ޓީޗަރުވަނީ ދަރިވަރު އަނގަމަތީ ޓޭޕްއަޅައި އަތްބަނުމަށްފަހު އަނިޔާކޮށްފައި: ކުއްޖާގެ އާއިލާ

ހާއްސައެހީއަށް ބޭނުންވާ ދަރިވަރަކަށް ޓީޗަރަކު އަނިޔާކުރި މައްސަލާގައި ކުއްޖާގެ އާއިލާގެ ފަރާތުން ޓީޗަރާމެދު ވަރަށް ސީރިއަސް ތުހުމަތުތަކެއް ކޮށްފިއެވެ.

ސެން ކްލާހުގައި ކިޔަވަމުން އަންނަ ހާއްސަ އެހީއަށް ބޭނުންވާ ކުއްޖާއަށް އަނިޔާކުރި މައްސަލަ ފެންމަތިވެ، އެންމެފަހުން ސްކޫލުގެ ފަރާތުން ވަނީ އެކަން އެޑިއުކޭޝަން މިނިސްޓްރީގެ ސަމާލުކަމަށްވެސް ގެނެސްފައެވެ. ވޮއިސްއަށް މައުލޫމާތު ލިބިފައިވާ ގޮތުގައި މިކަމެއް ހިނގައިގެން އުޅެނީ ކަލާފާނު ސްކޫލްގައެވެ.

ވޮއިސްއާ މައުލޫމާތު ހިއްސާކުރަމުން ހާއްސައެހީއަށް ބޭނުންވާ ކުއްޖާގެ އާއިލާގެ ފަރާތުން ވާހަކަދެއްކި މީހަކު ބުނީ، ކުއްޖާގެ ފަރާތުން ބުނެދޭ ވާހަކަތަކަށް ބަލާއިރު ޓީޗަރާމެދު ވަރަށް ސީރިއަސް ތުހުމަތުތަކެއް ކުރެވޭ ކަމަށެވެ. މިގޮތުން ކުއްޖާގެ އަނގަމަތީގައި ޓޭޕް އަޅައި އަތްބަނުމަށްފު ކުއްޖާއަށް އަނިޔާކުރާކަން ދޭހަވާކަމަށް އޭނާ ބުންޏެވެ. މި މައްސަލާގައި ބެލެނިވެރިޔާ ވަނީ ކްލާސްރޫމްތެރޭގެ ވީޑިއޯ ފޫޓޭޖްތައް ދެއްކުމަށް އެދިފައެވެ. ނަމަވެސް ސްކޫލުން އެކަންކޮށްދީފައި ނުވާކަން ބެލެނިވެރިޔާ ފާހަގަކުރިއެވެ.

"ކުއްޖާ އެބަ ބުނެދޭ މިހެން މިހެނޭ ހެދީ. ދެން އަޅުގަނޑުމެން އެދުނީ ވީޑިއޯ ފޫޓޭޖްދެއްކުމަށް. އޭރުންތާ ކަށަވަރުވާނީ.. ކުއްޖާގެ ފަރާތުން އަޅުގަނޑުމެނަށް ކަށަވަރުވޭ އަނިޔާކުރާކަން. ނަމަވެސް ވީޑިއޯއެއް ހުރިނަމަ އެ ބަލަން އަޅުގަނޑުމެން ބޭނުން. ސްކޫލުން އެ ދައްކަން ބޭނުންނުވާ ސަބަބެއް އަޅުގަނޑަކަށެއް ނުވިސްނޭ" ބެލެނިވެރިޔާ ބުންޏެވެ.

އޭނާ ބުނީ އެ ޓީޗަރު މިހާރު ކުލާހަށް ކިޔަވައިދޭން ނާންނަތާ ދެތިން ދުވަސް ވެދާނެ ކަމަށާއި ބަދަލުގައި މިހާރު އަންނަނީ، އެހެން ޓީޗަރެއްކަމަށް ކުއްޖާގެ ފަރާތުން އެނގިފައިވާކަމަށެވެ. ހާއްސަ އެހީއަށް ބޭނުންވާ ކުއްޖަކަށް އަނިޔާކުރުމަކީ، ބަލައިގަނެވޭނެ ކަމެއް ނޫންކަމަށެވެ.

މި މައްސަލާގައި ސްކޫލްގެ ބަހެއް އަދި ވަނީ ލިބޭގޮތް ނުވެފައެވެ.

ހާއްސަ އެހީއަށް ބޭނުންވާ ކުއްޖާއަށް އަނިޔާކުރި މައްސަލާގައި މިނިސްޓްރީން ވަނީ ޓީޗަރުގެ އެ މައްސަލަ ފުލުހުންނަށް ހުށަހަޅާފައެވެ. ފުލުހުންވެސް ވަނީ އެ މައްސަލަ އެޑިއުކޭޝަން މިނިސްޓްރީން ހުށަހަޅާފައިވާކަން މީޑިއާއަށް ކަށަވަރުކޮށްދީފައެވެ.

މި މައްސަލާގައި ކަންބޮޑުވުން ފާޅުކުރައްވައި އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވަނީ މިއީ ބަލައިގަނެވޭނެ ކަމެއް ނޫންކަމަށް ވިދާޅުވެ، މިފަދަ ކަންކަން ތަކުރާރު ނުވާނޭގޮތަށް ފިޔަވަޅުތައް އެޅުމަށް ވިދާޅުވެފައެވެ. މިނިސްޓަރު ވަނީ ދަރިވަރުންގެ ހައްގުތައް ހިމާޔަތްކޮށް އުފާވެރި އަމާން މާހައުލެއްގައި ތައުލީމް ހާސިލްކުރުމަށް ޓީޗަރުން ހާއްސަ ސަމާލުކަމެއް ދިނުމަށް އެދިވަޑައިގަންނަވާފައެވެ.