ފޭމް ދަތުރެއްގައި ރާއްޖެ އައުމަށް ޖަޕާނުގެ ނޫސްވެރިންތަކަކަށް ދައުވަތުދީފި

މޯލްޑިވްސް މާރކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ފެމިލިއަރައިޒޭޝަން (ފޭމް) ދަތުރެއްގައި ރާއްޖެ އައުމަށް ޖަޕާންގެ ނޫސްވެރިންތަކަކަށް ދަޢުވަތު ދީފިއެވެ.

އެމްއެމްޕީއާރުސީ އިން ބުނީ 17 މޭ އިން 24 މޭއިގެ ނިޔަލަށް މި ނޫސްވެރިން ރާއްޖެގައި ތިބުމަށް ހަމަޖެހިފައިވާއިރު، މި ނޫސްވެރިން ތިބުމަށް ހަމަޖެހިފައިވަނީ ހުވަފެންފުށި، މޫވެންޕިކް ރިޒޯޓް ކުރެދިވަރު އަދި ލަކްސް ސައުތް އަރި، މި  ތިން ރިސޯޓްގައި ކަމަށެވެ.

އެމްއެމްޕީއާރުސީން ދައުވަތުދީފައިވާ ވޯގް ޖަޕާން އޮންލައިން،ސީއާރްއީއޭ ވެބް، ނިއުމެރޯ ޓޯކްޔޯ.ޖޭޕީ އަދި، މައިނާވި ވުމެން އަކީ ޖަޕާނުގެ މަޝްހޫރު އަދި ނުފޫޒުގަދަ ނޫސް މަޖައްލާތަކަކަށްވާއިރު، އެ ކޯޕަރޭޝަނުން ބުނީ ބޭނުމަކީ ރާއްޖޭގެ ފަތުރުވެރިކަން ވީހާވެސް ބޮޑަށް ނޫސް ތަކާއި މީސްމީޑިއާގައި ޕްރޮމޯޓްކޮށް، ރާއްޖެ އަކީ ފަތުރުވެރިންނަށް އަމާން މަންޒިލެއް ކަން ދައްކުވައިދީ އަދި ޖަޕާނުގެ މާކެޓުގައި ރާއްޖޭގެ ފަތުރުވެރިކަމުގެ ބްރޭންޑަށް ހޭލުންތެރިކަން އިތުރުކުރުން ކަމަށެވެ.

މީގެ އިތުރުންވެސް ފަތުރުވެރިކަމަށް ލޯބިކުރާ ފަރާތްތަކަށް ރާއްޖޭގެ ފަތުރުވެރިކަމުގެ އިތުރު މައުލޫމާތާއި، ފަތުރުވެރިކަމުން ލިބޭ ގިނަގުނަ ހިދުމަތްތައް މި ނޫސްވެރިންގެ ފަރާތުން އެނގިގެންދާނެ ކަމަށް އެމްއެމްޕީއާރުސީން ބުނެއެވެ.

އެމްއެމްޕީއާރުސީން މި ނޫސްވެރިން ރާއްޖެ ގެނައުމުގެ މައިގަނޑު މަގްސަދަކީ ރާއްޖޭގެ ފަތުރުވެރިކަން ފުޅާވެފައިވާ މިންވަރު ޖަޕާނުގެ މާކެޓުގައި ދައްކުވައި، ރާއްޖެއަށް އަންނަ ޖަޕާނުގެ ފަތުރުވެރިން އިތުރުކުރުން ކަމަށްވާއިރު، މި ފެމިލިއަރައިޒޭޝަން ދަތުރުގައި ދަޢުވަތު ދިނުމުގައި މަޝްހޫރު، ޒުވާން އަދި ރާއްޖޭގެ ފަތުރުވެރިކަމުގެ ކޮލިޓީ ދައްކުވައިދޭވޭނެ ފަދަ ނޫސްވެރިންނަށް އެ ކޯޕަރޭޝަނުން ވަނީ އަމާޒުކޮށްފަ އެވެ.

މިއީ ހަމަ އެކަނި ހޮޓެލް އިންޑަސްޓްރީ އާއި ގެސްޓް ހައުސް ވިޔަފާރި އިޝްތިހާރު ކުރުން ނޫންކަމަށާއި، މި ދަތުރުގެ ތެރެއިން ފަތުރުވެރިންނަށް ރާއްޖޭގައި ކުރެވޭނެ ތަފާތު ތަޖުރިބާތައް ދައްކުވައިދިނުން ހިމެނޭ ކަމަށް އެމްއެމްޕީއާރުސީން ބުނެއެވެ.

މަގްސަދަކީ އެހެން އަހަރު ތަކެކޭ އެއްފަދައިން ދުނިޔޭގެ ފަތުރުވެރިކަމުގެ އެންމެ ކުރީގައިވާ ގައުމުތަކުގެ ތެރޭގައި ރާއްޖެ ދެމެހެއްޓުންކަން ފާހަގަކޮށް އެ ކޯޕަރޭޝަނުން ބުނީ އަހަރު ކުރީކޮޅު ޖަޕާނުގައި ބޭއްވި މެރިން ޑައިވިން އެވޯޑް 2023 ގައި ރާއްޖެއަށް "ބެސްޓް އޭރިއާ އޯވަސީސް ޑިވިޝަން" އިން ތިންވަނަ އަދި "ބެސްޓް އޯވަސީސް ޑެސްޓިނޭޝަން އައި ވޯންޓް ޓު ވިޒިޓް ފޯރ ދަ ފަރސްޓް ޓައިމް" ކެޓެގަރީ އިން ދެވަނަ ލިބިފައި ކަމަށާއި، މިއީ ދުނިޔޭގެ ޑައިވަރުން ވޯޓުދީގެން ރާއްޖެއަށް ލިބުނު ކާމިޔާބީއެެއް ކަމަށެވެ.

އޭޕްރިލް 2024 ގެ ނިޔަލަށް ޖަޕާނުގެ 9,333 ފަތުރުވެރިން ރާއްޖެއަށް ޒިޔާރަތްކޮށްފައިވާއިރު މިއީ ރާއްޖެއަށް އަންނަ ފަތުރުވެރިންގެ 1.5 އިންސައްތައެވެ. އެގޮތުން ޖަޕާނަކީ 13 ވަނައަށް އެންމެ ގިނަ ފަތުރުވެރިން ރާއްޖެއަށް ޒިޔާރަތް ކުރާ އެއް ގައުމުކަން ފާހަގަކޮށްލެވެއެވެ.