މިއަދުން ފެށިގެން"ހިޔާވެހި ޕޯޓަލް" މެދުވެރިކޮށް ހައުސިންގ ލޯނަށް އެދެވޭނެ

ބޯހިޔާވަހިކަމަށް ގެދޮރު އިމާރާތްކުރުމަށް ފަސް ޕަސެންޓުގެ އިންޓަރެސްޓަށް ވުރެ ބޮޑު ނޫން އިންޓަރެސްޓު ރޭޓުގައި ދޭ ލޯނަށް، "ހިޔާވެހި ޕޯޓަލް" މެދުވެރިކޮށް މިއަދުން ފެށިގެން އެދެވޭނެ ކަމަށް ހައުސިން މިނިސްޓްރީން ބުނެފިއެވެ.

ހައުސިން މިނިސްޓްރީން އެކސްގައި ކުރި ޕޯސްޓެއްގައި ބުނިގޮތުގައި ހިޔާވެހި ޕޯޓަލް މެދުވެރިކޮށް، ހިޔާވެހި ފައިނޭންސިން ޕްރޮގްރާމްގައި މިއަދުން ފެށިގެން ބައިވެރިވެވޭނެއެވެ. އަދި މި ޕޯޓަލްއަށް އީފާސް މެދުވެރިކޮށް ލޮގްއިން ވެވޭނެއެވެ.

ގެދޮރު އިމާރާތްކުރުމަށް 5 އިންސައްތައިގެ އިންޓަރެސްޓް ރޭޓެއްގައި ލޯނު ދޫކުރާ "ހިޔާވަހި ފައިނޭންސިން ޕްރޮގްރާމް" ރަސްމީކޮށް ފައްޓަވާފައިވަނީ މިމަހު 5 ވަނަ ދުވަހުއެވެ.

މި ޕްރޮގްރާމް ހިންގުމަށް ސަރުކާރުން ވަނީ ތިން ބޭންކަކާ ގުޅިގެން މަސައްކަތް ފަށާފައެވެ. އެއީ؛

1) ހައުސިންގ ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ)،

2) ބޭންކް އޮފް މޯލްޑިވްސް (ބީއެމްއެލް) އަދި

3) މޯލްޑިވްސް އިސްލާމިކް ބޭންކް (އެމްއައިބީ) އެވެ.

މި ޕްރޮގްރާމްގެ ދަށުން ލޯނު ދޫކުރެވޭނީ ތިން ކެޓަގަރީއަކަށެވެ:

1. ހިޔާވަހި ރަށްވެހި: މި ކެޓަގަރީގެ ދަށުން ރަށްރަށުގައި ގެދޮރު އިމާރާތްކުރުމަށް 1 މިލިއަން ރުފިޔާއާ ހަމައަށް އެޗްޑީއެފްސީ މެދުވެރިކޮށް ލޯނު ދޫކުރެވޭނެއެވެ. މި ލޯނަށް އިކުއިޓީ ބޭނުމެއް ނުވެއެވެ. ނަމަވެސް މިނިސްޓްރީން ކަނޑައަޅާ އަގެއްގައި ބަންޑާރަ ގޯތި މިލްކުކުރަން ފީއެއް ދައްކަން ޖެހޭނެއެވެ.

މި ލޯނު ދޫކުރަނީ 25 އަހަރުން އަނބުރާ ދައްކާ ގޮތަށް %5 އިންޓަރެސްޓްގައެވެ.

2. ހިޔާވަހި ސަހަރު: މި ކެޓަގަރީގެ ދަށުން އާބާދީ ބޮޑެތި އާބަން ސެންޓަރުތަކުގައި ގެދޮރު އިމާރާތްކުރުމަށް 3 މިލިއަން ރުފިޔާއާ ހަމައަށް ބީއެމްއެލް އަދި އެމްއައިބީ މެދުވެރިކޮށް ލޯނު ދޫކުރެވޭނެއެވެ.

މި ލޯނު ދޫކުރަނީ 25 އަހަރުން އަނބުރާ ދައްކާ ގޮތަށް %5 އިންޓަރެސްޓްގައެވެ.

3. ހިޔާވަހި ފުރަ މާލެ: މި ކެޓަގަރީގެ ދަށުން ގްރޭޓަރ މާލެ ސަރަޙައްދުގައި ގެދޮރު އިމާރާތްކުރުމަށް 6 މިލިއަން ރުފިޔާއާ ހަމައަށް ބީއެމްއެލް އަދި އެމްއައިބީ މެދުވެރިކޮށް ލޯނު ދޫކުރެވޭނެއެވެ.

މި ލޯނަށް އިކުއިޓީއަށް 10% ނަގާއިރު، މިއީވެސް %5 އިންޓަރެސްޓްގައި 25 އަހަރުން އަނބުރާ ދައްކާ ގޮތަށް ދޫކުރެވޭ ލޯނެކެވެ.

މި ސްކީމުގެ ދަށުން 600 އަކަފޫޓަށް ވުރެ ކުދި ބިންތައް އެއްކޮށްލައިގެން ގެ ހަދަން ވެސް ލޯނު ދުކުރާނެވެ. އެގޮތަށް ދޫކުރާ ލޯނުގައި 6 މިލިއަން ރުފިޔާގެ އިތުރަށް އިތުރުކުރާ ކޮންމެ ބިމަކަށް 1 މިލިއަން ރުފިޔާ ލިބޭއިރު މިގޮތުން ޖުމްލަ ދޫކުރާނީ 10 މިލިއަން ރުފިޔާ އެވެ.

ސަރުކާރުން މަޢުލޫމާތު ދެއްވާފައިވާ ގޮތުގައި މި ޕްރޮގްރާމްގެ މަޤްޞަދަކީ މާލީ ދަތިކަމުގެ ސަބަބުން ގެދޮރު އިމާރާތްކުރަން ނުފެށިފައިވާ ނުވަތަ ފަށައިގެން ނުނިމި ހުރި ފަރާތްތަކަށް އެހީތެރިވުމެވެ. އަދި މާލޭގެ ތޮއްޖެހިފައިވާ ސަރަޙައްދުތަކުގައި ކުދި ގޯތިތައް އެއްކޮށްގެން ގެދޮރު އިމާރާތްކުރުމަށްވެސް މި ޕްރޮގްރާމުން އެހީތެރިކަން ފޯރުކޮށްދޭނެއެވެ.