އިންޑިއާއާއިއެކު ފްރީ ޓްރޭޑް އެއްބަސްވުމެއް ހަދަން މަޝްވަރާކުރަން ހުށަހަޅައިފިން: ވަޒީރު ޒަމީރު

އިންޑިއާ އާއިއެކު ފްރީ ޓްރޭޑް އެގްރީމެންޓް (އެފްޓީއޭ) ހެދުމާއި ގުޅޭގޮތުން މަޝްވަރާކުރަން ހުށަހަޅާފައިވާކަމަށް ޚާރިޖީ ވަޒީރު މޫސާ ޒަމީރު ވިދާޅުވެއްޖެއެވެ.

ޚާރިޖީ ވަޒީރު މިކަން ހާމަކޮށްފައިވަނީ އިންޑިއާގެ އެކްސްޓާނަލް އެފެއާސް މިނިސްޓަރު ސުބްރަމަނިއަމް ޖައިޝަންކަރު މިހާރު ރާއްޖެއަށް ކުރައްވަމުން ގެންދަވާ ދަތުރުފުޅާއި ބެހޭ ގޮތުން ނެރުއްވި ނޫސްބަޔާނުގައެވެ.

މިގޮތުން ވަޒީރު ޒަމީރު ވިދާޅުވީ، އިންޑިއާއާއިއެކު އެފްޓީއޭއެއް ހަދަން ރައީސް ޑރ.މުޙައްމަދު މުޢިއްޒު ހުށަހަޅުއްވާފައިވާ ހުށަހެޅުން އިންޑިއާގެ ޖައިޝަންކަރަށް ހުށަހަޅައި އެކަމާ ބެހޭ މަޝްވަރާތައް ފަށަން ބޭނުންވާ ކަމަށެވެ.

އެފްޓީއޭގެ އިތުރުންވެސް އިގްތިޞާދީ އާއި ވިޔަފާރިއާ ގުޅުން ހުރި އެހެން އެއްބަސްވުންތަކުގެ ސަބަބުން ދެ ގައުމުގެ ދެމެދުގައި ވިޔަފާރިކުރަން ލުއިފަސޭހަވާނެ ކަމަށެވެ.

މިނޫންވެސް ގިނަ ދާއިރާތަކުން ވަޒީރު ޒަމީރާއި ޖައިޝަންކަރު މަޝްވަރާކުރުމަށް ހަމަޖެހިފައިވާއިރު، އޭގެ ތެރޭގައި އިންވެސްޓްމެންޓް ދާއިރާއިން އިތުރަށް އެއްބާރުލުން ދިނުމާއި، ތައުލީމާއި ހުނަރު ތަރައްގީ ކުރުމާއި ކުޅިވަރުގެ ދާއިރާ އާއި ދިފާއީ އަދި ސަލާމަތީ ކަންކަމާއި، ކޮންސިއުލާއާ ގުޅޭ ބައި ވެސް ހިމެނެ އެވެ.

ވަޒީރު ޒަމީރުވަނީ އިންޑިއާއިން ރާއްޖޭގެ އިޖްތިމާއީ އަދި އިގްތިސޯދީ ތަރައްގީއަށް ދޭ އެހީތަކަށާއި، އެކި ދާއިރާތަކުން މެދުކެނޑުމެއް ނެތި އިންޑިއާއިން ފޯރުކޮށްދޭ އެހީތެރިކަމަށް ޝުކުރު އަދާ ކުރައްވާފައެވެ.

"ސިއްހީ ދާއިރާ، ތައުލީމީ ދާއިރާ، ޒުވާނުން، ކުޅިވަރުގެ ދާއިރާ، ބޯހިޔާވަހިކަން އަދި އުމްރާނީ ތަރައްގީގެ ދާއިރާތައް ފާހަގަކުރެވޭ،"

ވަޒީރު ޒަމީރު ވިދާޅުވިއެވެ.

މީގެ އިތުރުންވެސް، މި ނޫސްބަޔާނުގައި ވަޒީރު ޒަމީރު ވަނީ އިންޑިއާގެ 'ނޭބަހުޑް ފަސްޓް ޕޮލިސީ'ގެ ދަށުން ރާއްޖެއަށް މާލީ އެހީތެރިކަމުގެ ގޮތުން ވަރަށް ބޮޑު ފައިދާތަކެއް ލިބިފައިވާކަންވެސް ފާހަގަކުރައްވާފައެވެ.