އަލިފާނުގެ ހާދިސާގައި ފުލުހުން ދެއްކި ނަމޫނާއަށް ސީޕީ ތައުރީފު ކުރައްވައިފި
އިއްޔެ މެންދުރު ހ.ޓެންސްޓަރ ގޭގެ ތިން ވަނަ ފަންގިފިލާގައި ހިނގި އަލިފާނުގެ ހާދިސާގައި ހަރަކާތްތެރިވި ފުލުހުން ދައްކާފައިވާ ނަމޫނާއަށް ކޮމިޝަނަރ އޮފް ޕޮލިސް މުޙައްމަދު ހަމީދު ތަޢުރީފު ކުރައްވައިފިއެވެ.
މިއަދު އިސްކަންދަރުކޮށީގައި ކުރިއަށް ގެންދިޔަ ބައްދަލުވުމުގައި ސީޕީ މުހައްމަދު ހަމީދު ދެއްކެވި ވާހަކަފުޅުގައި ފުލުހުންނަކީ އަބަދުވެސް ރައްޔިތުންގެ ސަލާމަތާއި ރައްކާތެރިކަމަށް ތިބެންޖެހޭ ބައެއް ކަމަށާއި، އަބަދުވެސް ފުލުހުން ތިބެންވާނީ ރައްޔިތުންގެ ފުރާނަޔާއި މުދަލާއި ގެދޮރު ރައްކާތެރި ކުރުމަށް ތައްޔާރަށްކަމަށް ވިދާޅުވިއެވެ.
މީގެއިތުރުން އިއްޔެ ހިނގި އަލިފާނުގެ ހާދިސާގައި ފުލުހުން ދައްކައިދީފައިވާ ނަމޫނާ އުފަލާއެކު ބަލައިގަންނަ ކަމަށާއި ކުރިއަށް އޮތްތަނުގައިވެސް، މިފަދަ ކޮންމެ ދަނޑިވަޅެއްގައި ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމަށް ކުރަންޖެހުނު ކޮންމެ ކަމެއް ކުރުމުގައިވެސް ފަސްނުޖެހި ކުރިއަށް ދިއުމަށް ކޮމިޝަނަރ އޮފް ޕޮލިސް އެދިލެއްވިއެވެ. އަދި އިއްޔެ ހިނގި އަލިފާނުގެ ހާދިސާގައި ފުލުހުން ދައްކައިދިން ހިތްވަރާއި ނަމޫނާއަށް އައްސަރިބަހާ ސާބަސް ރައްދު ކުރައްވާކަމަށްވެސް ކޮމިޝަނަރ އޮފް ޕޮލިސް ވިދާޅުވިއެވެ..
މި ބައްދަލުވުމުގައި އިއްޔެ ހިނގި އަލިފާނުގެ ހާދިސާ ކޮންންޓްރޯލް ކުރުމުގައި ހަރަކާތްތެރިވި ފުލުހުންގެ އިތުރުން ފުލުހުންގެ އެގްޒެކެޓިވް އޮފިސަރުންނާއި ސެންޓްރަލް ޕޮލިސިންގ ކޮމާންޑްގެ އިސްވެރިން ބައިވެރިވެވަޑައިގެންފައިވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
