މީގެ ފަހުން ހުޅުމާލެ ކުރެދިމާ މަގަކީ ވަންވޭއެއް

ހުޅުމާލޭގެ ކުރެދިމާ ހިނގުން ނަމަކަށް ކިޔާ މަގަކީ އެއްކޮޅަށް ދުއްވޭ މަގެއްގެ ގޮތުގައި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބަދަލުކޮށްފިއެވެ.

މި މަގަކީ ހުޅުމާލެ ފޭސް އެކަކާއި ފޭސް ދޭއް ގުޅުވައިދޭ ބްރިޖު 2 އަދި 3 އާ ދޭތެރޭ އޮންނަ މަގެކެވެ.

އެކްޑީސީއިން ބުނާ ގޮތުގައި މި ބަދަލު ގެންނަން ނިންމީ، އެ ސަރަހައްދުގައި ހިނގާ މަގުމަތީގެ އެކްސިޑެންޓްތައް ގިނަވުމާ ގުޅިގެން، މަގުގެ ރައްކާތެރިކަން ކަށަވަރު ކުރުމަށްޓަކައެެވެ. ޚާއްޞަކޮށް ފަހި ފްލެޓްތަކުގައި މީހުން އާބާދުވެ، އެ ބްރިޖްތައް ބޭނުންކުރާ މީހުންގެ އަދަދު އިތުރުވެފައިވާ މި ދަނޑިވަޅުގައި މިފަދަ ފިޔަވަޅެއް އެޅުމަކީ ކޮންމެހެން ބޭނުންތެރި ކަމެއް ކަމަށް ވެސް އެ ކޯޕަރޭޝަނުން ފާހަގަކުރެއެވެ.

މާލެ ސަރަހައްދުގައި އެކްސިޑެންތުތައް ހިނގުމަކީ ވަރަށް އާއްމުކަމެއވެ. އެގޮތުން މިމަހުގެ މިހާތަނަށްވެސް މާލެ ސަރަހައްދުގައި 106 އެކްސިޑެންޓު ހިނގާފައިވާކަމަށް ފުުލިހުން ހާމަކޮށްފައިވެއެވެ. މިއާއިއެކު، ޓްރެފިކް މައްސަލަތައް ހައްލުކޮށް، ހުޅުމާލޭގެ މަގުތަކަކީ އެކްސިޑެންޓް މަދު އަދި ރައްކާތެރި ތަނަކަށް ހެދުމަށް، ފުލލުހުންނާއި ގުޅިގެން އެޗްޑީސީން ވެސް އަންނަނީ ގިނަ މަސައްކަތްތަކެއް ކުރަމުންނެވެ.