އެލް ނީނޯގެ ގަދަ ހޫނުން 451،000 މީހުންގެ ފުރާނައަށް ނުރައްކާވެދާނެ ކަމުގެ އިންޒާރު ދީފި

އެލް ނީނޯ މޫސުމީ ހާދިސާއާ ގުޅިގެން ދުނިޔޭގެ ހޫނުމިން އާދަޔާޚިލާފަށް މައްޗަށް ގޮސް އަންނަ އަހަރުގެ ފެބްރުއަރީގެ ނިޔަލަށް 451000 މީހުން މަރުވެދާނެ ކަމަށް ޔުނިވަރސިޓީ އޮފް ޗިކާގޯގެ ކްލައިމެޓް އިމްޕެކްޓް ލެބުން ޝާއިޢުކުރި ދިރާސާއަކުން ހާމަވެއްޖެއެވެ.

އެ ދިރާސާ ރިޕޯޓުގައިވާ ގޮތުން ގަދަ ހޫނާއި ވައި ތަޣައްޔަރުވުމާއި ޖަންގަލީގައި ރޯވުން ފަދަ ހާދިސާތަކުގެ ސަބަބުން އެންމެ ބޮޑު ގެއްލުމެއް ލިބޭނީ ކުރިންވެސް ހޫނު ގަދަވުމާއި ކާބޯތަކެއްޗާއި ހަކަތައިގެ ދަތިކަން ކުރިމަތިވެފައިވާ ފަގީރު ޤައުމުތަކަށެވެ.

މީގެ އިތުރުން އިޤްތިޞާދަށް ކުރިމަތިވެފައިވާ ނޭދެވޭ އަސަރުތަކުން މި ޙާލަތު އިތުރަށް ގޯސްވާ ކަމަށް ވެސް އެ ރިޕޯޓުގައި ބަޔާންކޮށްފައިވެއެވެ.

ދުނިޔޭގެ 24000 އަށް ވުރެ ގިނަ ސަރަޙައްދުގެ ފިނިހޫނުމިނާއި މަރުގެ ތަފާސްހިސާބުތައް ތަޙުލީލުކޮށްގެން އެކުލަވައިލި މި ދިރާސާ ދައްކާ ގޮތުން އެންމެ ބޮޑު ގެއްލުމެއް ކުރިމަތިވާނީ އެފްރިކާ ބައްރުގެ ސާހެލް ސަރަޙައްދަށެވެ. އެ ސަރަޙައްދުން އެކަނިވެސް 66800 މީހުން މަރުވެދާނެ ކަމަށް އަންދާޒާކޮށްފައިވެއެވެ.

ސާހެލްގެ އިތުރުން ފިލިޕީންސް ވިއެޓްނާމް ތައިލެންޑް އަދި ކެމްބޯޑިއާއިން 19400 މީހުން އިންޑޮނޭޝިއާއިން 19300 މީހުން އިންޑިއާއިން 15800 މީހުން އަދި ބްރެޒިލުން 13300 މީހުން މަރުވެދާނެ ކަމަށް ރިޕޯޓުގައި ފާހަގަކޮށްފައިވެއެވެ.

ދިރާސާގައި އިސްކޮށް މަސައްކަތްކުރެއްވި މައިކަލް ގްރީންސްޓޯން ވިދާޅުވެފައިވަނީ ފެބްރުއަރީ ހިސާބުގައި އެލް ނީނޯގެ ސީދާ އަސަރުތައްކުރުން ނިމުނު ކަމުގައި ވިޔަސް ގަދަ ހޫނުގެ ނުރައްކާ އަންނަ އަހަރުގެ ހޫނު މޫސުމާ ހަމައަށް ދެމިގެންދާނެ ކަމަށެވެ.

ތަރައްޤީވެފައިވާ ޤައުމުތަކުގައި ފިނިކުރާ ނިޒާމާއި ފެނާއި ޞިއްޙީ ޚިދުމަތް ފުރިހަމަވުމުން ރައްކާތެރިކަން ލިބުނަސް ވަސީލަތް މަދު ޤައުމުތަކުގައި ހޫނުމިން ކުޑަކޮށް މައްޗަށް ދިޔައީމާ ވެސް ފުރާނައަށް ބޮޑު ނުރައްކަލެއް ކުރިމަތިވާ ކަމަށް އޭނާ ބުނެފައިވެއެވެ.

މި ނުރައްކާތަކުން ސަލާމަތްވުމަށް ހޫނުގެ އިންޒާރުދޭ ނިޒާމުތައް ވަރުގަދަކޮށް ރައްޔިތުންނަށް ހިޔާވެއްސާއި ސާފު ބޯފެން ފޯރުކޮށްދިނުމަށް ދިރާސާވެރިން ވަނީ ސަރުކާރުތަކަށް ގޮވައިލައިފައިވެއެވެ.