ސިދާތާ ހާޒިރުކުރި ކޮމެޓީގެ ބައްދަލުވުން ސިއްރުކޮށްފި

ގެއްލިގެން ހޯދަމުންދާ 14 އަހަރުގެ ޝައިމް އަބްދުﷲ ގެ މައްސަލައިގައި، ރައްޔިތުންގެ މަޖިލީހުގެ ހިއުމަން ރައިޓްސް ކޮމިޓީއަށް ޖެންޑާ މިނިސްޓަރު ސިދާތާ ޝަރީފު ހާޒިރުކޮށްގެން ބޭއްވި ބައްދަލުވުން ސިއްރުކޮށްފިއެވެ.

މިރޭ ބޭއްވި ބައްދަލުވުން ސިއްރުކުރަން ނިންމީ ބައްދަލުވުމުގައި ބައިވެރިވެވަޑައިގެންނެވި ހަ މެންބަރުންގެ އިއްތިފާގުންނެވެ. އެގޮތަށް ނިންމީ ޝައިމްއަކީ ކުޑަކުއްޖަކަށް ވުމާއެކު ޝައިމްގެ ހައްގުތަކެއް ގެއްލޭނެތީ ކަމަށް މެންބަރުން ވިދާޅުވިއެވެ.

ޝައިމް ގެއްލުނު މައްސަލާގައި ޝިދާތާ މިރޭ ކޮމިޓީ އަށް ހާޒިރު ކުރި އިރު، އެ މައްސަލައާ ގުޅިގެން މިހާތަނަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ކުރި ތަހުގީގީ ރިޕޯޓު ވެސް މިއަދު ވަނީ މަޖިލީހަށް ހުށަހަޅާފައެވެ.

ޝައިމް ގެއްލުނީ ކުޑަކުދިންގެ ހިޔާގައި ހުއްޓައެވެ. އެމައްސަލައިގައި މީޑިއާއާ ބައްދަލުކުރައްވައި ސިދާތާ ދެއްކެވި ވާހަކައިގައި ވަނީ ޝައިމް ގެއްލުނީ ދައުލަތުގެ އިހުމާލުން ކަމަށާއި ބަލަންވާ މިންވަރަށް ނުބެލިގެން ކަމަށް ވިދާޅުވެފައިވެއެވެ. ސިދާތާގެ އެވާހަކައާއި ގުޅިގެން ގިނަ ބައެއްގެ ފާޑުކިޔުން ވަނީ ސިދާތާއަށާއި ސަރުކާރަށް އަމާޒުވެފައެވެ.

ޝައިމް ގެއްލުނީ ހިޔާގައި ހުއްޓައި މިމަހުގެ 18 ގައެވެ. ކުޑަކުއްޖަކު ގެއްލިގެން ފުލުހުން އެކުއްޖާ ހޯދުމަށް އާންމުންގެ އެހީތެރިކަމަށް އެދުނު އިރުވެސް އެކުއްޖަކީ ދައުލަތުގެ ބެލުމުގެ ދަށުގައި ހުރި ކުއްޖެއްކަން ޖެންޑާއިން ބުނެފައެއް ނުވެއެވެ.

ޖެންޑާއިން އެކަމަށް އެއްބަސްވީ ޝައިމް ގެއްލުނު އިރު ހުރީ ދައުލަތުގެ ބެލުމުގެ ދަށުގައިކަން މީޑިއާތަކުން ހާމަކުރުމުން އޭގެ ފަހުންނެވެ.