ޤައުމީ ޤުރުއާން މުބާރާތަށް ބޮޑެތި ބަދަލުތަކެއް: މުބާރާތް ތިން ބުރަކަށް ބަހާލައިގެން ކުރިއަށް ގެންދަނީ

ކޮންމެ އަހަރަކު ބާއްވަމުން އަންނަ ޤައުމީ ޤުރުއާން ކިޔެވުމުގެ މުބާރާތަށް މިއަހަރުން ފެށިގެން ބޮޑެތި ބަދަލުތަކެއް ގެނައުމަށް ކީރިތި ޤުރުއާނާ ބެހޭ ޤައުމީ މަރުކަޒުން ނިންމައިފިއެވެ.

ޤުރުއާނާ ބެހޭ މަރުކަޒުން އަލަށް އެކުލަވާލި ގަވާއިދުގައިވާ ގޮތުން، މި މުބާރާތުގައި ދެން ބައިވެރިވެވޭނީ އުމުރުން 26 އަހަރު ނުފުރޭ، މުބާރާތުގެ ޝަރުޠު ހަމަވާ ކޮންމެ ދިވެހި ރައްޔިތަކަށެވެ. މީގެ ކުރިން ސްކޫލްތަކާއި، އަތޮޅު ކައުންސިލްތަކާއި މުއައްސަސާތައް ތަމްސީލުކުރާ ގޮތަށް މުބާރާތް ބޭއްވި ނަމަވެސް، ދެން މި މުބާރާތް ކުރިއަށްދާނީ ފަރުދީ ގޮތުން ބައިވެރިވެވޭ ގޮތަށެވެ.

މުބާރާތް ބާއްވާނެ އައު އުސޫލު

މިފަހަރުގެ މުބާރާތް ކުރިއަށް ގެންދިއުމަށް ހަމަޖެހިފައިވަނީ ތިން ބުރަކަށް ބަހާލައިގެންނެވެ. އެއީ:

އޮޑިޝަން ބުރު

މުބާރާތުގައި ބައިވެރިވުމަށް ފޯމު ހުށަހަޅާ ފަރާތްތަކުގެ މެދުގައި މާލެއާއި އަތޮޅުތަކުގައި ކަނޑައެޅޭ ރަށްތަކެއްގައި އޮޑިޝަން ބާއްވާނެއެވެ. ބައިވެރިންނަށް އެންމެ ފަސޭހަ ރަށެއްގެ އޮޑިޝަނެއްގައި ބައިވެރިވުމުގެ ފުރުސަތު އޮންނާނެއެވެ.

ސެމީ ފައިނަލް

އޮޑިޝަނުން ކޮންމެ ކެޓަގަރީއަކުން 80 އިންސައްތައަށްވުރެ މަތިން މާކްސް ހޯދާ ކުދިންގެ ތެރެއިން އެންމެ މަތިން މާކްސް ލިބޭ 500 ބައިވެރިންނަށް މި ބުރުން ފުރުސަތު ލިބޭނެއެވެ.

ފައިނަލް ބުރު

ސެމީ ފައިނަލުގެ ކޮންމެ ކެޓަގަރީއަކުން 85 އިންސައްތައަށްވުރެ މަތިން މާކްސް ހޯދާ ބައިވެރިންގެ ތެރެއިން އެންމެ މަތިން މާކްސް ލިބޭ 150 ބައިވެރިން ފައިނަލް ބުރުގައި ވާދަކުރާނެއެވެ.

ފައިނަލް ބުރާއި އިނާމުތައް

މުބާރާތުގެ ފައިނަލް ބުރު ބޭއްވުމަށް ހަމަޖެހިފައިވަނީ މާލޭގައެވެ. އަތޮޅުތަކުން ފައިނަލަށް ހޮވޭ ބައިވެރިން މާލެ އައުމަށް އެލަވަންސެއް ދިނުމަށް ވަނީ ނިންމާފައެވެ. މި މުބާރާތް ކުރިއަށްދާނީ ހާފިޘުންގެ ބައިގެ އިތުރުން 8 އުމުރުފުރާއަކަށް ބަހާލައިގެންނެވެ.

މުބާރާތުގެ ނަތީޖާ ފާޅުކުރާއިރު، ބަލައިގެންނާއި ނުބަލައި ކިޔެވުމުގެ ގޮފިން ކޮންމެ އުމުރުފުރާއަކުން 1 ވަނަ، 2 ވަނަ އަދި 3 ވަނަ ހޮވާނެއެވެ. އަދި މުޅި މުބާރާތުން ބަލައިގެން، ނުބަލައި އަދި ހާފިޘުންގެ ބައިންވެސް ގަދަ ތިން ވަނަ ހޮވާނެއެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވާ ޚާއްޞަ އިނާމު ލިބޭނީ މި ތިން ބައިން 1 ވަނަ، 2 ވަނަ އަދި 3 ވަނައަށް ހޮވޭ ބައިވެރިންނަށެވެ.

ކީރިތި ޤުރުއާނާ ބެހޭ ޤައުމީ މަރުކަޒުން މަޢުލޫމާތުދޭ ގޮތުގައި، މިއަހަރުގެ މުބާރާތުގައި ބައިވެރިވުމުގެ ފުރުސަތު ވަރަށް އަވަހަށް އާންމުކޮށް ހުޅުވާލާނެއެވެ. މި ބަދަލުތަކަކީ ވީހާވެސް ގިނަ ފަރާތްތަކަކަށް މުބާރާތުގައި ބައިވެރިވުމުގެ ފުރުސަތު ފަހިކޮށްދީ، މުބާރާތުގެ ފެންވަރު މަތިކުރުމަށް ގެނައި ބަދަލުތަކެއް ކަމަށް އެ މަރުކަޒުން ބުނެއެވެ.

މުޅި މުބާރާތުން އެކި ބައިތަކުން 1ވަނަ ހާސިލުކުރާ ފަރާތްތަކަށް އެ ފަރާތަކުން ތަޢުލީމް ޙާސިލްކުރަން ބޭނުން ދާއިރާއަކުން، ބޭނުންވާ ގައުމަކުން ޕީއެޗްޑީއާ ހަމަޔަށް ތަޢުލީމް ޙާސިލް ކުރުމަށް ރައީސުލްޖުމްހޫރިއްޔާގެ ޚާއްޞަ ސްކޮލަރޝިޕް ދިނުމަށް ވަނީ ނިންމާފައެވެ.