'އަދަދު' ނޫސް ބަލައިފާސްކޮށް ފުލުހުން ހިންގާ ތަހުގީގަކީ ޤާނޫނީ ގޮތުން ކުރަންޖެހޭ ކަމެއް: ވަޒީރު އިޙްސާން

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މައްޗަށް "ޒިނޭ" ފަދަ ބޮޑެތި ތުހުމަތުތަކެއްކޮށް ދޮގު މަޢުލޫމާތު ފެތުރި މައްސަލައިގައި، 'އަދަދު' ނޫސް ބަލައިފާސްކޮށް ފުލުހުން ހިންގަމުންދާ ތަޙުޤީޤަކީ ޤާނޫނީ ގޮތުން ކުރަންޖެހޭ ކަމެއް ކަމަށް ދާޚިލީ ސަލާމަތާއި ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު އިޙްސާން މިހެން ވިދާޅުވީ އެކްސްގައި ކުރެއްވި ޕޯސްޓެއްގައެވެ.

ވަޒީރު ވިދާޅުވި ގޮތުގައި ނޫސްވެރިކަމުގެ މިނިވަންކަން ދިވެހިރާއްޖޭގައި ކަށަވަރުކޮށްދީފައިވީ ނަމަވެސް، އެއީ ދޮގު މަޢުލޫމާތު ފަތުރައިގެން މީހުންގެ އަބުރު ކަތިލުމަށް ދީފައިވާ ހުއްދައެއް ނޫނެވެ.

މި މައްސަލައާ ގުޅޭގޮތުން ވާހަކަދައްކަވަމުން ވަޒީރު ވަނީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ ބައެއް މާއްދާތަކަށް ރިޢާޔަތްކުރައްވާފައެވެ. އެގޮތުން:

27 ވަނަ މާއްދާ: އިސްލާމްދީނުގެ އަސްލަކާ ޚިލާފުނުވާ ގޮތުގެ މަތިން ޚިޔާލު ފާޅުކުރުމުގެ މިނިވަންކަން ކޮންމެ މީހަކަށްމެ ލިބިގެންވެއެވެ.

28 ވަނަ މާއްދާ: ޚަބަރާއި މަޢުލޫމާތާއި ފެންނަ ގޮތްތަކާއި ޚިޔާލުތައް ފެތުރުމުގެ މިނިވަންކަން ނޫސްވެރިކަމަށް ލިބިގެންވެއެވެ.

33 ވަނަ މާއްދާ: ކޮންމެ މީހަކަށްމެ އެމީހެއްގެ ނަމާއި އަބުރު ރައްކާތެރިކުރުމުގެ ޙައްޤު ލިބިގެންވެއެވެ.

ވަޒީރު އިޙްސާން ވިދާޅުވީ، ސީދާ ރައީސުލްޖުމްހޫރިއްޔާއަށް އަމާޒުކޮށް ހަދައިގެން ބޮޑެތި އިތުރުފުޅުތައް ހިމެނޭ ތުހުމަތުތައް ފެތުރުމަކީ ނޫސްވެރިކަން ނޫން ކަމަށެވެ.

އަދި ފުލުހުން މި މައްސަލަ ތަޙުޤީޤު ކުރަމުންދަނީ ޤާނޫނުގެ އިސްތިިޤްލާލު ދެމެހެއްޓުމަށާއި، ރައީސުލްޖުމްހޫރިއްޔާގެ ޤާނޫނުއަސާސީީ ޙައްޤުތައް ހިމާޔަތްކުރުމަށް ކަމަށްވެސް އޭނާ ވިދާޅުވިއެވެ.

"މިނިވަންކަމާއެކު ޒިންމާދާރުކަން އޮންނަންވާނެ. ޖަވާބުދާރީވުމެއް ނެތް މިނިވަންކަމެއް ނޯންނާނެ. ޤާނޫނަށްވުރެ މަތީގައި އެއްވެސް މީހަކަށް ނުހުރެވޭނެ،" ވަޒީރު އިޙްސާންގެ ޕޯސްޓުގައި ވިދާޅުވެފައިވެއެވެ.

މި މައްސަލައިގައި ފުލުހުން ވަނީ 'އަދަދު' ނޫހުގެ އޮފީސް ބަލައިފާސްކޮށް، ތަޙުޤީޤަށް ބޭނުންވާ ބައެއް ތަކެތި ފުލުހުންގެ ބެލުމުގެ ދަށަށް ގެންގޮސްފައެވެ.

މިކަމާ ގުޅިގެން ފުލުހުން ބުނެފައިވަނީ، އަދަދު ނޫސް ބަލައިފާސް ކުރީ ފުލުހުން ހިންގަމުންދާ ޖިނާޢީ ތަހުގީގަކާ ގުޅިގެން ކަމަށެވެ. ނަމަވެސް އިތުރު ތަފްސީލެއް ނުދެއެވެ.

އަދަދުން، ރައީސުލްޖުމްހޫރިއްޔާއަށް ބޮޑެތި ތުހުމަތެއް ކޮށް ޑޮކިއުމަންޓްރީއެއް ހެދި މައްސަލާގައި އޭގައިވާ ހުރިހާ ވާހަކަތަކެއް ދޮގުކޮށް އެ ދޮގު ފެތުރި އެންމެންގެ މައްސަލަ ބަލައިދޭން އެދިވަޑައިގަންނަވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އިއްޔެ ވަނީ ވިދާޅުވެފަ އެވެ.