އިޓަލީން ފަތުރުވެރިން ގެނައުމާ ގުޅޭގޮތުން މަޝްވަރާކޮށްފި

ފަތުރުވެރިކަމާ ބެހޭ ވަޒީރު، އިބްރާހިމް ފައިސަލް، އިޓަލީވިލާތުގެ ފަތުރުވެރިކަމާ ބެހޭ ވަޒީރާ ބައްދަލުކުރައްވައި، އެޤައުމުން ޒިޔާރަތްކުރާ ފަތުރުވެރިން އިތުރުކުރުމާ ގުޅޭގޮތުން މަޝްވަރާކުރައްވައިފިއެވެ.

އިޓަލީވިލާތުގެ ފަތުރުވެރިކަމާބެހޭ ވަޒީރު ޑާނިއެލާ ސަންޓޭންޗްއާއެކު ބޭއްވެވި މި ބައްދަލުވުމުގައި މިނިސްޓަރު ފައިސަލް ވަނީ ރާއްޖެއަށް މިހާރު ޒިޔާރަތްކުރާ ފަތުރުވެރިންގެ އަދަދު އިތުރުކުރެވޭނެ ގޮތްތަކާ ބެހޭގޮތުން މަޝްވަރާކުރައްވާފައެވެ.

ޓޫރިޒަމްގެ އިތުރުންވެސް މިނިސްޓަރު ފައިސަލް ވަނީ އިޓަލީވިލާތުގެ އިންވެސްޓަރުންނަށް ރާއްޖޭގައި ހުރި ފުރުސަތުތަކާ ބެހޭ މައުލޫމާތު ހިއްސާކުރައްވާފައެވެ.

މިއަހަރަކީ އިޓަލީވިލާތުން ރާއްޖެއަށް ޒިޔާރަތްކުރަމުން އަންނަ ފަތުރުވެރިންގެ އަދަދަށް ވަރަށްބޮޑު ކުރިއެރުމެއް ލިބެމުން އަންނަ އަހަރެކެވެ.

އިޓަލީއަކީ މިހާރު ރާއްޖެއަށް 5 ވަނައަށް އެންމެގިނަ ފަތުރުވެރިން އަންނަ ޤައުމެވެ. ޓޫރިޒަމް މިނިސްޓްރީގެ ތަފާސްހިސާބުތަކަށް ބަލާއިރު، އަހަރުގެ މިހާތަނަށް އިޓަލީވިލާތުން ރާއްޖެއަށް 108,463 ފަތުރުވެރިން ޒިޔާރަތްކޮށްފައިވާއިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު، 7.1 އިންސައްތަ އިތުރު އަދަދެކެވެ.

ރާއްޖޭގެ ފަތުރުވެރިކަމުގެ ސިނާއަތުގައި އިޓަލީއަކީ ވަރަށް މުހިއްމު މާކެޓެކެވެ. ރާއްޖެއަށް 1972 ވަނަ އަހަރު ފަތުރުވެރިކަން ތައާރަފްވިއިރު، އެންމެ ފުރަތަމަ ފަތުރުވެރިއެއްގެ ގޮތުގައި ރާއްޖެއަށް ޒިޔާރަތްކުރީ އިޓަލީގެ ރައްޔިތެކެވެ.