ޚަރަދު ކުޑަކުރުމުގެ ގޮތުން މިއަހަރުގެ ސްޕޯޓްސް އެވޯޑު ޙަފްލާ ފަސްކޮށްފި

މިއަހަރުގެ މޯލްޑިވެސް ސްޕޯޓްސް އެވޯޑު ޙަފްލާ ބާއްވާ ތާރީޚު ފަސްކޮށްފިއެވެ.

ކުޅިވަރާއި ހަށިހެޔޮކަމާ ބެހޭ ވުޒާރާއިން މިއަދު ނެރުނު ބަޔާނެއްގައި ބުނެފައިވަނީ، މި ފެށޭ ޖުލައި މަހުގެ ހަތަރު ވަނަ ދުވަހު ބޭއްވުމަށް ހަމަ ޖެހިފައި އޮތް މޯލްޑިވްސް ސްޕޯޓްސް އެވޯޑްސް ޙަފްލާ ފަސްކޮށްފައިވާ ކަމަށެވެ.

މި ޙަފްލާ ފަސްކުރި ތާރީޚެއް އިޢުލާން ނުކުރި ނަމަވެސް ކުޅިވަރާއި ހަށިހެޔޮކަމާ ބެހޭ ވުޒާރާއިން ބުނީ، ޙަފްލާ ފަސްކުރަނީ، އަހަރުގެ ފަހުކޮޅަށް ކަމަށެވެ.

އެ ވުޒާރާއިން ހާމަކުރެއްވި ގޮތުގައި، ޙަފްލާ ބޭއްވުމުގެ ތައްޔާރީތައްވެސް ވަމުން ދަނިކޮށް، ޙަފްލާ މި ވަގުތަށް ފަސްކޮށްލަން ނިންމީ، ދައުލަތުގެ ޚަރަދުތައް ކުޑަ ކުރެއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އަޅުއްވަން ނިންމެވި ޚާއްސަ ފިޔަވަޅުތައް، އެވޯޑް ޙަފްލާއާ ގުޅުންހުރި ފަރާތްތަކާ ޙިއްސާ ކުރުމަށް ފަހުއެވެ.

ދައުލަތުގެ މާލީ ޙާލަތު ރަނގަޅު ކުރުމުގެ ގޮތުން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ދަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން ދައުލަތުގެ ޚަރަދު ކުޑަ ކުރުމަށް ގިނަ ފިޔަވަޅު ތަކެއް އަޅުއްވަން ނިންމަވާ، ސިޔާސީ މަޤާމުތަކުގެ އަދަދު މަދުކޮށް، އެކި މުނާސަބަތުތަކުގައި ބާއްވާ ޙަަފްލާތަކަށް ކުރާ ޚަރަދުތައް ކުޑަކުރަން ނުވަތަ ނުބާއްވަން ނިންމަވާފައިވާކަމަށް ރައީސް ޑރ.މުޢިއްޒު ވަނީ ހާމަކުރައްވާފައެވެ.