ބްރޯ ބޭނުމީ ޕްރައިމެރީ ކާމިޔާބުކޮށް އެމްޑީޕީއަށް މޭޔަރު ގޮނޑި ކާމިޔާބުކޮށްދިނުން!

އަންނަ އަހަރުގެ އެޕްރީލް މަހުގެ ތެރޭގައި ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބުގެ ފޯރި މިވަނީ ވަރަށް ގަދަވެފައެވެ. ލާމަރުކަޒީ ގާނޫނަށް ގެނެވުނު ބޮޑެތި އިސްލާހުތަކަކާއި އެކު ކައުންސިލްތަކުގެ ބާރުވެރިކަން މިވަނީ އިތުރުވެފައެވެ. މިގޮތުން އެންމެ ބޮޑެތި އިމްތިޔާޒުތަކާއި ޒިންމާާތަކެއް ލިބިގެންދާ އެއް ކައުންސިލަކަށް ވެގެންދާނީ މާލޭ ސިޓީ ކައުންސިލެވެ.

މާލޭ ސިޓީގެ މޭޔަރކަމުގެ މަގާމަށް ގިނަބަޔަކު ފައިނަގާފައިވާއިރު، އޭ ރޭހުގެ ތެެރެއަށް މިވަނީ އިތުރު ފަރާތެއް ގުޅިފައެވެ. ހ.ދޫހިމެރިގެ އިބްރާހިމް ރަޝީދު މޫސާ ނުވަތަ އާންމު ނަމުންނަމަ ބްރޯ ރަޝީދު މިވަނީ މާލެ ސިޓީގެ މޭޔަރެއް ހޮވުމަށް ބާއްވާ އެމްޑީޕީގެ ޕްރައިމަރީއެއްގައި ވާދަކުރުމަށް ނިންމާފައެވެ.

ބްރޯ ރަޝީދުގެ ސިޔާސީ ހަޔާތް ފެށިފައިވަނީ މާާފުށި ޖަލުގައި ވަރަށް އަނިޔާވެރިކަމާއި އެކު އީވާން ނަސީމް މަރާލި ހިސާބުންނެވެ. އޭނާ ވަނީ އެމަރާއި ގުޅިގެެން އިންސާފަށް އެދި މަގުމައްޗަށް ނުކުމެ އަޑު އުފުލާފައެވެ. އަދި އެއަށްފަހު އެމްޑީޕީގެ ހަރަކާތްތަކުގެ އިސް ސަފުން އޭނާ ފެނިފައިވާއިރު، މިދިޔަ އަަހަރުގެ ފެބްރުއަރީ މަހުގެ އެއްވަނަ ދުވަހު ސުޕްރީމް ކޯޓުން ނެރުނު ހުކުމާާއި ގުޅިގެން ކުރެވުނު މުޒާހަރާއެއްގައި އޭނާ ޖަލަށް ލެވުނެވެ. އެގޮތުން އެމްޑީޕީން ސިލްސިލާ ގޮތެއްގައި ކުރެވުނު މުޒާހަރާތަކުގައި ބުރޯރަޝީދު ބައިވެރިވަމުން ދަނިކޮށް ފެބްރުއަރީ 16 ވަނަދުވަހުގެ ރޭގަނޑު މަޖީދީމަގާއި ޗާންދަނީމަގު ހަތަރުއަނގޮޅި ކަންމަތިން ހައްޔަރުކޮށް ދޫނިދޫ ޖަލުގައި ބަންދުކުރިއެވެ.

