ގަނާކޮށް އަނިޔާކުރާއިރު، ގިޔާމަތްދުވަހުން ތިމާގެ ގުނަވަންތައް އެކަމަށް ހެކިވާނެކަން ވިސްނަންޖެހޭ: އިބްރާހިމް މެންކު

އެހެން މީހުންނަށާއި ކުދިންނަށް ގަނާކޮށް ނުވަތަ ބުލީކޮށް އަނިޔާކުރާއިރު، ގިޔާމަތްދުވަހުން ތިމާގެ ގުނަވަންތައް އެކަމަށް ހެކިވާނެކަން ވިސްނަންޖެހޭ ކަމަށް އައްޝެއިޚް އިބްރާހިމް މެންކު ވިދާޅުވެއްޖެއެވެ.

ދާރިސް ޓީވީން ގެނެސްދޭ “ވިތް އިބްރާހިމް މެންކް” ޕްރޮގްރާމްގައި، ގަނާ ކުރާ ފަރާތްތަކަށް ދޭނެ މެސެޖެކާއި ގުޅެޭގޮތުން ކުރެވުނު ސުވާލަށް ޖަވާބު ދެއްވަމުން ޝެއިޚް އިބްރާހިމް މެންކު ވިދާޅުވީ، ޤިޔާމަތް ދުވަހުން އެމީހެއް ކުޅަ އަމަލުތަކަށް ހެކިވާނޭ އެމީހެއްގެ ގުނަވަންތައް ކަން މާތް الله ސުބުހާނަހޫ ވަހީ ކުރައްވާފައިވާ ކަމަށެވެ. އަދި އެދުވަހުން އެއްވެސް މީހަކަށް ދޮގު ނުހެދޭނެ ކަމަށްވެސް ވިދާޅުވިއެވެ.

ތިމާ އަނެކާއަށް ތިޔަ ބުލީ ކުރާ ކުރުމާއި ގުޅޭގޮތުން މާތް الله ސުބުހާނަހޫ ވަތަޢާލާގެ ހަޟުރަތުގައި ޖަވާބުދާރީވާންޖެހޭ ކަން އެނގެންވާނެ. އެދުވަހުން ތިމާގެ ދުލުން ދޮގެއް ނުހެދޭނެ. އެދުވަހުން، ތިމާ އެ އަތަކުން އަނެކާގައި ޖަހާ އަތް ވާހަކަ ދައްކާނެ. ތިމާގެ ފައި ވާހަކަ ދައްކާނެ. އެހެންވީމާ އެކަމާމެދު ވިސްނަންޖެހޭ. ތިމާ الله ސުބުހާނަހޫ ވަތަޢާލާގެ ކުރިފުޅުމަތީގައި ހުންނަންޖެހޭނެކަން ވިސްނާލާ. ތިމާގެ ޢަމަލުތަކާއިމެދު ޖަވާބުދާރީ ވާންޖެހޭނެ

ޝެއިހް އިބްރާހީމް މެންކު

މީގެ އިތުރުން، ޝެއިޚް އިބްރާހިމް މެންކު ވިދާޅުވީ، ގަނާ ކުރާ މީހާވެސް އުއްމީދު ކަނޑާލައިގެން ނުވާނެ ކަމަށެވެ. އަދި އޭނާއަށް އެ ކުރެވުނު އަމަލާއިމެދު ހިތާމަކޮށް، އަނިޔާ ލިބުނު މީހާގެ ކިބައިން މާޢާފަށް އެދި، މާތް الله ސުބުހާނަހޫ ވަތަޢާލާގެ ހަޟުރަތުގައިވެސް އެ ފާފަ ފުއްސަވައި އެމީހަކަށް އަފޫ ކޮށްދެއްވުމަށް އެދި ދުޢާ ކުރަންވާނެ ކަމަށް ވިދާޅުވިއެވެ.

އެ ހާދިސާގެ ފަހުންވެސް، ބުލީ ކުރާ މީހާއަށްވެސް ދިރިއުޅުމާއިގެން ކުރިއަށް ދެވޭނެ. އެހެންވީމާ އޭނާވެސް، الله ސުބުހާނަހޫ ވަތަޢާލާ އެންގެވި މަގަށް ރުޖޫޢަވާށޭ

ޝެއިހް އިބްރާހީމް މެންކު

ޝެއިހް އިބްރާހީމް މެންކު ވިދާޅުވި ގޮތުގައި އިސްލާމް ދީނުގެ ރީތި ކަމާއި ފުރިހަމަ ކަން އެކަމުން އެނގިގެންދާ ކަމަށެވެ. މި ދީނުގައި، އަނިޔާ ކުރާ މީހާއަށްވެސް، ތައުބާވެ، ތިމާގެ ދިރިއުޅުން އިސްލާހުކޮށް، ރަނގަޅު މުސްލިމަކަށްވެ، މުޖުތަމަޢުއަށް ޚިދުމަތް ކުރުމުގެ ފުރުސަތު ވަނީ ފަހިކޮށްދީފައިވާ ކަމަން ޝެއިޚް ފާހަގަކުރެއްވިއެވެ.

އެހެންކަމުން، ވަގުތު ފާއިތުވުމުގެ ކުރިން އިސްލާހުވެ ހެޔޮ މަގަށް ރުޖޫއުވުމަށް ޝެއިޚްވަނީ ނަޞޭހަތްތެރިވެފައެވެ.