ފުލުހުން، ޑިޔުޓީގެ 8 ގަޑިއިރުގެ ބޮޑުބައި މަގުމަތީގައި، ރައްޔިތުންނާއިއެކު ހޭދަކުރަންޖެހޭ: ސީޕީ ޝުޖާޢު
ލިޔުންތެރިޔާ
ޚަދީޖާ އަރުފާ
ރަށުތެރެއިން ކަމެއް ހިނގި ކަމުގެ ރިޕޯޓެއް ނެތް ނަމަ ފުލުހުން ގިނަ ފަހަރު ޑިއުޓީ ނިންމާލަނީ ސްޓޭޝަނުގައި ތިބެގެން ކަމަށް ވިދާޅުވެ، އެކަން ބަދަލު ކުރުމަށް ޕޮލިސް ކޮމިޝަނަރު އަލީ ޝުޖާއު ރޭ އެދިވަޑައިގެންފިއެވެ.
ފުލުހުންގެ 36 ވަނަ އަސާސީ ތަމްރީނު ކޯހުގެ ދަސްވެނިވިވުމުގެ ރަސްމިއްޔާތުގައި ވާހަކަފުޅުދައްކަވަމުން ޝުޖާޢު ވިދާޅުވީ، ފުލުުހުން އިސްނަގައިގެން މުޖުތަމަޢުގައި ހުރި މައްސަލަތައް ހައްލުކުރުމަށް މަސައްކަތް ކުރަންޖެހޭ ކަމަށެވެ. އެގޮތުން ރައްޔިތުންގެ ކޮންމެ ކަންބޮޑުވުމަކީ ފުލުހުންގެވެސް ކަންބޮޑުވުމެއްކަން އަމަލާއި ބަހުން ދައްކަން ޖެހޭކަމަށް ސީޕީ ޝުޖާޢު ވިދާޅުވިއެވެ.
އޭގެ އެއް ކަމެއްގެ ގޮތުގައި ފާހަގަ ކުރެއްވީ މަސްތުވާތަކެތީގެ ވަބާއިން ގައުމު ސަލާމަތް ކުރުމެވެ. އެގޮތުން ސީޕީ ވިދާޅުވީ، ރަށްރަށަށް އެތެރެކުރާ މަސްތުވާތަކެތީގެ މައްސަލަ ހައްލު ކުރުމަށްޓަކައި ރަށުގެ ބަނދަރުމަތީގައި ފުލުހަކު ހުރުމަށް އަބަދުވެސް ރައްޔިތުން އެދޭ ކަމަށެވެ.
"ސަބަބަކީ ޔުނިފޯމު އެޅި ފުލުހަކު ފެންނަން ހުރުމަކީ އޭގެ ޒާތުގައި ވަރަށް ގިނަ ކަންކަން ހައްލުވާ ކަމެއް. ނަތީޖާއަކަށް ވާނީ މަސްތުވާތަކެތި ފާޅުގައި އެތެރެ ކުރުމަށް މީހުން ޖެހިލުންވުން. ޝައްކު ކުރެވޭ މީހުން، އެ އޮންނަ އުސޫލުގެ ތެރެއިން ބަލައި ފާސްކުރާ ހިސާބުން އެ ރަށަށް މަސްތުވާތަކެތި އެތެރެކުރުން ވަރަށް ބޮޑަށް ހުއްޓިގެން ދާނެ،"
ޕޮލިސް ކޮމިޝަނަރު ޝުޖާއު
ސީޕީ ވިދާޅުވީ އެފަދައިން، ފުލުހުންގެ ސްޓޭޝަނުން ބޭރުގައި ފުލުހުން މަސައްކަތް ކުރާ ނަމަ މީގެ އަހަރުތަކެއް ފަހުން މިކަމުގެ ހެޔޮ ބަދަލު މި ގައުމުން ފެނިގެންދާނެ ކަމަށެވެ.
