ބޭންކިން ޤާނޫނާ ހިލާފަށް ލޯނުދޫކުރަމުންދާ ވާހަކަ ޤައުމީ ބޭންކުން ދޮގުކޮށްފި

ބޭންކިން ޤާނޫނާ ހިލާފަށް ބޭންކް އޮފް މޯލްޑިވްސްއިން ލޯނު ދޫކުރަމުންގެންދާ ވާހަކަތައް އެ ބޭންކުން އަނެއްކާވެސް ދޮގުކޮށްފިއެވެ.

ސަރުކާރުން ކުރިއަށްގެންދާ މަޝްރޫޢުތައް ހިފައިގެން އުޅޭ އަމިއްލަ ކުންފުނިތަކަށް ބީއެމްއެލުން އުސޫލާ ހިލާފަށް ލޯނުތައް ދެމުންދާކަމަށް ބައެއް ފަރާތްތަކުން ފަތުރަމުންގެންދާ ވާހަކަތަކާ ގުޅިގެން ބީއެމްއެލްގެ ތަރުޖަމާން މުހައްމަދު ސައީދު އެކްސްގައި ކުރެއްވި ޕޯސްޓެއްގައި މިއަދު ވިދާޅުވީ، ރާއްޖޭގެ ބައެއް އަމިއްލަ ކުންފުނިތަކާއެކު ސަރުކާރުން ސޮއިކުރި މަޝްރޫއުތަކުގެ ކޮންޓްރެކްޓަރުންނަށް ޤައުމީ ބޭންކުން ފައިނޭންސް ދޫކުރަނީ ބޭންކިންގ ގާނޫނާ ޚިލާފަށްކަމަށް ފަތުރަމުންދާ ވާހަކަތަކަކީ އެއްވެސް އަސާސެއް ނެތި، އަދި ސައްހަ މައުލޫމާތުގެ މައްޗަށް ބިނާކޮށް ދައްކަމުންދާ ވާހަކައެއް ނޫން ކަމަށެވެ.

ސައީދު ވިދާޅުވީ ބީއެމްއެލުން ލޯނު ދޫކުރަމުން ދަނީ އަދި ކުރިޔަށް އޮތްތާގައި ލޯނު ދޫކުރަމުން ދާނީވެސް ދިވެހިރާއްޖޭގެ ބޭންކިންގ ގާނޫނާއި ގަވާއިދުތަކާ އަދި ބައިނަލްއަގުވާމީ މިންގަޑުތަކާ އެއްގޮތްވާ ގޮތުގެ މަތިން އެކުލަވާލެވިފައިވާ ބޭންކުގެ ކްރެޑިޓް ޕޮލިސީ ތަކާ އެއްގޮތަށް، މިނިވަންކަމާއެކު ބޭންކުގެ ބޯޑުން ނިންމާ ނިންމުންތަކުގެ ދަށުން ކަމަށެވެ. އެހެންކަމުން ސިޔާސީ ވަކި މަޤްސަދްތަކެއް ހާސިލްކުރުމަށް ބީއެމްއެލްގެ ހިއްސާދާރުންނާއި ކަސްޓަމަރުންނަށް ކަމުގެ ހަގީގަތް އޮޅޭގޮތަށް މައުލޫމާތު ނުފެތުރުމަށް ވަނީ އިލްތިމާސްކޮށްފައެވެ.

ބީއެމްއެލުން ވަނީ މީގެ ކުރިންވެސް އެ ބޭންކުން އުސޫލާ ހިލާފަށް ލޯނު ދޫކުރަމުންދާކަމަށް ބައެއް ފަރާތްތަކުން ދައްކަމުންގެންދާ ވާހަކަތައް ދޮގުކޮށްފައެވެ.

އެފަހަރު ބީއެމްއެލުން ބުނެފައިވަނީ އެ ބޭންކު ހިނގަމުންދަނީ ބޭންކުގެ ބޯޑުން ފާސްކުރާ ސްޓެރެޓެޖީގެ މައްޗަށް އަދި ހިންގުމުގެ އެކިދާއިރާތަކަށް ބޯޑުން ކަނޑައަޅާ ޕޮލިސީ ތަކާއި އެއްގޮތަށް ބޯޑުން ނިންމަވާ ނިންމެވުމާއި ދެއްވާ ލަފަޔާއި އިރުޝާދުގެ ދަށުން ކަމަށެވެ. ބޭންކުން ދޫކުރާ ލޯނުތަކަކީ ބޭންކުގެ ކްރެޑިޓް ޕޮލިސީ ތަކާއި އެއްގޮތަށް އަދި އެމްއެމްއޭއިން ކަނޑައަޅާފައިވާ ގަވާއިދުތަކާ އުސޫލުތަކާއި އެގޮތަށް ދޫކުރާ ލޯނުތަކެއް ކަމަށެވެ.

އެގޮތުން ލޯނު ދެއްކުމުގެ ގާބިލުކަން ހުރި ނެތް މިންވަރާއި، ސިންގަލް ބޮރޯވަރ އެކްސްޕޯޝަރ އަދި ގްރޫޕް ބޮރޯވާ އެކްސްޕޯޝަރ އަށްވެސް ބަލާކަން ފާހަގަކުރަމުން ބީއެމްއެލުން ބުނީ، ލޯނު ދިނުމުގެ ކުރިން އެ ލޯން އަނބުރާދެއްކުމުގެ ގާބިލުކަން ލޯނު ނަގާ ފަރާތަށް ލިބިގެންވަނީ ކިހާވަރަކަށްތޯ ވެސް ބޭންކުން އަބަދުވެސް ބަލާ ކަމަށެވެ. އަދި ލޯނު ދޭނީ އަންޑަރ ރައިޓިން އުސޫލާ އެއްގޮތަށް ކަމަށާއި، މިއީ ކޮންމެ ހާލަތެއްގައިވެސް ބޭންކުން ލޯނު ދޫކުރާނެ އުސޫލު ކަމަށް ބީއެމްއެލުން ވަނީ ބުނެފައެވެ.