އެކުގައި މި ނިކުތީ ނޫސްވެރިކަން ހަނިކޮށް ހުދުމުހުތާރު ވެރިކަމަކަށްދާތީ: ތިން ރައީސުން

ސަރުކާރާ ދެކޮޅަށް ނިކުންނަން ޖެހުނީ މީޑިއާގެ މިނިވަންކަން ހަނިކޮށް ހުދުމުހުތާރު ވެރިކަމަކާ ދިމާލަށް ދާންފެށުމުންކަމަށް ކުރީގެ ތިން ރައީސުންކަމަށްވާ، ރައީސް މުހައްމަދު ނަޝީދު، އިބްރާހިމް މުހައްމަދު ސާލިހް އަދު ރައީސް ޔާމީނު ވިދާޅުވެއްޖެއެވެ.

އަދުގެ ސަރުކާރު ޖަވާބުދާރީކުރުވުމަށް ތިން ރައީސުން އެއްގަލަކަށް އަރައި ފުރަތަމަ ފަހަރަށް މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ތިން ބޭފުޅުންވެސް ވިދާޅުވީ، ސިޔާސީ ހިޔާލުތަފާތުވުންތައް އެއްފަރާތްކުރުމަށްފަހު ސަރުކާރު ޖަވާބުދާރީ ކުރުވަން ނިކުންނަން ޖެހުނީ ނޫސްވެރިންގެ ހައްގުގައިކަމަށެވެ.

ބައްދަލުވުމުގައި ވާހަކަދައްކަވަމުން ކުރީގެ ރައީސް ޔާމީނު ވިދާޅުވީ، ނޫސްވެރިންނަކީ ސަރުކާރު ޖަވާބުދާރީ ކުރުމާއި އަދި ރައްޔިތުންނަށް ބާރުވެރިކުރުމަށް އޮތް އެންމެ ވަރުގަދަ ފަރާތްކަމަށެވެ. ނަމަވެސް އަދުގެ ސަރުކާރުގެ އަމަލުތައް މިހާރުހުރީ ޝަރުއީ މަރުހަލާގެ ތެރެއިން މީޑިއާގެ މިނިވަންކަން ހަނިކުރާގޮތަށްކަން ރައީސް ޔާމީނު ފާހަގަކުރެއްވިއެވެ. ރައީސް ޔާމީން ވިދާޅުވީ، ތިން ރައީސުންގެ ނިންމުމަކީ މީޑިއާގެ މިނިވަންކަމަށް މަސައްކަތްކުރަން ގުޅިގެން ނިކުތުން ކަމަށާއި، ހައްޔަރުކޮށްފައިވާ ނޫސްވެރިން މިހާރުން މިހާރަށް ދޫކޮށްލުމަށް ގޮވާލާކަމަށެވެ.

މިރޭ އަޅުގަނޑުމެން ހަމަ ދަންނަވަން ސަރުކާރަށް ހަމަ މިހާރުން މިހާރަށް ހަޔަރުކޮށްފައި ތިބި ނޫސްވެރިން ދޫކޮށްލަން. މިހާރުން މިހާރަށް ހަޔަރުކޮށްފައި ތިބި ނޫސްވެރިން ދޫކޮށްލަން ޖެހޭ. އަދި މިއަދު އިންސާފުގެ ދާއިރާއަށް އަޅުގަނޑުމެން ދަންނަވަން. މިހާރު ނެރުއްވާފައި އޮތް ގެގް އޯޑަރ ވެސް ދޫކޮށްލަން

ރައީސް ޔާމީނު

ރައީސް ސޯލިހް ވިދާޅުވީ ތިން ރައީސުން ނިކުންނަން ޖެހުނީ ގައުމުގެ ހާލަތު މިއޮގޮތަށް އޮތް ހާލަތުން ކަމަށާއި މިކަމުގައި އިސްވެ ކުރަންޖެހޭ ކަންތައްތަކެއް އެއޮތްކަމަށް ގަބޫލުކުރެވޭތީކަމަށެވެ. އެގޮތުން ހުރި ސިޔާސީ ހިޔާލު ތަފާތުވުންތައް އެއްފަރާތްކުރުމަށްފަހު މިއީ ގައުމީ މަސްލަޙަތު އިސްކޮށް، ރައްޔިތުންނަށްޓަކައި ކަންތައްތަކެއް ކުރަންޖެހޭ ވަގުތުކަމަށް ރައީސް ސޯލިހް ވިދާޅުވިއެވެ.

އެންމެ މުހިއްމު އެއްކަމަކީ ސަރުކާރު ޖަވާބުދާރީ ކުރުމަށްޓަކައި އޮތް ޚިޔާލުފާޅުކުރުމުގެ މިނިވަންކަމާ، ނޫސްވެރިކަމުގެ މިނިވަންކަމަށް އަރައިގަތުން. އަދި ރައްޔިތުންގެ މަޖިލީހުގެ ބާރު ކަނޑުވާލާ، ޝަރުއީ ދާއިރާއަށް ބާރުވެރިކަން ހިންގުމުގެ ފަރާތުން ނުފޫޒުފޯރުވާ މައްސަލަ

ރައީސް ސޯލިހް

ރައީސް ނަޝީދު ވިދާޅުވީ، ސަރުކާރު ހަމަޔަކަށް އެޅުވުމަށް ފަށާފައިވާ ހަރަކާތްތައް ދޫނުދީ ކުރިއަށްގެންދާނެކަމަށެވެ. ހަރަކާތްތައް ހއުްޓާލާނީ ނަތީޖާ ހާސިލްވުމުންކަމަށްވެސް ރައީސް ނަޝީދުގެ ވާހަކަފުޅުގައި ވަނީ ފާހަގަކުރައްވާފައެވެ.