ހިތާމައަކީ މިއަދު އަޅުގަނޑުމެން ޑިއުޓީގައި ރަށުތެރެއިން ކަމެއް ހިނގައިގެން ރިޕޯޓު ނުކޮށްފި ނަމަ ގިނަ ފަހަރު ޑިއުޓީ ނިންމާލެވެނީ ސްޓޭޝަނުގެ ތެރޭގައި ތިބެގެން. މިކަން ބަދަލުވާން އެބަޖެހޭ. އަށް ގަޑިއިރުގެ ޑިއުޓީގެ ބޮޑުބައި ރައްޔިތުންނާ އެކު ހޭދަކުރަން އެބަޖެހޭ،"
ޕޮލިސް ކޮމިޝަނަރު ޝުޖާއު
މީގެ އިތުރުން ސީޕީ ވިދާޅުވީ، މަގުތަކުގައި އަމާންކަން ގާއިމް ކުރެވެން ވެސް އޮތީ އެ މަގުތަކުގައި ފުލުހުން ހަރަކާތްތެރިވެގެން ކަމަށާ މަގުތައް ބިޒީވާ ގަޑީގައި އަމިއްލަ އަށް އިސްނަގައިގެން ފުލުހުން މަގުތަކަށް ނުކުންނަން ޖެހޭ ކަމަށެވެ.
"މަގުތަކުގައި އަމަންކަން ޤާއިމް ކުރެވޭނީ މަގުތަކުގައި ފުލުހުން ހަރަކާތްތެރިވެގެން. ބިޒީ ވާގަޑިތަކުގައި އަމިއްލައަށް އިސްނަގައިގެން ނިކުންނަން ޖެހޭ. ރައްޔިތުންނާއި ރީތި ބަހުން ވާހަކަ ދައްކަން އެބަޖެހޭ. ހަމަހަމަކަމާއިއެކު ޤާނޫނުތައް ތަންފީޒުކުރަން ޖެހޭ. ކަންކަން ހައްލުކުރުމަށް ބާރުގެ ބޭނުން ކުރުމަކީ އެންމެ ފަހުން ކުރާ ކަމެއްގެ ގޮތުގައި ހަދަންޖެހޭ"
ޕޮލިސް ކޮމިޝަނަރު ޝުޖާއު
މިއާއެކު، ފުލުހުންގެ ހިތްތަކުގައި އިސްލާމީ ރިވެތި ސިފަތައް ހަރުލައްވަން ޖެހޭ ކަން ފާހަގަ ކުރައްވަމުން ޝުޖާއު ވަނީ ޖަމާއަތުގައި ނަމާދުކުރަން މިސްކިތަށް ދިއުމާއި މުޖުތަމައުގައި ހިންގާ ނޭދެވޭ ކަންކަމުން ފުލުހުން އެއްކިބާ ވާން ޖެހޭ ކަމަށް ވިދާޅުވި އެވެ.
އެގޮތުން މަސައްކަތުގެ މާހައުލުގައި އަދި އާންމު ދިރިއުޅުމުގައިވެސް ޢެ ޚިދުމަތަށް އަދި ޤައުމަށް ދެރަވާ ގޮތަށް ޢަމަލުނުބެހެއްޓުމަށް ސީޕީ އިލްތިމާސްކުރެއްވިއެެވެ.
އެ މޭރުމުން ވާހަކަ ދައްކަވަމުން ސީޕީ ވަނީ ދާދިފަހުން މީހުންނަށް އޮޅުވާލައިގެން ފައިސާ ހޯދަމުން ދިޔަ މީހާ އަކީ ފުލުހެއްކަން އެނގުނު ހިސާބުން ކުރި ކޮމެންޓުތަކުން ދޭހަވީ ފުލުހުންނަށް ކުރާ އިތުބާރު ކުޑަވެފައިވާ ވަރުކަން ފާހަގަކުރައްވާފައެވެ.
އެހެންވެ، ސީޕީ ވިދާޅުވީ އެފަދަ ކަންކަމުން ފުލުހުން ދުރުވެގެން ނޫނީ ރައްޔިތުންގެ ލޯތްބާއި އިހުތިރާމް ނުހޯދޭނެ ކަަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
