ދިއްފުށްޓަށް ސްޓެލްކޯގެ އައު އިންޖީނުގެއެއް!

ދިއްފުށީގައި ސްޓެލްކޯގެ އައު އިންޖީނުގެއެއް ޢިމާރާތްކުރުމަށް، ބިންގާ އަޅައިފި އެވެ.

ޒަމާނީ ފެންވަރަށް ހަދަން ފަރުމާކޮށްފައިވާ، މި އައު އިންޖީނުގެ ޢިމާރާތްކުރުމަށް، ބިންގާ އަޅުއްވައިދެއްވީ ސްޓެލްކޯގެ މެނޭޖިންގ ޑިރެކްޓަރ ޙުސައިން ފަހުމީ އާއި ސްޓެލްކޯގެ ޑިރެކްޓަރުންގެ ބޯޑުގެ ޗެއާމަން މުޙައްމަދު ލަޠީފުގެ އިތުރުން، ރައްޔިތުންގެ މަޖިލީހުގެ ތުލުސްދޫ ދާއިރާގެ މެންބަރު އިބްރާހިމް ނަސީމެވެ.

މިކަމާ ބެހޭ ގޮތުން މައުލޫމާތު ދެމުން، ސްޓޭލްކޯއިން އެކްސްގައި ކުރި ޕޯސްޓެއްގައި ބުނެފައިވަނީ، ދިއްފުށީގައި ޒަމާނީ، އައު އިންޖީނުގެ ޢިމާރާތް ކުރުމަށް ބަޔަކާ ހަވާލުކޮށްފައިވާ ކަމަށެވެ.

މީގެ އިތުރުން ބިންގާ އެޅުމުގެ ރަސްމިއްޔާތަށްފަހު ރައީސުލްޖުމްހޫރިއްޔާގެ ވަޢުދުފުޅާއި އެއްގޮތަށް 5 އަހަރުން 5 މިލިއަން ގަސް އިންދުމަށް ހިފާފައިވާ އަމާޒަށް ވާޞިލްވުމަށް މިކުންފުނިން ޕްލެޖް ވެފައިވާގޮތަށް ފަސްލައްކަ ގަސް އިންދުމަށް ކުރެވޭ މަސައްކަތުގެ ތެރެއިން ދިއްފުށީގައި 1000 ގަސް އިންދާފައިވާކަންވެސް ސްޓޭލްކޯއިން ވަނީ ފާހަގަކޮށްފައެވެ.