ރައީސް މުޢިއްޒުގެ ދެ ކަނބަލުން ތާޖުމަހަލް އަށް!

ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި އެމަނިކުފާނުގެ އަނބިކަނބަލުން ސާޖިދާ މުހައްމަދު އިންޑިއާއަށް ކުރަމުން ގެންދަވާ ފުރަމާނަ ދަތުރުފުޅުގެ ތެރެއިން ތާޖް މަހަލްއަށް ވަޑައިގެން އެތަން ބައްލަވާލައްވައިފިއެވެ.

އިންޑިއާ ސަރުކާރުން އިން ވަނީ ތާޖް މަހަލްގެ ޕްރައިވެޓް ޓުއާއެއް، ރައީސްގެ ދެކަނބަލުންނަށް ދެއްވައިފައެވެ. އެ ޓުވާގައި ތާޖް މަހަލްގެ އެތެރެ ބެލުމުގެ ފުރުސަތު ވެސް ލިބިގެން ދިޔައެވެ. އަދި އެ އިމާރާތާ އިން ވެގެން ދެ ފަރާތަށް ހުންނަ ފޯޓްތައް ވެސް ވަނީ ދައްކާލާފައެވެ.

މީގެ އިތުރުން ތާޖް މަހަލް ވިޒިޓާސް ބުކްގައިވެސް ރައީސް މުޢިއްޒު ސޮއި ކުރައްވާފައިވާއިރު އެ ދެކަނބަލުންނަށް ހަދިޔާއެއް ގޮތުގައި ތާޖް މަހަލްގެ ރެޕްލިކާއެއްވެސް ވަނީ އަރުވާފައިވެއެވެ.

އިންޑިއާއަށް ކުރައްވާ ދަތުރުފުޅުގެ ތެރެއިން، ރައީސް ޑރ. މުޢިއްޒު ވަނީ އިންޑިއާގެ އިސްވެރިންނާއެކު މަތީ ފެންވަރުގެ ބައްދަލުވުންތަކެއް ބާއްވަވާފައެވެ. މީގެ ތެރޭގައި ބޮޑުވަޒީރު ނަރެންދްރަ މޯދީ، ރައީސް ދްރައުޕަދީ މުރުމު، ނައިބު ރައީސް ޖަގްްދީޕް ދަންކަރު، އަދި ޚާރިޖީ ވަޒީރު ޑރ. އެސް. ޖައިޝަންކަރު ހިމެނެއެވެ.

މި ބައްދަލުވުންތަކުގެ ނަތީޖާއެއްގެ ގޮތުން، ދިވެހިރާއްޖެއާއި އިންޑިއާއާ ދެމެދު ގުޅުމާއި އެއްބާރުލުން އިތުރަށް ހަރުދަނާކުރުމަށް މުހިންމު އެއްބަސްވުންތަކެއްގައި ސޮއިކުރެވުނެވެ. މީގެ އިތުރުން، އިންޑިއާގެ އެހީގައި ހިންގުނު އެތައް މަޝްރޫޢުތަކެއް ދިވެހި ސަރުކާރާ ރަސްމީކޮށް ޙަވާލުކުރެވުނެވެ.

ރައީސް މުޢިއްޒުގެ މި ދަތުރުފުޅަކީ ރައީސް މުރުމުގެ ދައުވަތަކަށް ކުރައްވާ ދަތުރުފުޅެކެވެ.