ކައުންސިލް އިންތިޚާބަށް 1040 ފޯމު ބަލައިގަނެފި

ކުރިއަށް އޮތް ލޯކަލް ކައުންސިލް އިންތިޚާބަށް ހުށަހެޅި 1040 ފޯމު ބަލައިގަނެފިކަމަށް އިލެކްޝަންސް ކޮމިޝަނުން މައުލޫމާތު ދީފިއެވެ.

މީގެ ތެރޭގައި ހިމެނެނީ ސިޔާސީ ޕާޓީތަކުގެ 852 ފޯމާއި، އަމިއްލަގޮތުން ލާފައިވާ 188 ފޯމެވެ.

ލޯކަލް ކައުންސިލް އިންތިހާބުގައި ބައިވެރިވުމަށް ސިޔާސީ ޕާޓީތަކުން ހުށެހެޅި 142 ފޯމު އަދި އަމިއްލަގޮތުން ހުށަހެޅި 94 ފޯމު ބަލައިނުގަންނަ ކަމަށްވެސް އީސީސީއިން މައުލޫމާތުދީފައިވެއެވެ. އަދި ކެނޑިޑަސީ ގަބޫލުނުކުރުމުގެ ސަބަބުން ސިޔާސީ ޕާޓީތަކުން 84 އަދި އަމިއްލަގޮތުން 49، ޖުމުލަ 133 ފޯމު އަލުން ހުށަހަޅާފައިވާކަމަށްވެސް އެ ކޮމިށަނުން ހާމަކޮށްފައިވެއެވެ.

މީގެ އިތުރުން، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވާދަކުރުމަށް ހުށަހެޅި 817 ކެންޑިޑޭޓުންގެ ފޯމު އިލެކްޝަންސް ކޮމިޝަނުން ވަނީ ބަލައިގަނެފައެވެ. މީގެ ތެރޭގައި ހިމެނެނީ ސިޔާސީ ޕާޓީތަކުގެ 692 ފޯމާއި، އަމިއްލަގޮތުންލީ 125 ފޯމެވެ.

އިލެކްޝަންސް ކޮމިޝަނުން މައުލޫމާތުދީފައިވާ ގޮތުގައި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވާދަކުރުމަށް ލާފައިވާ 161 ފޯމެއް ވަނީ ޝަރުތު ހަމަނުވާ ކަމަށް ކަނޑައަޅާފައެވެ. މީގެ ތެރޭގައި ހިމެނެނީ ސިޔާސީ ޕާޓީތަކުގެ 103 ފޯމާއި، އަމިއްލަގޮތުންލީ 58 ފޯމެވެ.

ކެންޑިޑަސީ ގަބޫލުނުކުރުމުގެ ސަބަބުން އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިހާބަށް، ސިޔާސީ ޕާޓިތަކުގެ 54 ފޯމާއި، އަމިއްލަގޮޮތުން ލާފައިވާ 32 ފޯމާއިއެކު، ޖުމުލަ 86 ފޯމުވަނި އަލުން ލާފައެވެ.

ކައުންސިލް އަދި އަންހެނުންގެ ކޮމިޓީ އިންތިޚާބުގައި ވާދަކުރަން އިލެކްޝަންސް ކޮމިޝަނުން ހުޅުވާލީ، މި މަހުގެ 17 ވަނަ ދުވަހުއެވެ. އެ ކޮމިޝަންގެ އެންމެފަހުގެ ހިސާބުތަކުން ދައްކާގޮތުގައި މިހާތަނަށް ފޯމު ހުށަހެޅި ފަރާތްތަކުގެ ތެރެއިން ދެ އިންތިޚާބުގައި ވާދަކުރުމަށް 1،857 މީހެއްގެ ކެންޑިޑެސީ މިހާރު ވަނީ ގަބޫލުކޮށްފައެވެ.

އިލެކްޝަންސް ކޮމިޝަނުން މައުލޫމާތުދޭ ގޮތުގައި، ކެންޑިޑެސީ ޤަބޫލުނުކުރާ މައިގަނޑު ސަބަބުތަކަކީ، ކުށާއި ދަރަނީގެ ރެކޯޑު އުމުރަށް ހުށަހަޅާފައި ނެތުމާއި، ކުށެއް ނުވަތަ ދަރަންޏެއް އޮތްނަމަ އެކަމުގެ ތަފްސީލު ހުށަހަޅާފައި ނެތުމުން ކަމަށެވެ. އަދި ކަރެކްޝަނަލް ސަރވިސްއިން ފުރިހަމަކޮށް، ހުށަހަޅަންޖެހޭ ކުށުގެ ރެކޯޑު ބައެއް ފަރާތްތަކުން ހުށަނާޅާ އޮތުން ކަމަށެވެ.