ދޮށީ އުމުރުގެ އާބާދީ އިތުރުވާއިރު، ރައްކާތެރިކަން ކަށަވަރުކުރުމަށް ރަނގަޅު ޕްލޭނެއް މުހިންމު: ވަޒީރު

ދިވެހިރާއްޖޭގައި ދޮށީ އުމުރު މީހުންގެ އާބާދީ އިތުރުވަމުންދާއިރު، އެ މީހުންނަށް ރައްކާތެރިކަމާއެކު އުޅެވޭނެ މުޖުތަމަޢުއެއް ބިނާ ކުރުމަށް ރަނގަޅު ޕްލޭނެއް ބޭނުންވާނެ ކަމަށް އިޖުތިމާޢި ތަރައްގީއާބެހޭ ވަޒީރު ޑރ. ޢާއިޝަތު ޝިހާމް ވިދާޅުވެއްޖެއެވެ.

ދޮށީ އުމުރުގެ މީހުންގެ ގައުމީ އެކްޝަން ޕްލޭން (ނޭޕާާ) އިފްތިތާހު ކުރުމަށް އިއްޔެ ބޭއްވި ރަސްމިއްޔާތުގައި ވާހަކަދައްކަވަމުން ވަޒީރު ވިދާޅުވީ، ކޮންމެ ފަރުދަކަށްވެސް އިއްޒަތްތެރިކަމާއި، ސަލާމަތްތެރިކަމާއި، ހަމަހަމަ ފުރުޞަތުތަކާއެކު ދިރިއުޅުމުގެ ހައްގު ލިބިގެންވާނެ ކަަމަށާ އެކަން ކަށަވަރުކުރުމަށް ސަރުކާރުން އަބަދުވެސް ވަރަށް ބޮޑު ސަމާލުކަމެއް ދެއްވާކަމަށެވެ.

ދިވެހިރާއްޖޭގެ އާބާދީއަށް ބޮޑު ބަދަލުތަކެއް އަންނަމުންދާއިރު، 2050 ވަނަ އަހަރުގެ ނިޔަލަށް ރާއްޖޭގެ އާބާދީގެ 14 އިންސައްތަ އުމުރުން ދޮށީ މީހުންނަށް ވާނެކަމަށް ލަފާކޮށްފައިވާކަން ވަޒީރު ފާހަގަކުރެއްވިއެވެ. އަދި، އާބާދީގެ މި ބަދަލަށް ތައްޔާރުވެ، ކަންކަން ރާވައި، ސިޔާސަތުތައް ތަންފީޒު ކުރުމަށް ރާއްޖެއަށް އޮތީ އެންމެ 25 އަހަރު ކަމަށެވެ.

"ހުރިހާ ޖީލުތަކަށް ރައްކާތެރިކަން ލިބި، ކުރިއެރުން ލިބޭނެ ނިޒާމެއް ގާއިމް ކުރުމަށް ރަނގަޅު ބިންގަލެއް އެޅުމަކީ މުހިންމު ކަމެއްކަމުގައި ސަރުކާރުން ދެކެން. ރައީސް ޑރ. މުޙައްމަދު މުޢިއްޒުގެ މި ސަރުކާރުގެ އަމާޒަކީ އަޅާލާ، ޝާމިލް މުޖުތަމަޢެއް ބިނާކުރުން“ ވަޒީރު ވިދާޅުވިއެވެ.

މީގެ އިތުރުން، މާލޭގަޔާއި ރާއްޖޭގެ ރަށް ރަށުގައި އިސް ރަށްވެހިންގެ ނާދީތައް ހެދި، އޯލްޑް އޭޖް ހޯމްތައް ހެދިގެން ދިޔުމަކީ ދޮށީ މީހުންނަށް ގުޅިގެން މަސައްކަތްކުރުމާއި، ބައިވެރިވުމާއި، ދިރިއުޅުމުގައި ކުރިއެރުމަށް ފުރުސަތުތައް ފަހިކޮށްދޭނެ ކަމެއްކަންވެސް ފާހަގަކުރެއްވިއެވެ. އަދި އޯލްޑްއޭޖް ހޯމްތައް ގާއިމްކުރުމަށް ސަރުކާރުން ކުރަމުންދާ މަސައްކަތްތަކަކީ މި ސަރުކާރުން އުމުރުން ދޮށީ މީހުންނަށް ދޭ އަޅާލުން ރަމްޒުކޮށްދޭ ތާރީޚީ މަޝްރޫޢެއްކަމަށްވެސް ވިދާޅުވިއެވެ.

މިއާއެކު ވަޒީރު ވަނީ ދޮށީ އުމުރުގެ މީހުންގެ ދިރިއުޅުމަށް ހެޔޮ ބަދަލެއް ގެނައުމަށް ފެށުނު އާ ބާބައިގެން ކުރިއަށް ދިޔުމަށް ހުރިހާ މުއައްސަސާތަކުގެ އެއްބާރުލުމާއި، އިޖްތިމާޢީ އެއްބައިވަންތަކަން ދެމެހެއްޓުމަށް އެދިވަޑައިގެންފައެވެ.