ރާއްޖޭގައި އީވޮލެޓުގެ ހިދުމަތް ގާއިމުކުރަނީ

ރާއްޖޭގައި ކްރިއޭޓިވް އިކޮނޮމީ ގާއިމު ކުރުމުގެ ގޮތުން އޮންލައިން ޕޭމެންޓް ޕްލެޓްފޯމް ތައް މެދުވެރިކޮށް ފައިސާ ލިބިގަތުމަށް ހުރި ހުރަސްތައް ނައްތާލުމަށް ރާއްޖޭގައި އީވޮލެޓް ގެ ހިދުމަތް ގާއިމު ކުރުމަށް ސަރުކާރުން ބޭންކް އޮފް މޯލްޑިވްސް އާއި އެކު މަސައްކަތް ފަށާފައިވާކަމަށް ރައީސް އޮފީހުން ބުނެފިއެވެ.

ރައީސް އޮފީހުގައި ރޭ ކުރިއަށް ގެންދިޔަ ނޫސްވެރިންގެ ބައްދަލުވުމެއްގައި ޕްރިންސިޕަލް ސެކެޓްރީ ޓު ދަ ޕްރެސިޑެންޓް އޮން ޕަބްލިކް ޕޮލިސީ އަބްދުالله ނާޒިމް އިބްރާހިމް ވިދާޅުވީ ގިނަ ވެގެން އެއް ހަފްތާތެރޭގައި އެ މަސައްކަތްތައް ފެށުމަށް ހަމަޖެހިގެންދާނެކަމަށެވެ.

"ރާއްޖޭގައި ކްރިއޭޓިވް އިކޮނޮމީ ގާއިމު ކުރުމުގެ ގޮތުން ސަރުކާރުން ގާއިމު ކޮށް ތަންފީޒު ކުރުމަށްޓަކައި އެންމެ މުހިންމު އެއް ކަމަކީ ރާއްޖޭގައި އޮންލައިން ޕޭމެންޓް ޕްލެޓްފޯމް ތައް މެދުވެރިކޮށް ފައިސާ ލިބިގަތުމަށް ހުރި ހުރަސްތައް ނައްތާލުން ކަމަށް ވާތީ ރާއްޖޭގައި އީވޮލެޓް ގެ ހިދުމަތް ގާއިމު ކުރުމަށްޓަކައި ބޭންކް އޮފް މޯލްޑިވްސް ގައި ދަންނަވައިގެން ގިނަ ވެގެން އެއް ހަފްތާ ތެރޭގައި ސަރުކާރުން ބޭނުންވާ ގޮތަށް އެކަން ހަމަޖެއްސުމުގެ މަސައްކަތް ފެށުން."

ނާޒިމް ވިދާޅުވިއެވެ.

މީގެ އިތުރުންވެސް ނާޒިމް ވިދާޅުވީ  އީކޮމާސް ޕްލެޓް ފޯމެއް ކަމަށްވާ ޕޭޕަލްސް އަށް އެކްސެސް ހޯދުމާއި ބެހޭގޮތުން އެމެރިކާގެ ސަރުކާރާއި މަޝްވަރާ ކުރައްވައިގެން މި ހިދުމަތަށް އެކްސަސް ލިބޭނެ ގޮތް ހޯދުމާއި މިކަމާއި ގުޅޭ އެހެނިހެން ފަރާތްތަކާއި މަޝްވަރާ ކޮށްގެން ޕޭޕަލްސް ފަދަ އެހެން ޕްލެޓްފޯމް ތަކަށް ވެސް އެކްސަސް ހޯދުމަކީވެސް މި ސަރުކާރުން ކަނޑައަޅާފައިވާ މަސައްކަތެއް ކަމަށެވެ.

މިއީ އިންޓަނެޓާއި ސައިބާ ސެކިއުރިޓީ އާއި ވަރަށް ބޮޑަށް ގުޅިފައިވާ ކަމަކަށް ވާތީ، ސައިބާ ސެކިއުރިޓީގެ ގާނޫނެއް ވުޖޫދަށް ގެނައުމަށްޓަކައި އެކަމަށް ހާއްސަ ބިލެއް ޑްރާފްޓް ކުރުމުގެ މަސައްކަތް ވެސް މި މަސައްކަތް ތަކާއި އެކު ކުރިއަށް ދާނެކަން ވެސް ނާޒިމް ފާހަގަކުރެއްވިއެވެ.

އަދި  ރާއްޖޭގެ ސައިބާ ސެކިއުރިޓީ ވަރުގަދަ ކުރުމަށްޓަކައި ސަރުކާރަށް މިހާރު އެހީތެރިކަން ދެއްވުމަށް ތައްޔާރަށް އޮތް ދެ ގައުމު ކަމުގައިވާ ޔުނައިޓެޑް އަރަބް އެމިރޭޓްސް އާއި އަދި ތުރުކީ ވިލާތާއި މިކަމާއި ގުޅޭގޮތުން މަޝްވަރާ ކޮށް ދެގައުމާއި އެކު މިކަމާއި ގުޅޭ މަޝްވަރާތައް ކުރިއަށް ގެންދިއުމަށް ވެސް ނިންމާފައިވާކަމަށް ނޫސްވެރިންގެ ބައްދަލުވުމުގައި ނާޒިމް ވިދާޅުވިއެވެ.  އަދި ސައިބާ ސެކިއުރިޓީގެ އިންފްރާސްޓްރަކްޗާ ތަރައްގީ ކޮށް ކެޕޭސިޓީ ބިލްޑް ކުރުމަށް ކުރަން ޖެހޭ އެންމެހާ ކަންކަން ކުރުމަށް އިއްޔެގެ ވަޒީރުންގެ މަޖިލީހުގައި ވަނީ ނިންމާފައި ކަމަށް އޭނާ ވިދާޅުވިއެވެ.