ރަމަޟާން މަހުގެ ތަހުނިޔާ ރައީސް ޑރ.މުއިއްޒު، އިސްލާމީ ގައުމުތަކުގެ ވެރިންނަށް ފޮނުއްވައިފި

ބަރަކާތްތެރި ރަމަޟާން މަހުގެ ތަހުނިޔާ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، އިސްލާމީ ޤައުމުތަކުގެ ވެރިންނަށް ފޮނުއްވައިފިއެވެ.

ހިޖުރައިން 1445 ވަނަ އަހަރުގެ ރަމަޟާން މަސް ފެށުމާއިއެކު، ރައީސް ޑރ.މުއިއްޒު ފޮނުއްވި މެސެޖްގައި، ދިވެހި ސަރުކާރާއި ރައްޔިތުންގެ އިތުރުން ރައީސް ޑރ.މުއިއްޒު ގެ އަމިއްލަ ނަންފުޅުގައި، އިސްލާމީ ޤައުމުތަކުގެ ވެރިންނަށާއި، އިސްލާމީ ޤައުމުތަކުގެ އެންމެހައި އަޚުންނާއި އުޚުތުންނަށް މި މައްސަރުގެ ހެޔޮ އެދުންތައް ވަނީ ފޮނުއްވާފައެވެ.

މީގެ އިތުރުންވެސް، މި ފެށުނު ރަމަޟާން މަހަކީ ޤައުމުތަކަށް އުފާ ފާގަތި، އަމާން، ސުލްޙަވެރި މަހަކަށްވުމަށް އެދިވަޑައިގަންނަވާ ކަމަށް ވެސް ރައީސް ޑރ.މުއިއްޒު އިސްލާމީ ޤައުމުތަކުގެ ވެރިންނަށް ފޮނުއްވި މެސެޖްގައި ވެއެވެ.

ރާއްޖޭގެ އިތުރުން ސައުދީ އަރަބިއްޔާއަށް ވެސް ރަމަޟާން މަހުގެ ފުރަތަމަ ދުވަހަކީ މިއަދެވެ.

ނަމަވެސް ހަނދު ނުފެނި ރަމަޟާން މަހުގެ އެއްވަން ދުވަހަކީ އަންގާރަ ދުވަސް ކަމުގައި އެހެން ބައެއް ގައުމުތަކުން ވަނީ ކަނޑައަޅާފަ އެވެ.

އެގޮތުން، ފިލިޕިންސް، ސިންގަޕޫރު، އިންޑޮނޭޝިޔާ، މެލޭޝިޔާ، އަދި ބުރޫނާއީ އަށްވެސް ރޯދަ މަހުގެ ފުރަތަމަ ދުވަހަކީ އަންގާރަ ދުވަސް ކަން ވަނީ އިއުލާން ކޮށްފައެވެ.