ޗައިނާގެ ފޮރިން މިނިސްޓަރާ ރައީސް މުޢިއްޒު ބައްދަލުކުރައްވައިފި

ޗައިނާގެ ފޮރިން މިނިސްޓަރާ ރައީސް ޑރ.މުޢިއްޒު ބައްދަލުކުރައްވައިފިއެވެ.

ސީޕީސީގެ ސެންޓްރަލް ކޮމިޓީގެ ޕޮލިޓިކަލް ބިއުރޯގެ މެންބަރ އަދި ޗައިނާގެ ސެންޓްރަލް ކޮމިޝަން ފޯ ފޮރިން އެފެއާޒްގެ އޮފީހުގެ ޑިރެކްޓަރ ވާންގް ޔީއާ ރައީސް ޑރ. މުޙައްމަދު މުޢިއްޒު ބައްދަލުކުރެއްވީ އދ. ގެ އާންމު މަޖިލީހުގެ ބައްދަލުވުންތަކުގެ ތެރެއިންނެވެ.

މި ބައްދަލުވުމުގައި ރައީސް މުޢިއްޒު ވަނީ ޗައިނާގެ ގުޅުން ރާއްޖެއަށް މުހިންމުކަމާއި، ދެ ގައުމުން އެއްބަޔަކު އަނެއްބަޔަކަށް އިސްކަންދޭ މިންވަރު ފާހަގަކުރައްވާފައެވެ. އަދި މިހާރު ދެ ގައުމުގެ ދެމެދުގައި ވެފައިވާ އެއްބަސްވުންތަކާއި ކުރިއަށްގެންދާ މަޝްރޫޢުތަކާ ގުޅޭގޮތުންވެސް މަޝްވަރާކުރެއްވިއެވެ. ހަމައެއާއެކު، ރާއްޖޭގެ ފަތުރުވެރިކަމުގެ ދާއިރާއަށް ޗައިނާއިން ދެއްވާ އެހީތެރިކަމަށް ރައީސް ޝުކުރު އަދާކުރެއްވިއެވެ.

ވާންގް ޔީވެސް ވަނީ ޗައިނާއިން ރާއްޖެއަށް ފަތުރުވެރިކަމާއި އެހެނިހެން ދާއިރާތަކުން އެއްބާރުލުން ދޭނެކަމުގެ ޔަގީންކަން އަރުވާފައެވެ. މީގެއިތުރުން، މޫސުމަށް އަންނަ ބަދަލުތަކާއި އެ މައްސަލަތައް ޙައްލުކުރުމަށް ދެމެހެއްޓެނިވި ގޮތެއްގައި އެއްބާރުލުން ދިނުމުގެ މުހިންމުކަމާ ގުޅޭގޮތުންވެސް ދެ ބޭފުޅުން މަޝްވަރާކުރެއްވިކަމަށް ރައީސް އޮފީހުން ހާމަކުރިއެވެ.

ޗައިނާއަކީ ރާއްޖޭގެ ތަރައްޤީގެ މުހިންމު ބައިވެރިއެކެވެ. މިގޮތުން، ސިނަމާލެ ބްރިޖާއި ފްލެޓްތައް އިމާރާތްކުރުމާއި ބައެއް ރަށްރަށުގައި މަގު ހެދުން ފަދަ ބޮޑެތި މަޝްރޫޢުތަކުގައި ޗައިނާއިން ވަނީ އެހީތެރިކަން ފޯރުކޮށްދީފައެވެ.

މި ބައްދަލުވުމާ ގުޅިގެން ދެ ގައުމުގެ ގުޅުން އިތުރަށް ހަރުދަނާވެގެންދާނެ ކަމަށް ބެލެވެއެވެ.