މަގުމަތީގައި ކުނި ބަހައްޓާ ފަރާތްތަކުގެ ފޮޓޯ އާއި ވިޑިއޯ ފޮނުވޭނެ ގޮތް ހަމަޖައްސައިފި

އާންމުންނަށް އުނދަގޫ ވާނެހެން މާލޭގެ މަގުތަކުގައި ކުނި ބަހައްޓާ ފަރާތްތަކުގެ ފޮޓޯ އާއި ވީޑިއޯ ފޮނުވޭ ގޮތް މާލެ ސިޓީ ކައުންސިލުން ހަމަޖައްސައިފިއެވެ.

މާލެ ސިޓީ ކައުންސިލގެ މޭޔަރު އާދަމް އާޒިމް އެކްސް ގައި ކުރެއްވި ޕޯސްޓެއްގައި ވަނީ މާލޭ މަގުމަތީ ކުނި ބަހައްޓަމުންދާ ފަރާތްތައް ފާހަގަކުރެވެމުންދާ ކަމަށް ވިދާޅުވެ، އެފަދަ ފަރާތްތަކުގެ ފޮޓޯ އާއި ވީޑިއޯ 9341144 އަށް ވައިބާ ނުވަތަ ވަޓްސްއެޕް މެދުވެރިކޮށް ހިއްސާކުރުމަށް އެދިވަޑައިގެންފައެވެ. މީގެ އިތުރުންވެސް، އެފަދަ ފަރާތްތަކުގެ ފޮޓޯ އާއި ވީޑިއޯ މާލެ ސިޓީ ކައުންސިލްގެ ވެބްސައިޓް މެދުވެރިކޮށް ވެސް ފޮނުވޭނެ ކަމަށް މޭޔަރު އާޒިމް ވިދާޅުވިއެވެ.

މޭޔަރު އާޒިމް މިފަދައިން ވިދާޅުވެފައިވާއިރު، މާލެ ސަރަހައްދު ސާފުކޮށް ބޭއްވުމަށްޓަކައި މާލެ ސިޓީ ކައުންސިލުން ދަނީ މާލޭގެ ގިނަ ސަރަހައްދުތަކުން ކުނި ނަގާ ސާފު ކުރަމުންނެވެ. މީގެ އިތުރުންވެސް މަގުމައްޗަށް ކުނި އަޅާނަމަ އެ ކައުންސިލުން އެމީހަކު ހޯދައި، ޖޫރިމަނާ ކުރަމުންދާކަން ވެސް ފާހަގަކޮށްލަން ޖެހެއެވެ.

މާލޭގެ މަގުމައްޗަށް ކުނި އަޅާ ނަމަ، 500ރ. އިން ޖޫރިމަނާ ކުރާއިރު، ކުނި އެޅުމުގެ ސަބަބުން މިދިޔަ ފެބްރުއަރީމަހުން ފެށިގެން މިހާތަނަށް އައިއިރު، 100 އަށްވުރެ ގިނަ މީހުން ވަނީ ޖޫރިމަނާކޮށްފައެވެ.