ރަސްމާލެ ދަތުރުފަތުރުގެ މާސްޓާ ޕްލޭން ހަދަން ކޮންސަލްޓަންޓެއް ހޯދަނީ

ރަސްމާލެ ޓްރާންސްޕޯޓް މާސްޓަރ ޕްލޭން ޕްރޮޖެކްޓުގެ ޕްރިޕަރޭޝަން އަދި ފީޒިބިލިޓީ ސްޓަޑީ ހެދުމުގެ ކޮންސަލްޓަންސީ ސާރވިސް ދޭނެ ފަރާތެއް ހޯދުމަށް މިނިސްޓްރީ އޮފް ފިނޭންސް އެންޑް ޕްލޭނިންގ އިން އިއުލާންކޮށްފިއެވެ.

ފިނޭންސް މިނިސްޓްރީން އިއްޔެ ކުރި އިއުލާންގައި ވަނީ، ރަސްމާލެ ޓްރާންސްޕޯޓް މާސްޓަރ ޕްލޭން ޕްރޮޖެކްޓުގެ ޕްރިޕަރޭޝަން އަދި ފީޒިބިލިޓީ ސްޓަޑީ ހެދުމުގެ ކޮންސަލްޓަންސީ ސާރވިސް ދޭނެ ފަރާތެއް ހޯދުމަށް ޝައުޤުވެރިކަން ފާޅުކުރުމުގެ ދަޢުވަތު ޝަރުޠުހަމަވާ ފަރާތްތަކަށް ހުޅުވާލާކަމަށެވެ. އަދި މިކަމާއި ގުޅޭ އިތުރު މައުލޫމާތުތައް މި އިއުލާނާއެކު މިނިސްޓްރީއިން ވަނީ އާއްމުކޮށްފައެވެ.

އެ އިއުލާނުގައި ވާގޮތުން، މިއީ މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރގެ އެދިލެއްވުމުގެ މަތިން ހުޅުވާލެވިފައިވާ ފުރުސަތެކެވެ. އަދި މި ކޮންސަލްޓެންސީގެ މައިގަނޑު މަޤްޞަދަކީ ރަސްމާލެއަށް ފުރިހަމަ ދަތުރުފަތުރުގެ މާސްޓަރ ޕްލޭނެއް އެކުލަވާލާ، ވެރިކަންކުރާ ރަށާއި ރަސްމާލެއާ ދެމެދު، އަދި ރަށުގެ އެތެރޭގައިވެސް ރައްކާތެރި، އިތުބާރު ހިފޭ އަދި ދެމެހެއްޓެނިވި ދަތުރުފަތުރުގެ ނިޒާމެއް ޤާއިމުކުރުން ކަމަށް މިނިސްޓްރީއިން ބުނެފައިވެއެވެ.

އެގޮތުން، މި މަސައްކަތަށް އެދި ހުށަހަޅާއިރު އެ މަސައްކަތް ކުރުމަށްޓަކައި ކުންފުނީގެ ފަންނީ ޤާބިލު ކަމާއި، ގުޅޭ ދާއިރާއިން ކޮށްފައިވާ މަސައްކަތްތަކުގެ ތަފްސީލްތަކާއި އަގުތަކާއި، ކުންފުނީގެ މުވައްޒަފުންގެ މިފަދަ މަސައްކަތްތަކުގެ ހުނަރާއި ޤާބިލުކަން އަދި  މިފަދަ މަސައްކަތުގެ މަޢުލޫމާތު ހިމެނޭ ލިޔެކިޔުނަތައް ހުށަހަޅަން ޖެހޭނެކަމަށް މިނިސްޓްރީއިން އަންގައެވެ. މި ފުރުސަތަށް އެދި ހުށަހަޅާ ފަރާތްތަކުގެ ތެރެއިން މި ޚިދުމަތްދޭނެ ފަރާތެއް ހޮވުމަށް ހަމަޖެހިފައިވަނީ ޝޯޓްލިސްޓް ކުރުމަށް ފަހުއެވެ. އެއަށްފަހު ޝޯޓްލިސްޓް ކުރެވުނު ފަރާތްތަކަށް ޕްރޮޕޯސަލް ހުށަހެޅުމުގެ ދަޢުވަތު އެ ވުޒާރާއިންދޭނެއެވެ. ޝޯޓްލިސްޓް ކުރުމަށް ހަމަޖެހިފައިވާ ކްރައިޓީރިއާ އެ މިނިސްޓްރީގެ ޓާމްސް އޮފް ރެފަރެންސް (ޓީ.އޯ.އާރު) ގައި ހިމަނާފައިވެއެވެ.

