ވައި ތަޣައްޔަރުވުން ކުޑަކުރާ ކެމްޕެއިން އިފްތިތާޙުކޮށްފި
ނައިބު ރައީސް ފައިސަލް ނަސީމު ''ބްރީތް ލައިފް'' ކެމްޕެއިން އިފުތިތާހުކޮށްދެއްވައިފިއެވެ.
''ބްރީތް ލައިފް'' ކެމްޕެއިނަކީ ވައި ނުސާފުވުމުގެ ސަބަބުން ސިއްހަތަށް ކުރާ ނޭދެވޭ އަސަރުތަކުން ރައްކާތެރިވާން ތައްޔާރު ކޮށްފައިވާ ނެޝަނަލް އެކްޝަން ޕްލޭން ތަންފީޒު ކުރުމުގެ ގޮތުން ދުނިޔޭގެ ސިއްހަތު ޖަމުއިއްޔާ (ޑަބްލިޔުއެޗްއޯ) އާއި ހެލްތު ޕްރޮޓެކްޝަން އެޖެންސީ (އެޗްޕީއޭ) އަދި އެންވަޔަރަންމަންޓު މިނިސްޓްރީ ގުޅިގެން ކުރިއަށްގެންދާ ހަރަކާތެކެވެ.
ހޮޓެލް ޖެންގައި މިއަދު ހެނދުނު ބޭއްވި ރަސްމިއްޔާތުގައި ހެލްތް މިނިސްޓަރު އަބްދުﷲ އަމީނާއި އެންވަޔަރަންމަންޓް މިނިސްޓަރު ޑރ. ހުސައިން ރަޝީދު ހަސަނާއި ޖެންޑާ މިނިސްޓަރު ސިދާތާ ޝަރީފް ބައިވެރިވެވަޑައިގެންނެވިއެވެ.
މިއަދު ފެށި ކެމްޕެއިންގެ ދަށުން، ބްރީތު ލައިފް އެކްޝަން ޕްލޭންގަައިވާ ކަންކަން ހާސިލް ކުރަން ޑަބްލިޔޫއެޗްއޯ އާއި ހެލްތު ޕްރޮޓެކްޝަން އެޖެންސީ އާއި އެންވަޔަރަންމަންޓް މިނިސްޓްރީ ގުޅިގެން ހަރަކާތްތަކެއް ކުރިއަށް ގެންދާނެ އެވެ.
މި ކެމްޕެއިނަކީ ވައި ތަޣައްޔަރުވުމުގެ ސަބަބުން އިންސާނުންގެ ސިއްހަތަށާއި ތިމާވެއްޓަށް ލިބޭ ގެއްލުންތަކުން ރައްކާތެރިވެފައިވާ ގައުމަކަމަށް ރާއްޖެ ހެދުމަށް ކުރާ މަސައްކަތުގެ ދަށުން ހިންގާ ހަރަކާތެކެވެ.
މިރަސްމިއްޔާތުގައި ހެލްތް މިނިސްޓަރު އަބްދުﷲ އަމީން ދެއްކެވި ވާހަކައިގައި ވިދާޅުވީ ރާއްޖޭގެ ސިއްހީ ނިޒާމަށް މިހާރު ކުރިމަތިވެފައިވާ އެންމެ ބޮޑު ނުރައްކަލަކީ ނޭވާލުމުގެ ނިޒާމަށް ޖެހޭ ބަލިތައް އިތުރުވުމާއި ގައިންގަޔަށް ނާރާ ބަލިތައް ޖެހޭ މިންވަރު އިތުރުވުން ކަމަށެވެ. އެކަމަށް ހައްލެއް ހޯދުމުގެ ގޮތުން ވައި ތަޣައްޔަރުވުން ކުޑަކުރުމަށް ހުރިހާ ފަރާތްތައް ގުޅިގެން މަސައްކަތް ކުރުމަށް މިނިސްޓަރު އަމީން ގޮވައިލެއްވިއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
