ދެ އިންތިޚާބު އެއްކޮށްލަން އުޅެނީ ރިޔާސީ ދައުރު ދަންމާލަން: އެމްޑީޕީ ޕީޖީ

ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލަން މި ސަރުކާރުން މަސައްކަތް ކުރަނީ ހިނގަމުން މިދާ ރިޔާސީ ދައުރު ދަންމާލަން ކަމަށް އިދިކޮޅު އެމްޑީޕީން ބުނެފިއެވެ.

ދެ އިންތިޚާބު އެއްކޮށްލާ ބިލު އިއްޔެ ކޮމިޓީން ފާސްކޮށްފައިވާއިރު، މިއަދު އޮތީ އެއަށް ބަހުސް ކުރުމެވެ. ނަމަވެސް އެމްޑީޕީ މެންބަރުން އަޑު ގަދަކޮށް މަޖިލީހުގެ ނިޒާމް ގެއްލުވައި ލުމުން މިއަދުގެ ޖަލްސާ ވަނީ މެދުކަނޑާލާފައެވެ.

އެފަހުން މަޖިލީހުގެ ބޭރުގައި އެމްޑީޕީން ބޭއްވި ނޫސްވެރިންގެ ބައްދަލުވުމުގައި އެމްޑީޕީ ވަގުތީ ޗެއާޕާސަން އަދި ހަނިމާދޫ ދާއިރާގެ މެންބަރު އަބްދުލްޣަފޫރް މޫސާ ވިދާޅުވީ، މި ސަރުކާރުން މަސައްކަތް ކުރަމުންދަނީ، ގޯސްކޮށް ގާނޫނު އަސާސީއާ ކުޅެ، ދައުރު ދަންމާލުމަކީ އެއްވެސް މައްސަލައެއް ނޫން ކަމަށް ރައްޔިތުންނަށް ދައްކަން ކަމަށެވެ.

އޭރުންދެން މާދަން ހުށަހަޅާނެ ރިޔާސީ އިންތިހާބު ދެން ބާއްވާނީ، 2030 ގައޭ، ނޫނީ 2028 ގައޭ. އެކަންކަން ކުރުމަށްޓަކައި މިކަން ކުރަނީމި. މިއީ ގަބޫލު ކުރެވޭނެ ކަމެއް ނޫން. އެންމެ ފަހުން އޮތް ރިޔާސީ ބަޔާނުގައި 2030  ކޮށްދެން ހުރި ކަންލަމުގެ ވާހަކަ ކިޔައިދެމުން ގެންދިޔައީ. އެއީ ދައުރުން ބޭރުވީ. އެހެން ވީމާ މިކަން ރާވާ ހިންގާ ގޮތް، ވަރަށް ސާފުކޮށް ފެންނަން މިއޮތީ.

އަބްދުލްޣަފޫރް

ޣަފޫރު ވިދާޅުވިގޮތުގައި މި ސަރުކާރުން މަސައްކަތް ކުރަނީ ދިވެހިރާއްޖޭގައި އޮތް ދިމިކުރާތީ ވެރިކަމުގެ ނިޒާމް ގެއްލުވާލައި ޚުދުމުޚުތާރު ވެރިކަމަކާ ދިމާއަށް ގައުމު ގެންދިޔުމަށެވެ.

ދެން އަނެއްކާ ހުށަހަޅާނީ ތިން އިންތިޚާބު އެއްކޮށްލަން. ރައްޔޮތުން ކައިރިއަށް ދިޔުމަކީ މި ބޭފުޅުން ކުރަން ބޭނުންވާ ކަމެއް ނޫން. ރައްޔިތުންގެ އަޑު އެހުމަކީ މި ބޭފުޅުން ގަބޫލުކުރާ ކަމެއް ނޫން ދަންނަވެސް ކަމެއް ނޫން.

އަބްދުލްޣަފޫރް

ޣަފޫރު އިތުރަށް ވިދާޅުވީ، ދެ އިންތިޚާބު އެއްކޮށްލުމަށް ނަގާ ވޯޓުގައި އެމްޑީޕީން ބައިވެރި ނުވާނެ ކަމަށެވެ.

ޣަފޫރުގެ އިތުރުން މިއަދުގެ ބައްދަކުވުމުގައި ވާހަކަދައްކަވަމުން ވައިކަރަދޫ ދާއިރާގެ މެމްބަރު ހުސައިން ޒިޔާދު ވެސް ވަނީއެ ބިލަށް ވަރަށް ބޮޑަށް ފާޑުވިދާޅުވެފައެވެ.

އޭނާ ވިދާޅުވީ، ސަރުކާރުތަކުން ރަށްރަށަށް ކަންކަން ކޮށްދެނީ އިންތިޚާބު ތަކާ ދިމާކޮށް ކަމަށެވެ. އެގޮތުން ރަށްރަށުގައި މަޑު ޖެހުފައި ހުރި ކަންކަންވެސް މަޖިލިސް އިންތިޚާބާއި ކައުންސިލް އިންތިޚާބާ ދިމާކޮށް ކުރިއަށްދާ ކަމަށާ، ދެ އިންތިޚާބް އެއްކޮށްލުމުން އެގޮތަށްވެސް މަޝްރޫއުތައް ކުރިއަށް ނުދާނެ ކަމަށް އޭނާ ވިދާޅުވިއެވެ.

އެހެންކަމުން، ތަރައްގީގެ މަޝްރޫއުތައް މަޑުޖެހި ރައްޔިތުން ބޭނުންވާ ކަންކަން ނުވާނެ ކަމަށްވެސް އޭނާ ވިދާޅުވިއެވެ.