ރަމަޟާން މަހަށް އެމްޓީސީސީ، ފެރީ އަދި ބަސް ދަތުރުތަކުގެ ގަޑިތަކަށް ބަދަލުގެނެސްފި

ކުރިއަށް އޮތް ރޯދަ މަހު އެމްޓީސީސީން ދެމުންދާ ފެރީގެ ޚިދުމަތްތަކާއި، މާލެ ސަރަހައްދުގައި ދޭ ބަހުގެ ހިދުމަތުގެ ގަޑިތަކަަށް ބަދަލު ގެނެސްފިއެވެ.

އެގޮތުން، އެމްޓީސީސީން މިއަދު އެކްސްގައި ކުރި ޕޯސްޓެއްގައި ވަނީ އަންނަ ހޮނިހިރު ދުވަހުން ފެށިގެން ރޯދަ މަސް ނިމެންދެން އެ ކުންފުނިން ދޭ ބަހާއި ފެރީގެ ހިދުމަތްތުގެ ޝެޑިއުލަށް އަންނާނެ ބަދަލުތައް އިއުލާނުކޮށްފަ އެވެ.

އެގޮތުން، މާލެ އާއި ހުޅުމާލެ ފޭސް 1 އަދި ފޭސް 2 އާ ދެމެދު ދޭ އާރުޓީއެލް ބަހުގެ ހިދުމަތް ފަށާނީ ހެނދުނު 7 ޖަހާއިރު ކަމަށެވެ. އަދި ރޯދަ ވީއްލާ ވަގުތަށް ހަވީރު 5 ޖަހާއިރު ހިދުމަތް މެދުކަނޑާލުމަށްފަހު، ދެން ދަތުރުތައް ފަށާނީ ރޭގަނޑު 7:20ގައި ކަމަށް ބުނެފައިވެއެވެ. މި ދަތުރުތައް ރޭގަނޑު 12 ޖެހުމާ ހަމައަށް ކުރިއަށް ގެންދާނެ ކަމަށް އެމްޓީސީސީން ބުނެފައިވެއެވެ.

މީގެ އިތުރުން، މާލެ ތެރޭގައި، ދަތުރުތައް ވެސް ފަށާނީ ހެނދުނު 7 ޖަހާއިރު ކަމަށާ، ރޯދަ ވީއްލާ ވަގުތަށް ހަވީރު 6 ޖަހާއިރު ހިދުމަތް މެދުކަނޑާލުމަށް ފަހު، ރޭގަނޑު 9 ޖަހާއިރު އަލުން ދަތުރުތައް ފަށައި 12 ޖަހަންދެން ހިދުމަތް ދޭނެ ކަމަށް އެމްޓީސީސީން ބުންޏެވެ.

ބަހުގެ ޚިދުމަތުގެ އިތުރުން، އެމްޓީސީސީން އަންނަނީ، 20 އަތޮޅެއްގައި 6 ޒޯނަކަށް ބަހާލައިގެން 68 ރޫޓުން ފެރީގެ ޚިދުމަތްވެސް ދެމުންނެވެ. އަދި ފެރީ މެދުވެރިކޮށް މުދާ އުފުލުމުގެ ކަންކަންވެސް ކުރިއަށް ދާތީ، ވީހާ ވެސް ބޮޑަށް ރައްޔިތުންނަށް ލުއި ފަސޭހަވާނެހެން ރޯދަމަހު އެ ހިދުމަތް ދިނުމަށް މަސައްކަތް ކުރާ ކަމަށް އެމްޓީސީސީން ބުނެއެވެ.

އެގޮތުން، ރޯދަ މަހުގެ ދަތުރުތައް ރާވާފައިވަނީ ކޮންމެ ރޫޓެއްގެ އެންމެ ފަހު ދަތުރު އިރުއޮއްސުމުގެ ކުރިން ނިމޭ ގޮތަށް ކަމަށާ، ރޯދަ މަހުގެ އެއްވެސް ހުކުރެއްގައި ފެރީ ދަތުރުތަކެއް ނޯންނާނެ ކަަމަށް ބުނެފައިވެއެވެ.

ފެރީ ދަތުރުތަކާއި ބަސް ދަތުރުތަކުގެ ތާވަލް އެމްޓީސީސީގެ ވެބްސައިޓުން ފެންނާނެ އެވެ.