މޮރޮކޯގެ ބޮޑުވަޒީރު ދެއްވި ކާޕެޓް އޮތީ ފޮރިން މިނިސްޓްރީގައި: މިނިސްޓްރީ

ދާދިފަހުން ފޮރިން މިނިސްޓަރ އަބްދުﷲ ޝާހިދު މޮރޮކޯއަށް ކުރެއްވި ދަތުރުފުޅެއްގައި އެމަނިކުފާނަށް ހަދިޔާއެއްގެ ގޮތުގައި ލިބުނު އަގުބޮޑު ކާޕެޓް އެބޭފުޅާގެ ގެއަށް ނުގެންދާކަމަށް ފޮރިން މިނިސްޓްރީން ބުނެފިއެވެ.

ވޮއިސްއަށް މައުލޫމާތު ދެއްވަމުން ފޮރިން މިނިސްޓްރީގެ ކޮމިއުނިކޭޝަންސް ޑިރެކްޓަރ މިއުވާން މުހައްމަދު ވިދާޅުވީ މޮރޮކޯގެ ބޮޑުވަޒީރު ހަދިޔާއެއްގެ ގޮތުގައި ޝާހިދަށް ދެއްވި ކާޕެޓް އެބޭފުޅާގެ ގެއަށް ގެންގޮސްފައިވާ ނުވާކަމަށާއި، އެ ކާޕެޓް އޮތީ މިިނިސްޓްރީގައި ކަމަށެވެ.

އަދި ފޮރިން މިނިސްޓްރީން މިފަދަ ހާލަތްތަކުގައި އަބަދުވެސް އަމަލުކުރަންޖެހޭ ގަވާާއިދުތަކާއި އުސޫލުތަކަށް ތަބާވާނެކަމަށް މިއުވާން ވަނީ ވިދާޅުވެފައެވެ.

ފާހަގަކޮށްލެވޭ ގޮތުގައި މިނިސްޓަރު އަބްދުﷲ ޝާހިދުގެ ގެއަށް ކާޕެޓެއް ގެންދިޔަ ކަމަށް ބުނެ، އަމިއްލަ ފަރާތަކުން ވަނީ އޭސީސީއަށް ވަނީ މައްސަލައެއް ހުށައަޅާފައެވެ.

'ވޮއިސް'' އަށް މައުލޫމާތު ދެއްވަމުން އޭސީސީގެ މީޑިއާ އޮފިޝަލު މިއަދު ވިދާޅުވީ، މިނިސްޓަރު އަބްދުﷲ ޝާހިދުގެ ގެޔަށް ކާޕެޓެއް ގެންދިޔަ ކަމަށް ބުނެ، އަމިއްލަ ފަރާތަކުން އެކޮމިޝަނަށް މައްސަލަ ހުށަހަޅާފައިވާކަމަށެވެ.

އޭނާ ވިދާޅުވީ އެމައްސަލަ ހުށަހެޅީ މިއަދު ކަމަށާއި މިހާރު މައްސަލައި ބަލައިގެންފައިވާކަމަށެވެ.

ރަސްމީ ހައިސިއްޔަތުން، ބޭރު ގައުމުތަކަށް ކުރާ ޒިޔާރަތްތަކުގައި އެގަުމުތަކުން ހަދިޔާގެ ގޮތުގައި ލިބޭ ތަކެތި ދިވެހި ދައުލަތާއި ހަވާލު ކުރަން ޖެހެއެވެ. އަދި އެއީ ގާނޫނު ލާޒިމް ކުރާ ކަމެެކެވެ.