މި ކްރައިޓީރިއާގައި ވާގޮތުން ކޮންސަލްޓަންޓެއް ހޮވާނީ ދައުލަތުގެ މާލިއްޔަތުގެ ގަވައިދުގައި ބަޔާންކޮށްފައިވާ ކޮލިޓީ އެންޑް ކޮސްޓް ބޭސްޑް ސިލެކްޝަން (ކިއު.ސީ.ބީ.އެސް) މެތަޑް އާއި އެއްގޮތްވާ ގޮތުގެ މަތިންނެވެ. އަދި މިމަސައްކަތްތަކާއި ގުޅޭ މަޢުލޫމާތު ހިމެނޭ ގޮތަށް ތައްޔާރުކުރެވިފައިވާ ޓާރމްސް އޮފް ރިފަރެންސް (ޓީ.އޯ.އާރް) މިނިސްޓްރީގެ ވެބްސައިޓް www.finance.gov.mv އިން 9 ޑިސެންބަރު 2025 ވާ އަންގާރަ ދުވަހުން ފެށިގެން ޑައުންލޯޑް ކުރެވެން ހުންނާނެކަމަށް އެ ވުޒާރާއިން ބުނެފައިވެއެވެ.

އެހެންކަމުން، މިސައްކަތަށް ޓާމްސް އޮފް ރެފަރެންސް (ޓީ.އޯއާރު) ގައި ބަޔާންކޮށްފައިވާ ޝަރުތުތަކާއި އޭގައިވާ އެންމެހައި މައުލޫމާތު ހިމެނޭހެން "އެކްސްޕްރެޝަން އޮފް އިންޓްރެސްޓް" (އީ.އޯ.އައި) ހުށަހެޅުމުގެ ފުރުޞަތު މިކަމަށް ޝަރުޠުހަމަވާ ހުރިހާ ފަރާތްތަކަށްވަނީ ހުޅުވާލާފައެވެ.

އެގޮތުން މަސައްކަތަށް ޝައުޤުވެރިވެލައްވާ ފަރާތްތަކުން 24 ޑިސެންބަރު 2025 ވާ ބުދަ ދުވަހު 14:00:00 ގެ ކުރިން، "އެކްސްޕްރެޝަން އޮފް އިންޓަރެސްޓް" މެއިލް ނުވަތަ އީމެއިލް މެދުވެރިކޮށް މިނިސްޓްރިއަށް ފޮނުވުމަށް ވަނީ އެދިފައެވެ.

ޖުމުލަ 25000 ގޯތި ދޫކުރުމަށް ހަމަޖެހިފައިވާ ރަސްމާލޭގެ ފަޅު ހިއްކުމުގެ މަސައްކަތް ބާރު ދުވެލިގައި ކުރަމުންދެއެވެ. އެގޮތުން މިއަދާ ހަމަޔަށް ރަސްމާލެ ފަޅުން 215 އަށްވުރެ ބޮޑު ސަރަހައްދެއް ހިއްކައި ނިމިފައިވާކަން އެޗްޑީސީން ބުނެފައިވެއެވެ. އަދި އަންނަ އަހަރުގެ އޭޕްރިލްމަހުގެ ތެރޭގައި މި މަޝްރޫއު އެއްކޮށް ނިންމާލެވޭނެކަމަށްވެސް ސަރުކާރުން މައުލޫމަތުދެއެވެ.