އދ.ގެ ވިޔަފާރިއާއި ތަރައްގީއާގުޅޭ ކޮންފަރެންސްގައި ރާއްޖެއިން ތަގުރީރުކުރަނީ

އދ. ގެ ވިޔަފާރިއާއި ތަރައްގީއާ ގުޅޭ ކޮންފަރެންސްގައި ރާއްޖޭގެ ފަރާތުން ތަގުރީރުކުރަން ހަމަޖެހިއްޖެއެވެ.

މިމަހުގެ ނުވަޔަކުން ތޭރައިގެ ނިޔަލަށް ކުރިއަށްގެންދާ މިކޮންފަރެންސްގައި ރާއްޖޭގެ ފަރާތުން ތަގުރީރުކުރައްވާނީ އެންވަޔަރަންމަންޓް މިނިސްޓަރު ޑރ. ހުސައިން ރަޝީދު ހަސަނެވެ. "ޔޫއެން ޓްރޭޑް ފޯރަމް - އެސްޑީޖީސް އެންޑް ކްލައިމެޓް ޗޭންޖް" ކޮންފަރެންސްގައި ރާއްޖެއިން ވަކާލާތުކުރާނީ މޫސުމަށް އަންނަ ބަދަލުތަކުގެ ސަބަބުން ކުދި ޖަޒީރާ ގައުމުތަކުގެ ވިޔަފާރިއާއި އިގުތިސާދާއި އަދި ދެމެހެއްޓެނިވި ތަރައްގީއަށް ކުރާ ނޭދެވޭ އަސަރުތަކާއި ގުޅޭގޮތުންނެވެ.

މިބައްދަލުވުމުގައި މައިގަނޑު ގޮތެއްގައި މަޝްވަރާ ކުރާނީ، މޫސުމަށް އަންނަ ބަދަލުތަކާއި، ދެމެހެއްޓެނިވި ތަރައްގީގެ ލަނޑުދަނޑިތައް ހާސިލް ކުރުމުގައި، ވިޔަފާރިއާއި އިގުތިސާދުތަކަށް ކުރަމުންދާ އަދި ކޮށްފާނެ އަސަރުތަކާއި އަދި އެފަދަ ކަންކަން ކުޑަކުރުމަށް ގައުމުތައް ގުޅިގެން ކުރެވިދާނެ ކަންތައްތަކުގެ މައްޗަށެވެ.

މޫސުމަށް އަންނަމުންދާ ބަދަލުތަކާއި ގުޅިގެން ރާއްޖެފަދަ ގައުމުތަކަށް ލިބެމުންދާ ގެއްލުންތަކާއިމެދު ގައުމުތައް ހޭލުންތެރިކުރުމަށް ރާއްޖެއިން އަންނަނީ ބައިނަލްއަގުވާމީ މައިދާނުގައި ވަކާލާތުކުރަމުންނެވެ.

މި ބައްދަލުވުމަކީ އދ.ގެ ޖެނެރަލް އެސެމްބްލީ ގެ ހަވާސާގައި މި މަހުގެ 23ގައި ނިއުޔޯކުގައި ބޭއްވުމަށް ހަމަޖެހިފައިވާ ކްލައިމެޓް ސަމިޓަށް ތައްޔާރުވުމުގެ ގޮތުން، އދ.ގެ ކޮންފަރަންސް އޮން ޓްރޭޑް އެންޑް ޑިވެލޮޕްމަންޓްގެ ފަރާތުން އިންތިޒާމުކޮށްގެން، ބާއްވާ ބައްދަލުވުމެކެވެ.