ޖަލުގެ ތޭރިތަކުގެ ތެރޭގައި ހުރެ ދެވަނަ ދުވަހު އޭނާ ބަނޑުހައި ހޫނުކަމުގެ ހަޅުތާލުފެށިއެވެ. މިގޮތަށް ހަތް ވަނައަށް ވީ ދުވަހު ބްރޯ ރަޝީދު ވަނީ އިތުރަށް މުޒާހަރާާއަށް ނުދިއުމަށް ޝަރުތުކޮށް ޖަލުން މިނިވަންކުރެވިފައެވެ. މީގެ ކުރިން ސިފައިންގޭގައިވެސް ވަޒީފާ އަދާކުރެއްވި ބްރޯ ރަޝީދު ވަނީ 3 ނޮވެމްބަރު 1988ގެ އުދުވާނީ ހަމަލާގައި ސިފައިންގެ ދިފާއުކުރެއްވުމަށް ހަރަކާތްތެރިވެލައްވާފައެވެ. މީގެ އިތުރުން އޭނާ ވަނީ ފިލްމީ ދާއިރާގައި އެކި ސިފައިގައި ހަރަކާތްތެރިވެލައްވާފައެވެ.

ވޮއިސްއަށް މައުލޫމާތުދެމުން ބްރޯ ރަޝީދު ބުނީ އޭނާ ހޮވަން ޖެހެނީ ދީނީ، ހިންގުންތެރި،  ތަޢުލީމީ އަދި ޤާބިލް ފަރާތަކަށް ވާތީއެވެ. އޭނާ ވަނީ މާލޭ ސިޓީގެ މޭޔަރކަމަށް ހޮވިއްޖެނަމަ ކުރާނެ ގިނަ ކަންތައްތަކެއްވެސް ވޮއިސްއަށް ހިއްސާކުރައްވާފައެވެ. އޭގެ ތެރޭގައި ހިމެނެނީ:

1. ހައްޤު މިންވަރު ޔަޤީން ކުރުމަށް، ރިސާޗަކާއި އެކު މާާލޭގެ ރައްޔިތުންނަށް ގޯތި ހޯދައިދިނުން.

2. އެޖެންޑާ 19 ތަންފީޒު ކުރުމަށް، ލާމަރުކަޒީރާއްޖޭގެ ވެރިރަށުގެ އުފާފާގަތިކަން އެންމެހާ ދިވެހި ރައްޔިތުންންށް ހޯދާދިނުން.

3. ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ރިޔާސީވައުދުތައް ތަންފީޒު ކުރުމަށް މާލެވަށައިގެން ހިނގޭގޮތަށް ފަރުމާކޮށް ތައްޔާރުކުރެވޭ ރިންގް ރޯޑް ޤާއިމްކުރުން، މާލޭގެ 8 ސަރަހައްދެއްގައި 15 ބުރީގެ ޕާކިން ބިލްޑިން 3 އަހަރުގެ ތެރޭގައި އެޅުން، މާލޭގައި ޓްރެފިކް ބްލޮކްވާ 4 އަނގޮޅިތަކުގައި ފްލައިއޯވާ އަޅާ ޓްރެފިކް މައްސަލަތަކަށް ހައްލުހޯދަދިނުން.

4. މާލެ ފެހި ކުރުމަށް، އެއްމިލިއަން ގަސްއިންދާ މާލެ ސަރަހައްދަކީ ފެހި ފިނި ސިޓީއަކަށް ބަދަލުކުރުން.

5. މާލެ ސިޓީއަކީ ހިނގާބިނގާވެ އުޅުމަށް ފަސޭހަ ސިޓީއަކަށް ބަދަލުކުރުމާއި ރައްޔިތުން ހިންގާބިންގާވެ އުޅުމަށް އަހުލުވެރި ދުޅަހެޔޮ މުޖުތަމައެއް ބިނާކުރުން، ދަމަނަވެށީގެ ނަމުގައި ހިންގާ މާލޭ ސިއްޙީ މަރުކަޒު 24 ގަޑިއިރަށް ބަދަލުކޮށް ޖާގައާއި ޚިދްމަތުގެ ފެންވަރު ރަނގަޅުކޮށް އިތުރު ޚިދްމަތް ލިބޭނެގޮތް ހެދުމަށް. މާލެ ރައްޔިތުންގެ ދުޅަހެޔޮޖީލެއް ބިނާކުރުން.

