް ކުރިއަށް ޖެހިލާއިރު އެއާޕޯޓުތައް އިތުރުކުރުމަކީ "ވޯޓާއި ދިމާކޮށް ދައްކާލާ ދަޅައެއް"ގެ ގޮތުގައި ސިފަކުރިއެވެ. އެއީ ރައްޔިތުންގެ ފައިސާ ބޭކާރު ގޮތުގައި ޚަރަދުކުރުން ކަމުގައި ވެސް ވާހަކަ ދެކެވުނެވެ.
އެހުރިހާ ވާހަކަތަކެއް ދެއްކި އެމްޑީޕީއަށް ނިސްބަތްވެ ވަޑައިގަންނަވާ މެންބަރުންގެ ރާގު މިއަދު ވަނީ ބަދަލުވެފައެވެ. ރައްޔިތުންގެ މަޖިލިސް އިންތިޚާބު ބޯމަތިވެފައިވާއިރު ދައްކަމުން ގެންދަނީ އިތުރު އެއާޕޯޓުތައް އަޅާ ވާހަކައެވެ.
ނ.އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި ބޭއްވި ކެމްޕެއިން އިވެންޓެއްގައި ވާހަކަ ދައްކަވަމުން ރައީސް އިބްރާހިމް މުހައްމަދު ސޯލިޙް ހާމަކުރެއްވި ގޮތުގައި އެތެރޭގެ އުދުހުންތަކުގެ އަގު ހެޔޮކޮށް، ރާއްޖޭގެ އެކި ސަރަހައްދުތަކުގައި އިތުރު އެއާޕޯޓްތައް އެޅުމުގެ މަސައްކަތް ވަރަށް އަވަހަށް ފެށިގެންދާނެ ކަމަށެވެ.
އެއާޕޯޓުތައް އެޅުމަށް ހިންގާ މަޝްރޫޢުގެ ތަފްސީލެއް ނުދެއްވި ނަމަވެސް ރައީސް ވަނީ އެ އެއާޕޯޓް ތަރައްޤީކުރާ ފަރާތަށް ސަރުކާރުން ރަށެއް ނުވަތަ ރަށްތަކެއްދޭންޖެހޭ ކަމަށް ވިދާޅުވެފައެވެ. އަދި އެފަރާތްތަކަށް ދޭނެ ބައެއް ރަށްތައް ވެސް އެ ސަރުކާރުން ފާހަގަކޮށްފައިވާ ކަމަށް ރައީސް ވިދާޅުވިއެވެ.
އެއާޕޯޓުތައް އެޅުމާއި ދެކޮޅަށް އިދިކޮޅު ފަރާތްތަކުގެ ގޮތުގައި ތިބެ ރައީސް ސޯލިހާއި އެމްޑީޕީން ދެއްކީ ތާކުން ތާކު ނުޖެހޭ ވާހަކަ ހެއްޔެވެ؟ ނުވަތަ އެއީ ރައީސް ޔާމީނުގެ އިޤްތިސާދީ ސިޔާސަތު ފެއިލް ކޮށްލުމަށް ދެއްކެވި ވާހަކަތަކެއް ހެއްޔެވެ؟
އެހެން ނުވާނަމަ ރައީސް ސޯލިހްގެ ވެރިކަމުގައި ވެސް އެއާޕޯޓުތައް އެޅުމުގެ ވައުދު މިވަނީ ވޯޓު ހޯދަން ކަމަށް ބެލެވިދާނެއެވެ. ނުވަތަ ވިސްނުންތެރިކަމެއް ނެތި ދެއްކެވި ވާހަކަފުޅަކަށް ވެސް ވެދާނެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
