ތަކެތީގެ އަގުތައް މިދާވަރުން އުފުލިގެން ދާނަމަ ހައިޕާ އިންފްލޭޝަނަކަށް ގޮސްދާނެ: ރައީސް ނަޝީދު

ބާޒާރުގައި ތަކެތީގެ އަގުތައް މިދާވަރުން އުފުލިގެންދާދިއުން ތަކުރާރުވަމުން ދާނަމަ ހައިޕާ އިންފްލޭޝަނަކާ ދިމާލަށް ހިނގައިދާނޭކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ރައީސް ނަޝީދު ވިދާޅުވީ، ބާޒާރުގައި ގިނަ ބާވަތްތަކުގެ މުދަލުގެ އަގު ހިފެހެއްޓިފަ ހުރިނަމަވެސް އަގުތައް މައްޗަށްދާ މުދަލުގެ ބާވަތްތައް ނިސްބަތުން ގިނަކަމަށެވެ. އެގޮތުން އާންމު ބޭނުންތަކުގައި ބޭނުންކުރާ މުދަލުގެ އަގުތައް މައްޗަށްދާކަން ރައީސް ނަޝީދު ފާހަގަކުރެއްވިއެވެ.

ނަޝީދު ވިދާޅުވީ ބާޒާރުގައި ތަކެތީގެ އަގުތައް މައްޗަށްދާ ބައިވަރު ސަބަބުތައް އެބަހުރިކަމަށެވެ. އެގޮތުން ބަނދަރުތައް ނުހެދި އެތަންތަނުން ދަތިހާލުގައި މުދާ އަރުވާ ބާލަންޖެހުމަކީވެސް މުދަލުގެ އަގުތައް މައްޗަށްދާ އެއް ސަބަބުކަން ނަޝީދު ވިދާޅުވިއެވެ.

ކަޅު ބާޒާރުގައި ޑޮލަރެއް ލިބޭ އަގު 22 ރުފިޔާ އާ ހިސާބަށް ހިނގައްޖެކަމަށާއި، މިގޮތަށް ޑޮލަރުގެ އަގު އުފުލުމާއެކު ތަކެތީގެ އަގުތައް މައްޗަށްގޮސް އެންމެފަހުން ބައްދަލުކުރާނީ ހައިޕާ އިންފްލޭޝަނަކާކަން ރައީސް ނަޝީދު ވިިދާޅުވިއެވެ.

ހައިޕާ އިންފްެލޭޝަން އުފެދޭ ޤައުމުތަކުގައި ވަރަށް އުނދަގޫވާނެ އިގްތިސޯދު ދެމެހެއްޓަންވެސް. އަދި ރައްޔިތުންގެ އާންމު ހާލަތާ ރައްޔިތުންގެ ތަނަވަސްކަން ހިފެހެއްޓަން. އަޅުގަނޑުމެންގެ ކަންބޮޑުވުމަކީ މި ދިވެހިރާއްޖޭގެ އިގްތިސޯދު މިދާ މިޝްރާބުން ދިވެހީންނަށް ދިމާވެދާނެ ގޮތެއް

ކުރީގެ ރައީސް މުހައްމަދު ނަޝީދު

ނޫސްވެރިންގެ ބައްދަލުވުމުގައި ރައީސް ނަޝިދު ވަނީ ކުރިއަށް މިއޮތް ދުވަސްތަކުގައި ޑޮލަރުގެ އަގު ކޮންމެހެންވެސް ދަށްކުރަންޖެހޭކަ ފާހަގަކުރައްވާފައެވެ. އެގޮތުން ކުރިއަށް މިއޮތް އެއްމަސްދުވަހުގެ ތެރޭގައި ޑޮލަރުގެ އަގު 17 ރުފިޔާއަށް ތިރިކުރަންޖެހޭކަމަށް ވިދާޅުވިއެވެ. އެމްޑީޕީން މާދަމާ ރޭ ބާއްވާ މުޒާހަރާގެ އެންމެ ބޮޑު އެއް ޑިމާންޑަކީވެސް ޑޮލަރުގެ އަގު ދަށްކުރުންކަމަށް ރައީސް ނަޝީދު ވިދާޅުވިއެވެ.

ހައިޕާ އިންފްލޭޝަނަކީ އެ ޤައުމެއްގެ ފައިސާގެ އަގު ހައްދުން ނެއްޓިދާވަރަށް އަގު ދަށްވެ، މުދަލާއި ހިދުމަތުގެ އަގުތައް އިންތިހާއަށް އުފުލުމެވެ.

ޑޮލަރުގެ އަގު ތިރިކުރަން ޖެހޭކަމަށް ރައީސް ނަޝީދު ވިދާޅުވިއިރު ޑޮލަރު ގަނެވިއްކާ ރަސްމީ ރޭޓަށް އެންމެ ފުރަތަމަ ބަދަލުގެނެސްފައިވަނީ ރައީސް ނަޝީދުގެ ވެރިކަމުގައި 2011 ވަނަ އަހަރުގެ އޭޕްރިލްމަހުގެ ފުރަތަމަ ހަފްތާގައެވެ. އޭރު ޑޮލަރުގެ ރަސްމީ ރޭޓް ކަމަށްވާ 12.80 ގައި ހުރި އަގު ވަނީ 15.42 އާއި 10.28 އާ ދެމެދުގެ އަގަކަށް ދޫކޮށްލާފައެވެ.

އޭރު ރައީސް ނަޝީދު ވިދާޅުވީ ކޮންމެ ޑޮލަރެއްގެ ފަހަތުގައި ފުުހަކު ބަހައްޓައިގެން ނަމަވެސް ޑޮލަރުގެ އަގު ދަށްކުރާނޭކަމަށެވެ. ނަމަވެސް ކުރިންވެސް އަދި އޭގެ ފަހުން މިއަދާހަމަޔަށް އާއިރުވެސް ޑޮލަރުގެ އަގު ދަށަށްގޮސްފައިނުވާކަން ފާހަގަކޮށްލެވެއެވެ.