މިދިޔަ މަހު އެހީގެ ގޮތުގައި ޒަކާތު ހައުސް އިން 7 ލައްކަ އަށް ވުރެ ގިނަ ރުފިޔާ ހޭދަކޮށްފި

ރާއްޖޭގައި ޒަކާތާ ގުޅޭ ކަންކަން ކުރިއަށްގެންދަން އުފެއްދި "މޯލްޑިވްސް ޒަކާތު ހައުސް" އިން، މިއަހަރުގެ ފެބްރުއަރީ މަހު އެހީގެ ގޮތުގައި 7 ލައްކަ އަށް ވުރެ ގިނަ ރުފިޔާ ހޭދަކޮށްފިއެވެ.

ޒަކާތު ހައުސް އިން ބުނީ ފެބްރުއަރީ މަހު ދޫކުރެވިފައިވާ އެހީގެ ތެރޭގައި ޖަނަވަރީ މަހު ވެސް އެހީ ދޫކުރެވުނު ފަރާތްތައް ހިމެނޭ ކަމަށެވެ.

ޒަކާތު ހައުސް އިން ހާމަކުރި އެއިދާރާގެ ތަފާސް ހިސާބުތަކަށް ބަލާއިރު، ޒަކާތު ހައުސް އިން މައިގަނޑު ތިން ކަމަކަށް ވަނީ އެހީދީފައެވެ. އެއީ ފަޤީރުންނާއި މިސްކީނުންނަށް ބޭސްފަރުވާގެ އެހީ، ޟަރޫރީ އެހީ އަދި އެ އިދާރާއިން އެހެނިހެން ކަންކަމަށް ހިނގާފައިވާ ޚަރަދެވެ.

ފަޤީރުންނާއި މިސްކީނުންނަށް ބޭސްފަރުވާގެ އެހީގެ ގޮތުގައި ޒަކާތު ހައުސް އިން ދޫކުރުމަށް ހަމަޖެހިފައިވާ އަދަދަކީ 829،948.10 ރުފިޔާ އެވެ. މިއަދަދުގެ ތެރެއިން އެއިދާރާއިން 69 ފަރާތަކަށް އެހީގެ ގޮތުގައި ޖުމްލަ 740،805.79 ރުފިޔާ ވަނީ ހޭދަކޮށްފައެވެ.

މިގޮތުން ފަޤީރުންނާއި މިސްކީނުންނަށް ދީފައިވާ ބޭސްފަރުވާގެ އެހީގައި:

1) ކެންސަރު ފަރުވާ- 245،948.50 ރުފިޔާ

2) ހިތުގެ އޮޕަރޭޝަން- 16،962 ރުފިޔާ

3) ޓްރާންސްޕްލާންޓް- 76،329 ރުފިޔާ

4) ސިކުނޑީގެ އޮޕަރޭޝަން- 16،962 ރުފިޔާ

5) އެހެނިހެން- 473،746 ރުފިޔާ

ޟަރޫރީ އެހީގެ ގޮތުގައި އެ އިދާރާއިން 7،200 ރުފިޔާ ހޭދަކުރުމަށް ހަމަޖެހިފައިވާއިރު، މިކަމަށްޓަކައި ޖުމްލަ 12،750 ރުފިޔާ ދޫކޮށްފައިވާ ކަމަށް އެއިދާރާގެ ތަފާސްހިސާބު ތަކުން ދައްކައެވެ.

މީގެ އިތުރުންވެސް އެއިދާރާއިން އިސްލާމް ދީން ކުރިއެރުވުމަށާއި، ދީނީ ހޭލުންތެރިކަން އިތުރުކުރުމަށް ހިންގޭ ތަފާތު ޕްރޮގްރާމް ތަކަށް ވެސް އެހީގެ ގޮތުގައި ފައިސާ ދޫކޮށްފައެވެ. އެގޮތުން ޖަލްސާ އަދި ސެމިނަރ ފަދަ ކަންތަކަށް 93،761.61 ރުފިޔާ ދޫކޮށްފައިވާއިރު، ދީނީ އެކި އެކި ޕްރޮގްރާމްތައް ހިންގުމަށް 374،950.28 ރުފިޔާ ވަނީ ދޫކޮށްފައެވެ

ހަމަމިއާއިއެކު، ތަފާސްހިސާބުތައް ދައްކާގޮތުން ޒަކާތުގެ މަަސައްކަތް ކުރުމަށް ޒަކާތު ފަންޑުން މުސާރަ ދޭ ގޮތަށް ނަގާފައިވާ މުއައްޒަފުންގެ އުޖޫރަ ދިނުމަށް ޢާމިލުންގެ ބައިން 192،432.81 ރުފިޔާ ވަނީ ޚަރަދުކޮށްފައެވެ.

މިދިޔަ ޖެނުއަރީ މަހުގެ ކުރީކޮޅު އިފްތިތާހް ކުރެވިގެން ދިޔަ ޒަކާތު ހައުސް ގެ މަސައްކަތްތަކުގެ ތެރޭގައި ޒަކާތް ބަލައިގަތުމުގެ އިންތިޒާމު ހަމަޖެއްސުމާއި، ޒަކާތް ޙައްޤުވާ ފަރާތްތަކަށް ޒަކާތް ދޫކުރުމުގެ އިންތިޒާމުތައް ހަމަޖެއްސުން ހިމެނެ އެވެ. މީގެ އިތުރުން ކޮންމެ ހަ މަހަކުން އެއްފަހަރު މުދަލު ޒަކާތުގެ ނިޞާބު އިޢުލާނުކުރުމާއި، ކަމާބެހޭ އިދާރާތަކާ ގުޅިގެން، ފަޤީރުންނާއި މިސްކީނުންގެ ދަފުތަރު އެކުލަވައިލައި އަދާހަމަކޮށް ބެލެހެއްޓުމުގެ މަސައްކަތްވެސް ހިމެނެއެވެ.