ރީތިފަރު ރިސޯޓް ލޯންޗަކަށް ރާޅެއް އަރައި އަޑިއަށް ހިނގައްޖެ

ރާއްޖެއަަށް ކުރަމުންދާ ވިއްސާރައިގައި، ރ. އަތޮޅު ރީތިފަރު ރިސޯޓްގައި ދުއްވާ ލޯންޗަކަށް ރާޅެއް އަރައި އެ ލޯންޗް، މިއަދު އަޑިއަށް ހިނގަތްޖެއެވެ.

ރީތިފަރު ރިސޯޓް ޖެޓީ ކައިރީ އަޅާފައި އޮތް މި ލޯންޗު އަޑިއަށް ދިޔައީ ލޯންޗަށް ރާޅެއް އެރުމުގެ ސަބަބުން ލޯންޗު ބަންޑުން ޖަހާލައިގެންނެވެ. އެއާއެކު ލޯންޗުގެ ބޮޑުބައި ވަނީ އަޑިއަށް ގޮސްފައެވެ.

ނަމަވެސް ހާދިސާގައި އެއްވެސް މީހަކަށް ގެއްލުމެއް ލިބިފައެއް ނުވާ ކަމަށް މައުލޫމާތު ލިބެއެވެ.

އަދި ލޯންޗް މައްޗަށް ނެގުމުގެ މަސައްކަތް މިހާރު ދަނީ ކުރަމުންނެވެ.

ރ އަތޮޅުގެ ރިސޯޓެއްގައި އަޅާފައި އޮތް ލޯންޗެއް އަޑިއަށް ދިޔަ އިރު މެޓް އޮފީހުން ވަނީ ރ އަތޮޅުން ވ އަތޮޅަށް ރީނދޫ ސަމާލު ނެރެފައެވެ.

އެ ސަރަހައްދަށް ގަޑިއަކު 28 މޭލާއި 35 މޭލާ ދެމެދަށް ވައިޖެހި، ވިލާގަނޑުގައި ގަޑިއަކު 55 މޭލަށް ވައިގަދަވާނެ ކަމަށް ލަފާކޮށްފައިވެއެވެ. އަދި، ކަނޑުތައް ވެސް ވަރަށް ގަދަވާނެތީ އެ އިދާރާއިން ވަނީ ސަމާލުވާން އިލްތިމާސްކޮށްފައެވެ.