މެންބަރުންގެ އެއްބާރުލުން ލިބެންޏާ ދާއިރާއަށް ކަންތައް ކޮށްދޭން ފަސޭހަވާނެ: ރައީސް

ސަރުކާރުގެ ފަރާތުން ރަށްތަކުގައި ތަަރައްޤީގެ މަޝްރޫޢުތައް ހިންގާއިރު އެ ދާއިރާއެއްގެ މަޖިިލިސް މެންބަރުންގެ ފަރާތުން އެއްބާރުލުން ލިބޭނަމަ އެ މަޝްރޫއު ހިންގުމަށް ފަސޭހަވެގެންދާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިޙް ވިދާޅުވެއްޖެއެވެ.

މިއަދު ހދ. ނޮޅިވަރަންފަރު ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުން ރައީސް ސޯލިޙް ވިދާޅުވި ގޮތުގައި، ތަރައްގީ ކުރުމަށް ޓަކައި ސަރުކާރަށް އެއްބާރުލުން ދެއްވާ މަޖިލިސް މެމްބަރުން އެ ދާއިރާތަކަށް އިންތިޚާބުކުރުމަކީ މުހިއްމު ކަމެއް ކަމަށެވެ.

ނޮޅިވަރަންފަރު ދާއިރާއަށް ވާދަކުރައްވާ އެމްޑީޕީގެ ކެންޑިޑޭޓް އަހުމަދު އަލީ އަށް ވޯޓް ދެއްވުމަށް އެދިވަޑައިގެން ވާހަކަ ދައްކަވަމުން ރައީސް ސޯލިޙް ވަނީ ދާއިރާގެ ވައުދުތައް ފުއްދުމަށް ޓަކައި މަޖިލިސް މެމްބަރުންގެ ތާއީދު ބޭނުންފުޅުވާ ކަމަށެެވެ.

ރައީސް ވިދާޅުވި ގޮތުގައި އެމްޑީޕީގެ ކެންޑިޑޭޓަކަށް ރައްޔިތުންނަށް ދިމާވެފައިވާ މައްސަލަތަކަށް ހައްލު ހޯދުމަށްޓަކައި މައްސަލަތައް ހިފައިގެން ސަރުކާރާއި ހަމައަށް އައުމަށް ފަސޭހަވެގެންދާނެ ކަމަށެވެ.

މިމޭރުމުން ވާހަކަފުޅު ދައްކަވަމުން ރައީސް ސޯލިޙް ވަނީ އެމްޑީޕީގެ މެމްބަރުންނަށް ރައްޔިތުން ވޯޓު ދިނުމަށް އެދިވަޑައިގެންނަވާފައެވެ.