ކެބިނެޓަށް އެއްވެސް ބަދަލެއް ގެނައުމަށް ރައީސުލްޖުމްހޫރިއްޔާ ނިންމަވާފައެއް ނުވޭ: ތަރުޖަމާނު

ކެބިނެޓަށް އެއްވެސް ބަދަލެއް ގެނައުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ނިންމަވާފައި ނުވާކަމަށް، ރައީސްގެ ތަރުޖަމާނު، ހީނާ ވަލީދު ވިދާޅުވެއްޖެއެވެ.

މީސް މީޑިއާގައި ބައެއް ފަރާތްތަކުން މި ސަރުކާރުގެ ކެބިނެޓަށް ބަދަލު ގެނައުމަށް ތައްޔާރުވަމުންދާކަމަށް ފެތުރެމުންދާ ވާހަކަތަކާ ގުޅޭގޮތުން ތަރުޖަމާނު އެކްސްގައި ކުރެއްވި ޕޯސްޓެއްގައި ވަނީ އެކަން ދޮގުކުރައްވާފައެވެ.

ބައެއް ފަރާތްތަކުން މީސްމީޑިއާގައި ދައުރުކުރަމުންދާ ހަބަރުތަކުގައި ބުނެފައިވަނީ، ކެބިނެޓަށް ގެނައުމަށް ރައީސް ނިންމެވި ބައެއް ބަދަލުތައް، ލީކުވުމުންއެ ބަދަލުތައް ނުގެނައުމަށް ނިންމާފައިވާކަމަށެވެ. ކެބިނެޓަށް ގެނައުމަށް ނިންމާފައިވާ ބަދަލުތަކުގެ ތެރޭގައި އެފަރާތްތަކުން ބުނެފައިވަނީ ޓޫރިޒަމް މިނިސްޓަރާއި، ފިނޭންސް އަދި ޔޫތް މިނިސްޓަރުގެ މަގާމު ބަދަލުކުރުމަށް ރައީސް ނިންމެވި ކަމަށެވެ.

ރައީސް ޑރ.މުއިއްޒުގެ ކެބިނެޓަށް ބަލާއިރު، ސިއްހީ ހާލުކޮޅު ހުރިގޮތުން، މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރގެ މަގާމުން ޑރ.އައިޝަތު ރަމީލާ މިއަދު ވަނީ އިސްތިއުފާދެއްވާފައެވެ. އެކަމާ ގުޅިގެން ރައީސުލްޖުމްހޫރިއްޔާ ޑރ.މުއިއްޒު ވަނީ ދައުލަތުގެ ކަންތައްތައް ރަނގަޅަށް ހިންގުމުގައި އެހީތެރިވުމަށްޓަކައި އެމަނިކުފާނަށް ދެއްވި އެއްބާރުލެއްވުމަށާއި، ތެދުވެރިކަމާއި ވިސްނުންތެރިކަމާއެކު، ސަރުކާރަށް ކޮށްދެއްވި އަގުހުރި ޚިދުމަތްތަކަށްޓަކައި ވަރަށް އިޚްލާޞްތެރިކަމާއެކު  ރަމީލާއަށް ޝުކުރު އަދާކުރައްވާކަމަށެވެ.

ޑރ.ރަމީލާ ގެންދަވަނީ ކެންސަރަށް ފަރުވާ ކުރައްވަމުންނެވެ.