ބޭރުގެ ކޮންޓްރެކްޓަރުންގެ ވިތުހޯލްޑިން ޓެކްސް ދެގުނައަށް ބޮޑުކުރުމުގެ ބިލު މަޖިލީހުން ފާސްކޮށްފި

ރާއްޖޭގައި ވަޒަންވެރިނުވާ ބޭރުގެ ކޮންޓްރެކްޓަރުންގެ އަތުން ކޮންސްޓްރަކްޝަން މަޝްރޫޢުތަކާ ގުޅިގެން ނަގާ ވިތުހޯލްޑިން ޓެކްސް ފަސް އިންސައްތައިން 10 އިންސައްތައަށް ބޮޑުކުރުމަށް އާމްދަނީން ޓެކްސް ނެގުމުގެ ޤާނޫނަށް ހުށަހެޅި އިސްލާހު ރައްޔިތުންގެ މަޖިލީހުން މިއަދު ފާސްކޮށްފިއެވެ.

މި އިސްލާހު މަޖިލީހަށް ހުށަހެޅުއްވީ މަތިވެރި ދާއިރާގެ ޕީއެންސީ މެންބަރު ހަސަން ޒަރީރެވެ. މިއަދުގެ ޖަލްސާގައި ނެގި ވޯޓުގައި 54 މެންބަރުން އިސްލާހާ އެއްކޮޅަށް ވޯޓު ދެއްވިއިރު ދެކޮޅަށް ވޯޓު ދެއްވީ ދެ މެންބަރެކެވެ.

ވިތުހޯލްޑިން ޓެކްސަކީ ރާއްޖޭގެ ވިޔަފާރިތަކުން ބޭރުގެ ފަރާތްތަކަށް ދައްކާ ފައިސާއިން އުނިކޮށް ދައުލަތުގެ ޓެކްސް އިދާރާ މީރާއަށް ދައްކަން ޖެހޭ ޓެކްސެކެވެ.

މެންބަރު ޒަރީރު ބިލު ހުށަހަޅުއްވަމުން ވިދާޅުވީ މި ބަދަލު ގެނައުމުގެ ބޭނުމަކީ ބޭރުގެ ކޮންޓްރެކްޓަރުންނާއި ދިވެހި ވިޔަފާރިތަކުގެ މެދުގައި އިންސާފުވެރި އަދި ވާދަވެރި މާހައުލެއް ޤާއިމުކުރުން ކަމަށެވެ.

މީގެ އިތުރުން ރާއްޖޭގައި ދާއިމީ މަރުކަޒެއް މެދުވެރިކޮށް ވަޒަންވެރިނުވާ ފަރާތަކަށް ލިބޭ އާމްދަނީން ވިތުހޯލްޑިން ޓެކްސް ދައްކައިފައިވާ ނަމަ އެ ޓެކްސް ނެގުނު އާމްދަނީއާ ގުޅިގެން ދައްކަން ޖެހޭ ޓެކުހުގެ ފުރިހަމަ އަދަދު ކަމުގައި ބެލެވޭނެ ކަމަށް ބިލުގައި ބަޔާންކޮށްފައިވެއެވެ. އަދި ޓެކްސް ބިނާކުރެވޭ އާމްދަނީ ހިސާބުކުރާއިރު އެ އާމްދަނީ ނުހިމެނޭނެ ކަމަށް ވެސް ބިލުގައި ކަނޑައަޅައިފައިވެއެވެ.

މި އިސްލާހުގެ ސަބަބުން ދައުލަތުގެ އާމްދަނީއަށް އަހަރެއްގެ މައްޗަށް އެވެރެޖުކޮށް 251 މިލިއަން ރުފިޔާ އިތުރުވާނެ ކަމަށް މީރާއިން ލަފާކޮށްފައިވާ ކަމަށް ސަރުކާރުން ބުނެފައިވެއެވެ.