ރާއްޖެ އާއި ޗައިނާއާ ދެމެދު 20 އެއްބަސްވުމެއްގައި ސޮއިކޮށްފި

ދިވެހިރާއްޖެ އާއި ޗައިނާއާއި ދެމެދު 20 އެމްއޯޔޫއެއްގައި މިއަދު ސޮއިކޮށްފިއެވެ.

އެ އެމްއޯޔޫތަކުގައި ދެ ޤައުމުގެ ސަރުކާރުގެ އިސް އޮފިޝަލުން ސޮއި ކުރައްވާފައި ވަނީ ރާއްޖޭގެ ރައީސް ޑރ. މުހައްމަދު މުއިއްޒާއި  ޗައިނާގެ ރައީސް ޝީ ޖިންޕިން ބައިވެރިވެ ވަޑައިގެންނެވި ރަސްމިއްޔާތެއްގައި އެ ދެބޭފުޅުންގެ ކުރިފުޅު މަތީގައެވެ.

ރާއްޖޭގެ ރައީސުލް ޖުމުހުރިއްޔާ ޑރ. މުހައްމަދު މުއިއްޒުގެ ދެމަފިރި ކަނބަލުން މިހާރު ޗައިނާއަށް ކުރައްވަމުން ގެންދަވާ ފުރަމާނަ ދަތުރުފުޅުގެ ތެރޭގައި ހިމެނިގެން ދެ ޤައުމުގެ ދެމެދުގައި މިއަދު ސޮއި ކުރެވުނު  އެމްއޯޔޫތަކުގެ ތެރޭގައި ބެލްޓް އެންޑް ރޯޑް ކޯޕަރޭޝަން އެންޑް ބްލޫ ޕާޓްނަޝިޕާއި، ކާބަން މަދުކުރުމާއި ބްލޫ އިކޮނޮމިކް ކޯޕަރޭޝަން އެމްއޯޔޫ ހިމެނެއެވެ.

ހަމަ މިއާއި އެކު ކާރިސާތައް މަދުކުރުމަށް ދެ ޤައުމު ގުޅިގެން މަސައްކަތް ކުރުމާއި ގްރީން ޑިވެލޮޕްމަންޓް އެމްއޯޔޫ އަކާއި ޑިޖިޓަލް ދާއިރާ ތަރައްޤީ ކުރުމާއި ސޯޝަލް ހައުސިން އާއި އެއާޕޯޓް ތަރައްޤީ ކުރުމުގެ އެމްއޯޔޫއެއް ވެސް މިއަދު ސޮއިކުރެވުނު އެމްއޯޔޫތަކުގެ ތެރޭގައި ހިމެނެއެވެ.

ޖުމުލަ ގޮތެއްގައި މި އެއްބަސްވުންތަކުގެ ތެރޭގައި ހިމެނެނީ އިޤްތިޞާދީ ދާއިރާ، ތިމާވެށީގެ ދާއިރާ، މީޑިއާގެ ދާއިރާ، މަސްވެރިކަމުގެ ދާއިރާއާއި، ބޯހިޔާވަހިކަމާއި، އުމްރާނީ ތަރައްޤީއާ ގުޅޭ އެކި ދާއިރާތަކާއި ގުޅުންހުރި އެއްބަސްވުންތަކެވެ.

ޗައިނާގެ ރައީސް ޝީ ޖިންޕިންގެ ދައުވަތަކަށް ރައީސް ޑރ. މުއިއްޒުގެ ދަކަނބަލުން  ޗައިނާ އަށް ކުރައްވަމުން މި ގެންދަވާ ފުރަމާނަ ދަތުރުފުޅުގައި ޗައިނާއަށް  ވަޑައިގެންނެވީ މިދިޔަ ހޯމަ ދުވަހު އެވެ. އެ މަނިކުފާނު ފުރަތަމަ ވަޑައިގެންނެވީ ފުޖިއާން ޕްރޮވިންސަށެވެ.

ފުޖިއާން ޕްރޮވިންސް ގައި  ރާއްޖޭގެ ފަރާތުން ބޭއްވި އިންވެސްޓްމަންޓް ފޯރަމް އިފުތިތާހު ކޮށްދެއްވައި ރައީސް ޑރ. މުހައްމަދު މުއިއްޒު ވަނީ ތަޤުރީރު ކުރައްވާފައެވެ. އެ ފޯރަމްގައި ޗައިނާގެ އެންމެ މަޝްޙޫރު ވަރުގަދަ ވިޔަފާރިވެރިން ހިމެނެނޭނެހެން 300 އަށް ވުރެ ގިނަ މަންދޫބުން ބައިވެރިވެ ވަޑައިގެންނެވިއެވެ.

ރައީސް ޑރ.މުހައްމަދު މުއިއްޒުގެ މި ދަތުރުފުޅުގައި އެމަނިކުފާނުގެ އަރިހުގައި ރާއްޖޭގެ މަތީފަންތީގެ ވަފުދެއްވެސް ބައިވެރިވެ ވަޑައިގަންނަވައވެ.