6. ކަރަންޓުގެ އަގުހެޔޮކުރުމަށް ރައީސް އިބްރާހީމް މުހައްމަދު ޞާލިހު ވެވަޑައިގެންފައިވާ ރިޔާސީވައުދު ތަންފީޒު ކުރުމަށް މާލޭ އުސްފަސްގަނޑުގައި ޤާއިމްކުރެވޭ ރާޅުބާނިން ކަރަނޓްއުފައްދާ ނިޒާމް ޤާއިމްކޮށް ކަރަންޓްގެ ޔުނިޓް 50 ލާރިއަށްވުރެ ދަށްކޮށް ކަރަންޓްބިލް ކުރުން. ފޮސިލް ފިއުލް ބޭނުން މަދުކޮށް އާހޯދުންތަކާއި ރިނިއުބަލް އެނާޖީއަށް ފުރުސަތުތައް ފަހިކުރުން .

7. މާލެ ސިޓީގައި ޤާއިމުކުރެވޭ ފުރަތަމަ ދުނިޔޭގެ ފެންވަރުގެ ޝޮޕިންމޯލް ޤާއިމުކޮށް ކުދިއަދިމެދުފަންތީގެ ވިޔަފާރި ކުރިއެރުވުމަށް. ޒަމާނީ ދަތުރުފަތުރު ނިޒާމަކުން ގްރޭޓާ މާލޭ ރީޖަން ގުޅާލެވި ހައިޕާލޫޕް ހައިސްޕީޑް ޓްރާންސްޕޯޓް ތައާރަފްކުރުން.

8. މާލެސިޓީގައި ޤާނޫނާއި ޤަވާއިދުތަކާއި ޚިލާފަށް އުޅޭ ބިދޭސީންގެ މައްސަލަތައް ހައްލުކުރުމަށް.

9. މާލެ ސިޓީ ކައުންސިލަކީ ރައްޔިތުންނާއި އެންމެ އެކުވެރިމާއެކު ގާތުން ހިދްމަތްދޭ އެންމެ ފަސޭހައިން ޚިދްމަތްލިބޭ ރައްޔިތުން ޤާއިމުކުރާ އޮފީސް ކަމުގައި ހަަދައި، ކަންކަމުގަ ޚިދްމަތް ހޯދުމަށް ކިއުގަ ޖެހުން ނިމުމަކަށް ގެނައުން، މިއެވެ.

ބްރޯ ރަޝީދު ވަނީ އެމްޑީޕީގެ އެންމެހާ މެންބަރުންގެ އަރިހުން ޖެނުއަރީ މަހުގެ 31ވަނަ ދުވަހު އޮންނަ ކައުންސިލް އިންތިޚާބުގެ އެމްޑީޕީގެ ޕްރައިމަރީގައި އޭނާއަށް ވޯޓު ދިނުމަށް އެދޭ ކަމަށް ބުނެފައެވެ.

ނޯޓް: މި ޕްރައިމަރީގައި ވާދަކުރާ ކެނޑިޑޭޓުން ވޮއިސް މެދުވެރިކޮށް ޚަބަރުތައް ގެނެސްދޭން ބޭނުންވާނަަމަ ވޮއިސްގެ ހޮޓްލައިން 9956888 އަށް ގުޅައިގެން ނުވަތަ މި ނޫހުގެ އީމެއިލްކަމުގައިވާ [email protected] އަށް މެއިލްކޮށްގެން ކުރިއަށް ގެންދެވޭނެއެވެ.

ވޮއިސްގެ ޓީމުން ވަނީ އެމްޑީޕީގެ ޕްރައިމަރީގެ އިތުރުންވެސް ކައުންސިލް އިންތިޚާބުގައި ވާދަކުރާާ އެހެން ޕާޓީތަކުގެ ކެނޑިޑޭޓުންނާއި އަމިއްލަ ކެނޑިޑޭޓުންގެ ޚަބަރުތައްވެސް ގެނެސްދިނުމަށް ނިންމާފައެވެ.