މަސައްކަތް ކުރާނީ މައިނޯރިޓީއަށް ވޭހާވެސް ބޮޑަށް ފުރުސަތު ދީގެން: ޕީއެންސީ

މަޖިލީސް ތެރެއިން މަސައްކަތް ކުރައްވާނީ ވޭހާވެސް ބޮޑަށް މައިނޯރިޓީ ޕާޓީއަށް ފުރުސަތުތައް ދެއްވައިގެން ކަމަށް މަޖިލީހުގެ މެޖޯރިޓީ ޕާޓީ ޕީއެންސީން ބުނެފިއެވެ.

ޕީއެންސީ ޕާލަމެންޓަރީ ގްރޫޕްގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ޕީޖީ ޅީޑަރ އަދި އިނގުރައިދޫ ދާއިރާގެ މެންބަރު އިބްރާޙީމް ފަލާހް ވިދާޅުވީ ޕީއެންސީގެ ސުޕަމެޖޯރިޓީ މަޖިލީހުގައި އޮތް ނަމަވެސް، އެ ޕާޓީން އިދިކޮޅު މައިނޯރިޓީ ޕާޓީ، އެމްޑީޕީއަށް މަޖިލިސް ތެރެއިން  ފުރުސަތު ދެއްވާނެ ކަމަށެވެ.

އަޅުގަނޑުމެންގެ މިހާބޮޑު ލަޝްކަރެއް އޮތް ނަމަވެސް ކުރާނެ އެއްކަމެއް، މައިނޯރިޓީގައި މިތިބަ އަޅުގަނޑުމެންގެ އަޚުންނަށް ބޭނުން ގޮތަކަށް، މަސައްކަތް ކުރުމުގެ ފުރުސަތުދޭނަން. އަދި ވޭހާވެސް ބޮޑަށް ކޮމިޓީ ތަކުގަޔާއި މަޖިލިސް ތަޅުމުގައިވެސް ވަކާލާތު ކުރުމާއި ހުރިހާ ކަމެއްގައިވެސް ބައިވެރި ކުރާނެ ކަމުގެ ފުރިހަމަ ޔަގީންކަން އަރުވަން

އިބްރާޙީމް ފަލާހް

މިއަދު ހެނދުނު 9 ޖެހިއިރު، 20 ވަނަ ރައްޔިތުންގެ މަޖިލީހަށް 93 ދާއިރާއަކުން އިންތިހާބުވެވަޑައިގެންނެވި މެމްބަރުން ހުވާކުރައްވާފައިވާއިރު، އޭގެ ތެރެއިން 75 މެންބަރުންނަކީ ވެރިކަން ކުރާ ކޯލިޝަންގެ މައި ޕާޓީ ޕީއެންސީއަށް ނިސްބަތްވާ މެންބަރުންނެވެ.

އައު މަޖިލީހުގައި ސަރުކާރު ކޯލިޝަންގައި ހިމެނޭ އެމްއެންޕީގެ އެއް މެންބަރު، އެމްޑީއޭގެ ދެ މެންބަރުން އަދި ޖޭޕީގެ އެއް މެންބަރު ހިމެނޭއިރު، އިދިކޮޅު މައި ޕާޓީ އެމްޑީޕީއަށް ނިސްބަތްވާ 12 މެންބަރުންނާއި އަމިއްލަ ގޮތުން ވާދަކުރެއްވި 2 މެމްބަރަކު ތިއްބަވާނެއެވެ.

މިއަދު ބޭއްވި މަޖިލީހުގެ ފުރަތަމަ ޖަލްސާގައި މަޖިލީހުގެ ރައީސް ކަމަށް ފޮނަދޫ ދާއިރާގެ ޕީއެންސީ މެމްބަރު އަބްދުއްރަހީމް އަބްދުއްالله އިންތިހާބުކޮށްފައިވާއިރު، ނައިބު ރައީސްގެ މަގާމަށް އިންތިހާބު ކޮށްފައިވަނީ ދިއްގަރު ދާއިރާގެ ޕީއެންސީ މެންބަރު އަހުމަދު ނާޒިމް އެވެ.