ނޮވެންބަރު 2025 ގެ ނިޔަލަށް ނުކުޅެދުންތެރިކަން ހުންނަ މީހުންގެ ދަފްތަރުގައި 14،000 އަށް ވުރެ ގިނަ މީހުން

މި އަހަރުގެ ނޮވެންބަރުމަހުގެ ނިޔަލަށް ނުކުޅެދުންތެރިކަން ހުންނަ މީހުންގެ ދަފްތަރުގައި 14،000 އަށް ވުރެ ގިނަ މީހުން ރަޖިސްޓްރީވެފައިވާކަމަށް އެންސްޕާއިން ހާމަކޮށްފިއެވެ.

އެ އިދާރާއިން އާއްމުކުރި މައުލޫމާތުގައިވާގޮތުން މިދިޔަ މަހުގެ ނިޔަލަށް 14،938 ފަރާތެއް ވަނީ ނުކުޅެދުންތެރިކަން ހުންނަ މީހުންގެ ދަފްތަރުގައި ރަޖިސްޓްރީވެފައެވެ. މީގެ ތެރޭގައި ހިމެނެނީ ޖުމުލަ 6،269 އަންހެނުންނާއި 8،669 ފިރިހެނުންނެވެ.

މި ދަފްތަރުގައި ރަޖިސްޓްރީ ކޮށްފައިވާ ފަރާތްތަކުގެ ތެރެއިން އެންމެ ގިނަ މީހުން ރަޖިސްޓްރީވެފައިވަނީ ޖިސްމާނީ ނުކުޅެދުންތެރިކަން ހުންނަ މީހުުންގެ ގޮތުުގައެވެ. އެގޮތުން މި ގިންތީގައި ޖުމުލަ 4193 ފާރާތަކުން ރަޖިސޓްރީވެފައިވެއެވެ. މީގެ ތެރޭގައި ހިމެނެނީ 1872 އަންހެނުންނާއި 2321 ފިރިހެނުންނެވެ.

މީގެ އިތުރުން، މަލްޓިޕަލް ޑިސެބިލިޓީ ހުންނަ މީހުންގެ ގޮތުގައި 1206 އަންހެނުންނާއި، 2166 ފިރިހެނުން ހިމެނޭނެހެން ޖުުމުލަ 3372 ފަރާތަކުން ރަޖިސްޓްރީވެފައިވެއެވެ. އަދި ވިސްނުމުގެ/ސިކުނޑީގެ ނުކުޅެދުންތެރިކަން ހުންނަ މީހުންގެ ގޮތުގައި 811 އަންހެނުންނާއި، 1060 ފިރިހެނުން (ޖުމުލަ 1871 މީހުން)، ނަފްސާނީ ނުކުޅެދުންތެރިކަން ހުންނަ މީހުންގެ ގޮތުގައި 820 އަންހެނުންނާއި، 1239 ފިރިހެނުން (ޖުމުލަ 2059 މީހުން)، އަޑުއިވުމާއި ވާހަކަދެއްކުމުގެ ނުކުޅެދުންތެރިކަން ހުންނަ މީހުންގެ ގޮތުގައި 942 އަންހެނުންނާއި، 843 ފިރިހެނުން (ޖުމުލަ 1785 މީހުން)، ފެނުމުގެ ނުކުޅެދުންތެރިކަން ހުންނަ މީހުންގެ ގޮތުގައި 475 އަންހެނުންނާއި، 539 ފިރިހެނުން (ޖުމުލަ 1014 މީހުން)، އޯޓިޒަމް ހުންނަ މީހުންގެ ގޮތުގައި 125 އަންހެނުންނާއި، 463 ފިރިހެނުން (ޖުމުލަ 588 މީހުން) އަދި އުނގެނުމުގެ ނުކުޅެދުންތެރިކަން ހުންނަ މީހުންގެ ގޮތުގައި 18 އަންހެނުންނާއި، 38 ފިރިހެނުން (ޖުމުލަ 56 މީހުން) ރަޖިސްޓްރީކޮށްފައިވެއެވެ.

ނޮވެންބަރު 2025 ގެ ނިޔަލަށް ނުކުޅެދުންތެރިކަން ހުންނަ މީހުންގެ ދަފްތަރުގައި ރަޖިސްޓްރީވެފައިވާ ފަރާތްތަކުގެ އުމުރުފުރައިގެ ގިންތިއާއި އަދަދުވެސް އެންސްޕާއިން ވަނީ އާއްމުކޮށްފައެވެ.

އެގޮތުން 1524 އަންހެން އަދި 3526 ފިރިހެން ކުދިން ހިމެނޭނެހެން، މި ދަފްތަރުގައި ރަޖިސްޓްރީވެފައިވާ ޖުމުލަ 5050 ކުދިންނަކީ 18 އަހަރު ނުފުރޭ ކުޑަކުދިންނެވެ. 18 އަހަރާއި 64 އަހަރާއި ދެމެދު ހިމެނެނީ 371 އަންހެނުންނާއި، 3912 ފިރިހެނުން ހިމެނޭނެހެން، ޖުމުލަ 7613 މީހުންނެވެ. އަދި 65 އަހަރުން މަތީގެ ގިންތީގައި ހިމެނެނީ 144 އަންހެނުންނާއި، 1231 ފިރިހެނުން ހިމެނޭނެހެން ޖުމުލަ 2275 މީހުންނެވެ.

ސަރުކާރުން ދަނީ ނުކުޅެދުންތެރިކަން ހުންނަ ފަރާތްތަކަށް އެކި ކަހަލަ އެހީތެރިކަމާއި އެފަރާތްތައް ބާރުވެރިކުރުމަށް އެތައް މުހިންމު މަސައްކަތްތަކެއް ކުރަމުންނެވެ.