ފަތުރުވެރިކަން ކުރިއެރުވުމަށް މަޓާޓޯއިން އިންޑިއަން އެސޯސިއޭޝަން އޮފް ޓުއާ އޮޕަރޭޓަރސްއާ ގުޅިގެން މަސައްކަތް ފަށައިފި

މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއާ އޮޕަރޭޓަރސް (މަޓާޓޯ) އިން އިންޑިއަން އެސޯސިއޭޝަން އޮފް ޓުއާ އޮޕަރޭޓަރސް (އަޔާޓޯ) އާއި އެކު އެއްބަސްވުމެއްގައި ސޮއިކޮށްފިއެވެ.

މިއަދު މަޓޯޓާ  އާއި އަޔޯޓާއާ ދެމެދު އެއްބަސްވުމެއްގައި ސޮއިކޮށްފައިވަނީ ދިވެހިރާއްޖެއާއި އިންޑިއާއާއި ދެމެދު ފަތުރުވެރިކަމުގެ އެއްބާރުލުން އިތުރުކޮށް ފަތުރުވެރިކަމުގެ ސިނާޢަތާއި ގާތް ގުޅުމެއް އުފެއްދުމާއި ދެފަރާތުގެ ކުރިއެރުމަށް މަސައްކަތްކުރުމުގެ މަގުސަދުގައެވެ.

މި އެއްބަސްވުމަކީ ދެ މުއައްސަސާގެ ނެޓްވޯކްތަކާއި ވަސީލަތްތައް ބޭނުންކޮށްގެން ދަތުރުފަތުރާއި ސަޤާފީ ކަންކަމަށް ފުރުޞަތުތައް ފަހިކޮށް، ދެ ޤައުމުގެ މެދުގައި ފަތުރުވެރިކަން ކުރިއެރުވުމުގައި މުހިންމު މޭލުދަނޑިއެކެވެ.

މިއަދު ވެވުނު އެއްބަސްވުމުގެ ދަށުން، ޖޮއިންޓް މާކެޓިން އިނިޝިއޭޓިވްސް މެދުވެރިކޮށް ބައިލެޓަރަލް ޓޫރިޒަމް ކުރިއަރުވާ، ޚިދުމަތުގެ މިންގަނޑުތަކާއި އޮޕަރޭޝަނަލް އެފިޝަންސީތައް ރަނގަޅު ކުރުމަށް އެންމެ ރަނގަޅު އުޞޫލުތައް ޙިއްސާކޮށް، ގުޅިގެން އިވެންޓްތަކާއި ރޯޑްޝޯ އަދި ފެއާތައް އިންތިޒާމްކުރުމުގެ އިތުރުން، ދެގައުމަށް ވެސް ފައިދާހުރި ދެމެހެއްޓެނިވި ފަތުރުވެރިކަމުގެ އުޞޫލުތައް ޕްރޮމޯޓްކުރެވިގެން ދާނެއެވެ.

މި އެއްބަސްވުމުގައި ސޮއިކުރުމަށްފަހު މަޓާޓޯއިން ވަނީ އިންޑިއާއިން ރާއްޖެއަށް ކަނޑައަޅުއްވާފައިވާ ހައިކޮމިޝަނަރ، މުނޫ މަހާވަރުއާއި ބައްދަލުކޮށްފައެވެ. މިދިޔަ އެޕްރީލް މަހުވެސް މަޓާޓޯއިން އެމަނިކުފާނާއި ބައްދަލުކުރި އިރު، މަޓާޓޯއިން މައުލޫމާތު ދޭ ގޮތުގައި މިއީ ކުރިން ބޭއްވި ބައްދަދަލުވުމުގެ ފޮލޯއަޕް ބައްދަލުވުމެކެވެ.

މަޓާޓޯއަކީ ދިވެހި ޓްރެވަލް އޭޖެންޓުންނާއި ޓުއާ އޮޕަރޭޓަރުންގެ މަސްލަޙަތު ތަމްޞީލުކޮށް، ފަތުރުވެރިކަމުގެ ސިނާޢަތަށް ފައިދާހުރި ސިޔާސަތުތަކަށް ވަކާލާތުކޮށް، ދިވެހިރާއްޖެއަކީ ފަތުރުވެރިކަމުގައި އެންމެ މަތީ މަންޒިލެއްގެ ގޮތުގައި ދަމަހައްޓަން މަސައްކަތްކުރާ މުއައްސަސާއެކެވެ. އަދި އަޔާޓޯ އަކީ މުޅި އިންޑިއާގެ 1،800 އަށް ވުރެ ގިނަ ޓުއާ އޮޕަރޭޓަރުން ތަމްޞީލުކުރާ އިންޑިއާގެ އެންމެމަތީ ޓްރެވަލް ޓްރޭޑްގެ އެއް މުއައްސަސާއެވެ. ދެ މުއައްސަސާގެ މެދުގައި ވެވުނު މި އެއްބަސްވުމުގެ ސަބަބުން، ދެ ޤައުމުގެ ފަތުރުވެރިކަމަށްވެސް އެދެވޭ ހެޔޮ ބަދަލުތަކެއް އަންނާނެ ކަމަށް ބެލެވެއެވެ.