ދެމަސްދުވަހުގެ ތެރޭގައި 155 މިލިޔަން ރުފިޔާގެ ލޯން ދައްކައިފި

ފާއިތުވި ދެމަސްދުވަހުގެ ތެރޭގައި ލޯން އަނބުރާ ދެއްކުމަށް ސަރުކާރުން 155މިލިޔަން ރުފިޔާ ޚަރަދުކޮށްފިއެވެ.

ފިނޭންސް މިނިސްޓްރީން އާންމުކުރި ދައުލަތުގެ ހަރަދާއި އާމްދަނީގެ ތަފާސްހިސާބުތަކުން ދައްކާގޮތުގައި ފާއިތުވި ދެމަސްދުވަހުގެ ތެރޭގައި ދައުލަތުން ވަނީ ނަގާފައިވާ ލޯންތައް އަނބުރާ ދެއްކުމަށް 155 މިލިއަން ރުފިޔާ ހަރަދުކޮށްފައެވެ.

ސަރުކާރުން ލަފާކުރާ ގޮތުގައި ލޯންތައް ދެއްކުމަށް 2.9 ބިލިއަން ރުފިޔާ މިއަހަރު ހަރަދުވާނެއެވެ.

މިއަހަރު ރައްޔިތުން މަޖިލީހުން ފާސްކޮށްދިން 27.3 ބިލިއަން ރުފިޔާގެ ބަޖެޓްގެ ތެރެއިން 3.4 ބިލިއަން ރުފިޔާ ވަނީ ސަރުކާރުން ވަނީ މިހާތަނަށް ހަރަދުކޮށްފައެވެ. އެހެން ކަމުން މަޖިލީހުން ފާސްކޮށްދިން ބަޖެޓްގެ ތެރެއިން 12 ޕަސެންޓް މިހާތަނަށް މި ވަނީ ހަރަދުކޮށްފައެވެ.

ފެބުރުއަރީ މަހުގެ ނިޔަލަށް ހިލޭ އެހީއާ އެކު އާމްދަނީގެ ގޮތުގައި ލިބިފައި ވަނީ 4.2 ބިލިއަން ރުފިޔާކަމަަށްވެސް ތަފާސްހިސާބުތަކުން ދައްކައެވެ.